2
Niim no̱ngi̱tto̱n ngati a̱ggi̱ddi̱ ol zo̱ze̱ ci Ye̱su̱
1 I̱nna̱, Ti̱mo̱te̱yo̱ wa e̱e̱ni̱ ngeranni tu̱we̱nta̱, nyak komiz eezete ci aave ngati Ye̱su̱ Ki̱ri̱sto̱, 2 kar zo̱zzo̱wa̱ balik azii i̱nna̱ ngatinani ke̱, ngati aavtte bbaccaha cik meelek ke̱, aanyonik zo̱zzo̱wa̱ ne̱ke̱ ol cik abunna kar atin nege ke̱de̱me̱zzi̱t ol u̱gge̱ bu̱k.
3 Niim pirnanet kiwagon aciirenti ngati a̱li̱ngli̱nge̱ zoz ci Ye̱su̱ Ki̱ri̱sto̱. 4 Iróng e̱e̱ti̱ ci ogon ki aciiroci a̱li̱ngli̱nge̱k Ye̱su̱ ko̱ i̱zzo̱ li̱ngli̱ngo̱n ci aave do̱. Ogon enne li̱ngli̱ngo̱n neci ju̱rru̱m abunna ming atali Manyi. 5 Ming ngen e̱e̱ti̱ ci a̱vi̱r kedeca vi̱ra̱, iróng ol amuci, anyike ol nonno gi̱i̱ ci ijare enne ol vu̱rrta̱ ngati edeccai vi̱ra̱. 6 Arume ol wak e̱e̱vye̱ oroot oowa ngati ngen ki̱bbi̱re̱ mana ci ollu. 7 I̱no̱n zoz ci ka̱du̱wa̱ki̱ ko̱, aanyi atin Manyi genyiz ci okko a̱gga̱we̱ kaal do̱o̱k.
8 I̱no̱na̱ Ye̱su̱ Ki̱ri̱sto̱ odohize, wa een ngerrti Da̱vi̱de̱ wa atahalai bali ingane Ta̱mu̱ta̱dde̱n nonno daiza. Een ne̱ko̱ kaviyak cik abunna cigannik. 9 Kapirna zo̱ze̱ ci kuwaheke ol kaviyak cik abunna ko̱. Ke̱ce̱bje̱ lagama kiwagon mu̱ju̱li̱, iróng zin zoz ci Ta̱mu̱ta̱dde̱no̱ bu̱k e̱ce̱bje̱. 10 I̱yo̱ko̱ zin, kinima no̱ngi̱tto̱n do̱o̱k zo̱ze̱ ci ol wak atahala Ta̱mu̱ta̱dde̱n, kar nege bu̱k kurubta ti̱rze̱ne̱t ngati Ye̱su̱ Ki̱ri̱sto̱, ki baiz wa a̱zi̱ze̱ aave udut. 11 De̱mzi̱ne̱t wa een de̱de̱ icu, “Ming ka̱da̱i̱ ngati kazunne zoz ci Ye̱su̱, karuge atin ki nonno bu̱k. 12 Ming kanime no̱ngi̱tto̱n cik a̱ggi̱dde̱t ol zo̱ze̱ cinne, kovvo atin kabal lo̱o̱c ki nonno. Ming kutuburret nonno, aburnnet atin enne agit bu̱k. 13 Ming iróng naga ka̱tu̱ nonno, abunna enne iróng aburnnetta, eci iróng enne amikzene ele cinne.”
Bunnat ci orong Ta̱mu̱ta̱dde̱n e̱e̱ta̱ kar ki̱li̱ngli̱nge̱
14 Benek ol wak a̱tu̱we̱ de̱mzi̱ne̱t cu ju̱rru̱m. Recanek nogo ngati azikne Manyi bu̱k kar iróng adangone zo̱zo̱nno̱k. Iróng dangonet anyaha gi̱i̱ ci abunna, abarik egerzan ol ne̱k azikne ke̱. 15 Li̱ngli̱ngo̱zi̱k Ta̱mu̱ta̱dde̱n ju̱rru̱m, kar ize du̱ca̱i̱t cinne abunna, iróng anyak a̱lya̱n, kar ka̱gga̱m zoz ci een de̱de̱ ju̱rru̱m.
16 Ma i̱i̱zo̱ dangonet ci een li̱i̱k, eci zoz neci eceba ol o̱o̱tti̱ ki̱ti̱yye̱t tu̱ go̱o̱le̱ ci Ta̱mu̱ta̱dde̱no̱. 17 Ogon dangonet necinne̱ng ke̱ ki ngo̱do̱co̱ ci a̱bu̱kbu̱wa̱ne̱k uzun. E̱e̱ggi̱n zin ol cik anyaha dangonet ci ogon ki i̱yo̱ko̱ ko̱, ciko Emaniyas ki Viletos. 18 Utungget abarik zoz wa Ta̱mu̱ta̱dde̱no̱ een de̱de̱, i̱ti̱ktte̱ ol tu̱, kar kegerzanit tu̱we̱ne̱t cinne̱ng ngati edemzeke ol zoz ci azi ne, “Itingazzo ba̱li̱ye̱ ol wak a̱da̱i̱to̱ daiza.” 19 Imma ol wak okkomi zo̱ze̱ ci Ta̱mu̱ta̱dde̱no̱ kak, iróng omoti. E̱he̱rye̱ zoz neci azi ne, “A̱gga̱ Manyi ol wak a̱tu̱ nonno.” Kar zin bo̱do̱k kize ne, “Ming orong e̱e̱ti̱ ku̱tu̱ Ye̱su̱, abunna ming uungnek mu̱nye̱n lo̱o̱c.”
20 Imma ce̱e̱ze̱ ci e̱e̱t ci een i̱to̱i̱ti̱ wa a̱ddi̱ki̱re̱ ko̱, anyak i̱jjo̱ cik e̱e̱ggi̱n dhab ki ziik wak ataltali, ki cik e̱e̱ggi̱n keen ki cik eenycai todowaca. Adimanai uggak kizeto cik riilik ovvo uggak anyak li̱ngli̱ngo̱n ci ommog gonoggi. 21 I̱ya̱bzo̱ni̱kke̱t zin kaala ne̱ko̱ agita. Ming utungek e̱e̱ti̱ imma mu̱nye̱n lo̱o̱c, u̱tu̱gu̱ enne ki gi̱i̱ ci a̱zi̱ze̱ agano ki li̱ngli̱ngo̱n. Aanyik ol ki̱li̱li̱ kar ki̱li̱ngli̱nge̱ manyi ce̱e̱z, aave kar ki̱li̱ngli̱ngte̱ li̱ngli̱ngo̱n ci abunna.
22 Tungek baiz ci logozzu lo̱o̱c. Tu̱gu̱ kaal cik abunna odohize, ki tu̱we̱ne̱t Ta̱mu̱ta̱dde̱n ki rezinet ol, ki a̱vvu̱ze̱t yahe ki ol wak a̱tu̱ Manyi zi̱nze̱ti̱nne̱ cik alali. 23 Ma i̱zzo̱ dango cik adangone ol darace, eci okko anyaha jo̱o̱re̱. 24 Gerza ming adango du̱ca̱i̱ti̱ ci Manyi ki ol, abarik abunna ming i̱rke̱ olle do̱o̱k, eheronik ol, kar bo̱do̱k kanyak zinin ci alali. 25 Abunna ming abariz ol wak adang nonno idic. Obboc atin Ta̱mu̱ta̱dde̱n uhu zi̱nze̱tti̱ cigge̱k, kar kutungtek mu̱nye̱n lo̱o̱c, kar ka̱gga̱c zoz wa een de̱de̱. 26 Kar zin kilittet lo̱rye̱ni̱t bali eceba nogo o̱o̱tti̱ ki̱li̱ngli̱ngto̱zi̱k nonno ke̱.