28
Kaal wak ogon Pa̱u̱lo̱ lo̱o̱ce̱ ci een Malta
1 Ma baling ka̱vvu̱tta̱ liil ti̱ti̱ma̱, izetet ol cik abak nginati ne azi zar cik lo̱o̱c neci aburka mama ko̱ ne Malta. 2 Eelawet ol ne̱k da abak nginati ke̱. Ma baling akate ta̱mu̱ itil, alal looci kuc, avaddet ol ne̱ke̱ gwo̱o̱ do̱o̱k ka̱vvu̱tte̱ya̱. 3 Mazing okko Pa̱u̱lo̱ aluta rimma cik kar karik gwo̱o̱, ottowa a̱bu̱re̱zi̱ uwat kiyowa rimmane ne̱ke̱, kar zin kuluccek ele cinne a̱zzi̱t ci Pa̱u̱lo̱. 4 Ma baling icinet ol cik orog neci uwat ming i̱ri̱mze̱ a̱tte̱ ci Pa̱u̱lo̱, izeto e̱le̱tti̱ ne, “U̱ru̱k i̱yo̱ko̱ da e̱e̱ti̱ necu e̱e̱t ci diiri kadak, ming ilit daiz moratoto nu̱nu̱n, ngen daizi anu nonno de.” 5 U̱tu̱ru̱ra̱k Pa̱u̱lo̱ uwat neci gwo̱o̱ ngati adahe nonno. 6 E̱re̱ye̱k abarik nege kar kicinet Pa̱u̱lo̱ ming i̱i̱ve̱ a̱zzi̱ti̱ icima adduk lo̱o̱c kadak. Imma baling e̱re̱yyo̱ u̱u̱mu̱c, iróng acin Pa̱u̱lo̱ ming apirna gi̱i̱ye̱ immani, utuhuwet bo̱do̱k zoz izeto ne, “Een e̱e̱ti̱ necu ta̱mu̱ta̱dde̱n imma bu̱k.”
7 Ojone da manena cik e̱e̱t ci een Pablis, ci een alaan ci orog neci. Atalet agita oroot, bak kaavtiya kizeta erenok ciginnek i̱i̱nya̱ i̱i̱yo̱. 8 Ma̱i̱je̱ i̱i̱nya̱we̱ ne̱ke̱ be̱e̱ti̱ Pablis omor balal ki ve̱rtti̱ ka̱ta̱ngu̱ ca̱a̱to̱. Uk Pa̱u̱lo̱ ngatinne kar zin kuk ka̱ta̱de̱k a̱zzi̱t kalawek Ta̱mu̱ta̱dde̱n, bak acin abarik ize maya. 9 Ma baling uk u̱tu̱gu̱ zoz necu niko, i̱vi̱ta̱ ol balik da omori o̱rge̱ necu ke̱ do̱o̱k, bak aruguz Pa̱u̱lo̱ nogo. 10 Umuccet kaale cik meelek adizkeketa. Ma baling ko̱to̱dda̱ i̱bo̱ orong kar kabaktowa, aanycet kaal cik meelek we̱tu̱.
We̱t ci kovvoya Maltakte ki Rom
11 Ma baling ke̱de̱cca̱ nyolowi i̱i̱yo̱ cik kaavtiya o̱rge̱ neci, kotodda i̱bo̱ ci a̱kku̱ o̱rge̱ ci een Alikzandria. Anyak ri̱ri̱to̱n ci ta̱mu̱ta̱dde̱ne̱t wak e̱e̱ggi̱n cuudenit, een zar cigge̱k Kastar ki Polik. 12 I̱vi̱ta̱ karayya orog imma ci a̱ddi̱ki̱re̱ een Sirakas, kar zin komonnta i̱i̱nya̱ i̱i̱yo̱ nginati. 13 Kar zin nginati kabaktewe zee nginti ka̱ru̱mnya̱ orog ci een Regiyam. Ma o̱te̱ne̱ cu, u̱vu̱wa̱na̱ ngoti ci a̱kku̱ i̱do̱lya̱, ulla zar i̱i̱nya̱ rama niko, ku̱ru̱mta̱ orog ci een Putuli. 14 Kurubta ol u̱gge̱ cik a̱tu̱we̱ kar kalamtet nginati zee komonnta i̱i̱nya̱ turgerem, kar zin ko̱tta̱ ngati een Rom. 15 Mazing ovvo aziye gotonogeta wak a̱tu̱we̱ ki naga wak abak Romakte, i̱vi̱ta̱ urumtet gool meer ngati utene ol kaal een Apiyas, ovvo uggak a̱ru̱me̱ke̱t orog ci azi zar ne ngintik een i̱i̱yo̱ adaine ol. Baling icin Pa̱u̱lo̱ nogo, anyik Ta̱mu̱ta̱dde̱n zany kar zin kokom zinin.
16 Ma baling ku̱zzu̱ca̱wa̱ Rom, aanycik ol Pa̱u̱lo̱ kabak do̱, kar zin kanycik aciirenit imma kebek nonno.
U̱wa̱k Pa̱u̱lo̱ Roma ngati Ebehe aciiri
17 Baling ke̱de̱cca̱ i̱i̱nya̱ i̱i̱yo̱, utu Pa̱u̱lo̱ ddi̱ki̱ri̱yo̱k cik Yo̱u̱do̱ abak nginati kar ki̱vi̱ta̱ ki̱ro̱ni̱t bu̱k. Ma baling u̱lu̱tte̱, izek Pa̱u̱lo̱ nogo ne, “Gotonogga, ma i̱yo̱ko̱ ming ngen ku̱tu̱gu̱we̱k gi̱i̱ ci gerze ol waga̱c icima keerani balik karubak ji̱ji̱ti̱ga̱c ke̱ nu̱nu̱n, ke̱ce̱bje̱ ba̱li̱ye̱ Jerusalema kar zin kanyozik o̱lle̱ Romi kecebta icima ku̱ru̱kta̱ abarik kadau. 18 I̱jji̱nta̱ olli Romi zoz ci da gerze ku̱tu̱gu̱ kar wette ke̱le̱zo̱wa̱ ki daiz, ma baling umudda i̱llo̱i̱ gi̱i̱ imma niko, orongit koogtawan. 19 Ma baling uburet Yo̱u̱di̱ ooganet cinanni, koronga zin zoz cinanni kar ki̱ki̱ya̱ kozoz Kesar, ming a̱zze̱ rok annit lo̱ki̱ko̱ ci kabilne ol wagannik. 20 Zoz zin ci korongi ku̱du̱wa̱u̱ng ko̱ nenne. Ma̱i̱je̱ i̱yo̱ko̱ ming ke̱ce̱bje̱ ko̱, ke̱ce̱bje̱ zo̱ze̱ ci Ye̱su̱ bali arik ol wak Israilo do̱o̱k zi̱nze̱ti̱ een ti̱ri̱zo̱i̱t ci ollu.”
21 Izetek nonno ne, “Ngen waraganya uggak cik ozoz zoz ci obod ki i̱nne̱t ki̱vi̱ta̱i̱t Ju̱de̱ya̱kte̱, i̱llo̱i̱ rok gotonet imma ci anyaha kaviyak u̱gge̱ icima okko a̱du̱wa̱ gi̱i̱ imma ci gerze ki i̱nne̱ta̱. 22 Abarik zin i̱yo̱ko̱ korongnya kar kizikta ba̱ba̱ni̱ne̱t cunne ko̱, ngiwa ka̱gga̱ya̱ ming ozoz ol zoz ci gerze lo̱o̱co̱k do̱o̱k obod ki ol wak a̱tu̱ Ye̱su̱.”
23 Ozoza wazin ci kar ku̱ru̱mto̱i̱ ki Pa̱u̱lo̱, ma̱i̱je̱ ol cik meelek i̱vo̱ni̱t Pa̱u̱lo̱ ngiwa bali aave. U̱du̱wa̱k nogo gool ci ba̱a̱li̱ne̱t ci Ta̱mu̱ta̱dde̱no̱ ol kar zin kerecanek zoz necu ju̱rru̱m nginti nge̱rre̱ti̱nu̱ tu̱u̱p kize ba̱li̱n. Itiman enne nogo kar kiziyet zoz ci a̱du̱wa̱k nogo ko̱ ngati a̱a̱dda̱ ke̱ kaal wak e̱he̱rye̱ lo̱ti̱nno̱we̱ wak Musesi ki a̱ri̱tto̱k wak zoz ci Ta̱mu̱ta̱dde̱no̱ obod ki Ye̱su̱. 24 Iziyet uggak zoz cinne een de̱de̱, imma uggak iróng elemna. 25 Adangtto zin izong, ma baling ngen nege kot, iizek zin Pa̱u̱lo̱ nogo ne, “Anyik Vongizi ci A̱li̱le̱ a̱ri̱to̱i̱t wa zoz ci Ta̱mu̱ta̱dde̱no̱ wa een Izaya ku̱du̱wa̱k ji̱ji̱ti̱go̱k kiizek ne! 26 ‘Bit izek ol ne̱ko̱ ne, aziknu atin kaal iine bak acinu eberene bu̱k, iróng zin ungeti cik zoz neci a̱gga̱yyu̱ bu̱k. 27 Ma̱rri̱t ol ne̱ko̱ a̱ba̱nne̱ zi̱nze̱ti̱ kar zin bo̱do̱k ki̱di̱tte̱ iina. Ma̱i̱je̱ uggak, acine eberene, azikne iina ki̱tto̱ zoz zi̱nze̱ti̱ ju̱rru̱m, ukce atin obodaka de, ming azi Ta̱mu̱ta̱dde̱n, kar zin kuruguz nogo.”’
28 Ma̱i̱je̱ bali vu̱rrta̱, izek Pa̱u̱lo̱ nogo ne, “Abunna zin ming a̱gga̱yyu̱ ming i̱tto̱ni̱k Ta̱mu̱ta̱dde̱n ruget ol wak iróng een Yo̱u̱d, ngiwa atin azikne zoz neci nege.” 29 Ma baling ot iziyet zozok ne̱ko̱, itingazzo Yo̱u̱di̱ ota. Bak ovvo adango zo̱ze̱ necu oroot.