3
1 Baling ka̱vvu̱tta̱ u̱u̱mu̱c iróng ngen keronakung, kerakteyya o̱rge̱ ci een Atenz. 2 Ki̱tto̱ntta̱ gotonet Ti̱mo̱te̱yo̱ wa ka̱li̱ngli̱ngnya̱ bu̱k zo̱ze̱ ci Ta̱mu̱ta̱dde̱no̱ ngati kuwaheka ol kaviyak cik abunna, kar ki̱ki̱ya̱ ki̱ti̱lo̱u̱ng zoz ci Ki̱ri̱sto̱ kar bo̱do̱k keelaung ibilet ju̱rru̱m tu̱we̱nta̱ zo̱ze̱ ci Ta̱mu̱ta̱dde̱no̱. 3 Abunna bo̱do̱k ming iróng imma ngatinno̱ng a̱mi̱re̱ ki vu̱rru̱t zo̱ze̱ ci amarinnung ol zee ipirtta ko̱. A̱gga̱c ju̱rru̱m een pirnanet cu talninet cinna ol wak a̱tu̱ zoz ci Ye̱su̱. 4 Baling ngen kabak ki i̱ge̱t, ke̱be̱ne̱ku̱ng ba̱li̱ye̱ ka̱nne̱kku̱ng ne kovvo atin kapirna marnonet ci ollu eci kelemttai zoz ci Ye̱su̱. I̱tta̱ zin zoz neci de̱de̱ ki i̱yo̱ko̱ ming kacin ko̱. 5 Gi̱i̱ ci zin bali ki̱tto̱na̱ne̱ Ti̱mo̱te̱yo̱ ko̱ nenen, baling ommoga zoz ci kengerone u̱u̱mu̱c, okko atin enne acinnu̱ng ogonnu ku̱ tu̱we̱nte̱ ci a̱tu̱yyu̱ Ye̱su̱ wa atahalai. A̱wu̱ce̱ gon zinin kazi ne obboc lo̱rye̱nti̱ alabaung i̱ti̱ku̱ng tu̱, kar kumurya li̱ngli̱ngo̱ni̱ bali nang ke̱.
Anyaha Ti̱mo̱te̱yo̱ kaviyak cik abunna
6 Obodait i̱yo̱ko̱ Ti̱mo̱te̱yo̱ anyahait kaviyak cik abunna obod ki tu̱we̱ne̱t ci a̱tu̱yyu̱ Ye̱su̱ wa atahalai. Ngen bo̱do̱k niga irezzu ol wak a̱tu̱we̱ ki ol u̱gge̱ bu̱k. A̱nne̱kke̱t ne i̱no̱ne̱ttu̱ gon zi̱nze̱ti̱nne̱, kar orongnyu i̱vo̱nte̱ttu̱ ki i̱yo̱ko̱ ming korongnya naga bu̱k kicinttung ko̱. 7 Ki i̱yo̱ko̱ ming kizikta ngati Ti̱mo̱te̱yo̱ tu̱we̱ne̱t ci odoknannu tu̱we̱nte̱ ci a̱tu̱yyu̱ Ye̱su̱ niko, ming nu̱nu̱n kapirnana ggi̱de̱ne̱t ci ollu oroot, aanyyet zoz ci azunnu niga zoz ci Ye̱su̱ ko̱ kize voori zi̱nze̱tti̱, eci niga ngen a̱tu̱yyu̱ zoz cinne. 8 Ming odoknannu ngati a̱tu̱yyu̱ Manyi Ye̱su̱ niko, emede eene agit do̱o̱k baizi. 9 Kanycik zin naga do̱o̱k Ta̱mu̱ta̱dde̱n zany zo̱ze̱ ci abunna ogonnu ko̱. 10 Kalayya gon Ta̱mu̱ta̱dde̱n tu̱p kaal zi̱nze̱ti̱nne̱ cik a̱wu̱ce̱ kar kaanyyet gool ci ki̱vo̱nnu̱ng abunna ming ke̱de̱me̱zu̱ng ti̱lo̱wi̱nte̱ ci Ta̱mu̱ta̱dde̱no̱ ci a̱zze̱ tu̱we̱nte̱ cunno̱ng ko̱.
Alawek Pa̱u̱lo̱ olli Te̱se̱lo̱ni̱ka̱ Ta̱mu̱ta̱dde̱n
11 Kala Ta̱mu̱ta̱dde̱n wa een Be̱e̱ti̱nna̱ ele ki Manyi Ye̱su̱ kidimannit gool kubunna kar ki̱vi̱ta̱ ki̱vo̱ntu̱ng. 12 Kala bo̱do̱k Manyi Ye̱su̱ kar ka̱a̱nyyu̱ng irezzit e̱le̱tti̱ cuggo̱k ki ol do̱o̱k oroot ki i̱yo̱ko̱ ming kirezzung ko̱. 13 Ma̱i̱je̱ go̱o̱le̱ neci a̱a̱nyyu̱ng Ta̱mu̱ta̱dde̱n elemit ol ko̱, a̱a̱nyyu̱ng atin okomit tu̱we̱nta̱ bu̱k, kar izet ol cik i̱llo̱i̱ rok ba̱ci̱nno̱k ngu̱me̱ ci Ta̱mu̱ta̱dde̱n wa een Be̱e̱ti̱nna̱, ming okko oboda Ye̱su̱ Manyi orkora atin ki ollinne wak a̱li̱le̱ do̱o̱k.