2
Orong Pa̱u̱lo̱ Ti̱to̱ kedemez ol zoz cu
1 Ti̱to̱, abunna zin ming edemzek ol de̱mzi̱ne̱t wa een de̱de̱. 2 Ti̱lo̱ ol wak macik a̱ddi̱ki̱re̱ abunna ming anyak uruttok baizowe odohize, kar ol ko̱to̱ngo̱o̱ltte̱ nogo, kar kabaito baiz ci abunna. Abunna ming anyak tu̱we̱ne̱t ci okkomi ki rezinet ol ki niimenet no̱ngi̱tto̱n. 3 Ti̱lo̱ bo̱do̱k ngaai wak a̱ddi̱ki̱re̱ bu̱k kar kabaito baiz wa ngaai cik elemtta Ta̱mu̱ta̱dde̱n. Gerza ming omomot ol volonga, gerza ming een bba̱kco̱k. Abarik abunna ming edemez ol kaal cik abunna. 4 Abunna ngaai wak a̱ddi̱ki̱re̱ ko̱ ming edemez ngaai wak kidik kar kirezzit macuwa cigge̱k ki dooli, 5 abunna ming kanyak uruttok baizowe, kabaito baiz ci A̱li̱le̱, ku̱zu̱tte̱ ce̱e̱zi̱ cigge̱k ju̱rru̱m, ku̱tu̱gu̱zzo̱ kaal cik abunna, kiziyet zoz ci macuwa cigge̱k. Kar zin iróng atin anyahak dominet zoz ci Ta̱mu̱ta̱dde̱no̱.
6 Imma go̱o̱le̱ neci i̱lo̱tte̱ ngaai wak a̱ddi̱ki̱re̱ ngaai wak kidik niko ko̱, Ti̱to̱, recanek logoz bu̱k kar kanyait uruttok baizowe kaale cik ogon nege. 7 Abunna i̱nna̱ bu̱k ming ogoni kaal cik abunna kar ol kicinnet gool ci abunna ngatunne. Abunna kaala ne̱k ogoni ko̱ ming i̱ye̱la̱ de̱mzi̱ne̱t cunno̱ng. 8 Anyik de̱mzi̱ne̱t cunne kubunna kar iróng ol ibbez zoz neci. Imma ol wak orong kadangttin, adak a̱lya̱ni̱ iróng amuda gi̱i̱ imma ci gerze kar kadangttet.
9 Aanycik du̱cca̱k wak a̱li̱ngli̱ng ce̱e̱za̱ ollin kiziyet zoz ci ol wak e̱e̱ggi̱n ma̱ci̱gi̱ ce̱e̱zi̱ kaale do̱o̱k kar nege katalit. Gerze du̱cca̱ha̱ ming a̱ddi̱la̱nne̱k nogo zoz. 10 Gerza bo̱do̱k ming ogoroz kaal cik ma̱ci̱gi̱nnu̱. Abarik abunna ming ogon kaal cik een de̱de̱, kar ol keelemtta de̱mzi̱ne̱t ci Ta̱mu̱ta̱dde̱no̱ wa een Ti̱ri̱zo̱i̱t cinna.
11 Ma̱rri̱t Ta̱mu̱ta̱dde̱n i̱ye̱la̱ deten ngati Ye̱su̱ Ki̱ri̱sto̱ kar ki̱ti̱ri̱z ol do̱o̱k. 12 Edemezzet de̱ti̱ne̱t kar kutungget baiz ci gerze iróng Ta̱mu̱ta̱dde̱n elemi. Abunna kabak lo̱o̱ce̱ cu ngati kanyahe uruttok baizowe, kogon kaal cik abunna, kar bo̱do̱k kaarttek zi̱nze̱tti̱ Ta̱mu̱ta̱dde̱n. 13 Kogon kaal ne̱ko̱ niko ngati keerewe di̱ngdi̱ngo̱n ci obodane Ta̱mu̱ta̱dde̱n wa a̱ddi̱ki̱re̱ ki Ti̱ri̱zo̱i̱t cinna Ye̱su̱ Ki̱ri̱sto̱. 14 Aanyik enne ele cinne kize wawac, kar keelawet ba̱cci̱no̱we̱, kar kidimannet kizet caale, kar zin kaanyyet kizet ol ciginnek, kar Ku̱tu̱gu̱z kaal cik abunna do̱ niko.
15 I̱yo̱ko̱ zin, Ti̱to̱, demezek zo̱zzo̱k ne̱ko̱ ol wak a̱tu̱we̱. Dimannek nogo zo̱zzo̱k, anyik ku̱tu̱gu̱zzo̱ kaal ne̱ko̱. Aanyai i̱nna̱ komiz ci i̱lo̱tte̱ ol zo̱zzo̱we̱ ne̱ko̱. Abunna ming o̱ngo̱o̱li̱nni̱ ol do̱o̱k.