27
Inyamanit aciiri Pa̱u̱lo̱ i̱bo̱wa̱ kuk o̱rgre̱ ci Romi
1 Ma baling i̱tto̱ne̱t alaani Vestosi, ko̱tta̱ lo̱o̱ce̱ ci Italiya i̱bo̱wa̱, aanycik Pa̱u̱lo̱ ki ol u̱gge̱ wak E̱ce̱bje̱ ko̱, e̱e̱t ci een Juliyas. “Een e̱e̱ti̱ necu ddi̱ki̱ryo̱i̱t ci aciir wak alaan wa Romi.” 2 Ko̱to̱dda̱ i̱bo̱ ngati een Adramitam, i̱bo̱ ci da orong kuk o̱ro̱gjo̱we̱ cik aavtte liil ti̱ti̱ma̱ o̱ro̱gjo̱k cik ol cik een Asiya. Korkorya zin ki e̱e̱t ci een Aristakas lo̱o̱ce̱ ci Masadonia abak o̱rge̱ ci een Te̱se̱lo̱ni̱ka̱. 3 Ma i̱i̱te̱n cu ku̱zzu̱ca̱wa̱ orog ci azi zar ne Sidon. Ma̱i̱je̱ Juliyasi ubunna ngati Pa̱u̱lo̱ oroot, anyik kuk ki̱vo̱n gonoggi kar kanycik kaal cik da we̱ta̱k orong enne. 4 Mazing kedecceka, u̱vu̱wa̱n ngoti ci alam i̱bo̱ we̱ta̱, kederrekteya we̱t je̱e̱na̱ o̱to̱ne̱ ci maye ngoti okko ki nginti aburka mama een Saiporos. 5 Kabaizza liil ki lo̱o̱co̱k cik een Cilicia ki Pamvilia, kar ko̱tta̱ o̱rge̱ wa een Mira aave lo̱o̱ce̱ ci een Lasiya. 6 Ma nginati uruba Juliyasi i̱bo̱ ci a̱kku̱ Alikzandria okko abakze okko ki Italiya. Kar zin ko̱to̱ddi̱t i̱bo̱ neci.
7 Kabaizza e̱le̱tti̱ idicilim i̱i̱nya̱ cik arabane go̱o̱le̱ ci okkomi oroot, ku̱zzu̱ca̱wa̱ orog ci een Cindis. Baling alamet ngooti go̱o̱le̱ ci kovvoya, kidirta zin Kirit o̱to̱ne̱ ci je̱e̱ni̱ nginti een zara Salmon kar zin ku̱lu̱cca̱ Kirit o̱to̱ne̱ i̱do̱li̱yo̱, lo̱o̱c ci aburuk maama. 8 Atarganyan ngoti i̱bo̱ u̱u̱mu̱c bak kedenyana Nginti Abunna ci maye ngoti aave nyagule ci iróng reeni ngati een Laseya.
9 Ma baling ize meele i̱i̱nya̱ cik komonna, i̱ki̱ya̱ lolo ci gerze iróng ol ngen abakzine li̱i̱lo̱we̱ kar zin bo̱do̱k i̱i̱nya̱ wak i̱ya̱wi̱nto̱ Yo̱u̱di̱ ozoroca. I̱ti̱lo̱ zin Pa̱u̱lo̱ nogo izek ne, 10 “Logoze, kacinni zee uk atin bakzinet cinna ngatu ko̱ oowa ize gerza. Egerzane atin kaala cik meelek ki i̱bo̱ bu̱k, rok wo̱ye̱ ol bu̱k adai.” 11 Izik da ddi̱ki̱ri̱yo̱i̱ti̱ ci aciiru ko̱ zoz ci a̱du̱wa̱k e̱e̱ti̱ ci a̱ddi̱ki̱re̱ i̱ba̱ ki manyi i̱bo̱, iróng een zoz ci a̱du̱wa̱k Pa̱u̱lo̱ ko̱. 12 Iróng nyagule ci li̱i̱lu̱ een nyagule ci agano ming kaavtte tagiza. Meele ol cik azi ne ko̱ de ming gerza we̱t liila go̱o̱le̱ necu nu̱nu̱n, kar katahacit ku̱zzu̱ca̱ nyagule ci li̱i̱lu̱ een Viniks. Ming aave i̱i̱ ci kettede viyo to. Een neci nyagule ci li̱i̱lu̱ ngati een Kirit ci edevo ki i̱do̱lye̱-nyiga ki i̱do̱-ngi̱ja̱, nginti wo̱ye̱ agano ming omonne tagiza nenne.
I̱lo̱li̱ ci a̱vu̱a̱n Ippang ci mamu
13 Akate ngoti imma cidici u̱vu̱wa̱na̱a̱ o̱to̱ne̱ ci i̱do̱lyo̱, ma̱i̱je̱ ol wak a̱li̱ngli̱ng i̱bo̱wa̱ izeto ne kar kotozo. Odongta zin i̱bo̱le̱ni̱t bali abiliz i̱bo̱ ke̱ ta̱dde̱n, kar zin kabaizza zee kize ojon ti̱ti̱m ci liilu ngati een Kirit. 14 Imma ataman niko, u̱vu̱wa̱na̱ i̱lo̱li̱ ci azi zar ne “I̱do̱ ngati okko ki je̱e̱n.” 15 Ovvoc i̱bo̱, ma baling okom ngati irinyonika ngot, utungta kanyciya ngot ki̱tti̱k. 16 Kumuddawa nginti kabilna baling kozoroyya i̱do̱lye̱ ci nginti aburuk mama azi ne Kauda. Imma go̱o̱le̱ ci okkomi kak, ullta nginti kecebyya i̱bo̱ cidici ngati gononi ka̱vvu̱ labak ju̱rru̱m. 17 U̱tu̱gu̱rta̱ i̱bo̱ ta̱dde̱n kar zin ku̱lu̱cce̱k baru i̱bo̱ wanai a̱ddi̱ki̱re̱ ke̱, kokom ne kak. O̱ngo̱o̱le̱ bali nege lo̱o̱c azi ne obboc wo̱ye̱ a̱tti̱ke̱t ngoti zee rok liil ti̱ti̱m wa een azzac lo̱o̱ce̱ ci een Sitis. Unyumet ru̱u̱m ci gon a̱ṯi̱ṯe̱ abu ngoti kotowe i̱bo̱ ko̱, kar zin aanycik ngot ki̱tti̱k i̱bo̱ kuwe ngati ette orong enne kuwe. 18 U̱vu̱wa̱n i̱lo̱li̱ zee, bali nge̱rre̱ti̱n cu, okolttek i̱jjo̱ wak i̱ba̱ moroto. 19 Imma wazin ci o̱de̱ ke̱, u̱ju̱kte̱k kaal u̱gge̱ wak anyik i̱bo̱ koto moroto. 20 Iróng ngen kacinna i̱i̱ rok munyuny i̱i̱nya̱ cik meelek giir, ma̱i̱je̱ enne ngoti abarik o̱to̱rye̱ a̱vu̱wa̱n de. Ma bali vu̱rrta̱, kizeta ne, i̱zzi̱ rugeti to.
21 Ma baling a̱ta̱gu̱zo̱ ol magizet i̱i̱nya̱ cik meelek, ibil Pa̱u̱lo̱ je̱e̱na̱ kar zin kize ne, “Logoz, ming iziktang, iróng we̱da̱ Kirita abakzanu i̱bo̱. Kilitait nginti a̱ju̱ke̱ne̱ kaala zee bak amurya iyok uggak ko̱. 22 Ma̱i̱je̱ zin i̱yo̱ko̱, ka̱nne̱ku̱ng ne aanycik zi̱nze̱ti̱ kokomit kak, i̱llo̱i̱ adic imma ci adai ngatinno̱ng udut. A̱li̱be̱ atidic i̱bo̱ do̱ niko. 23 Ka̱gga̱ ri̱t niko ngin bali be̱le̱ja̱ a̱kku̱na̱ka̱ anjilo ci Ta̱mu̱ta̱dde̱no̱ wa kala gon, 24 kar zin izeya ne, ‘Ma o̱ngo̱o̱le̱ lo̱o̱c Pa̱u̱lo̱! Okko la̱du̱n zee bit bil timan lo̱ki̱ko̱ ngume ci Kesari, ma̱i̱je̱ bo̱do̱k Ta̱mu̱ta̱dde̱n bunnate wainne ize ne, aruge atidic ol ne̱k abakzinu i̱bo̱wa̱ ko̱ do̱o̱k.’ 25 I̱yo̱ko̱ zin logoze, aanycik zi̱nze̱ti̱ kokomit. Ka̱gga̱ Ta̱mu̱ta̱dde̱n niko ming ogon atidic zoz neci ki wanai ming a̱du̱ya̱i̱ ke̱. 26 A̱tti̱ke̱t zin atidic ngoti zee rok ti̱ti̱m ci nginti aburka mama.”
27 Imma ja̱ti̱n ci izeto ja̱ti̱no̱wa̱ omoto ki we̱c ko̱, ngen i̱lo̱li̱ a̱tti̱ke̱t ippange ci liil wa a̱ddi̱ki̱re̱ een zara Adriyatik de niko. Ma ngati okko ki ba̱li̱n keng, i̱no̱ni̱t ol balik a̱li̱ngli̱ng i̱bo̱wa̱ ke̱ izeto ne kijongozit nginti ogon ki looci ci aave liil orgena. 28 I̱ya̱bi̱t zin u̱u̱nze̱t ci moru ngati okoleke baruc ci e̱ri̱mze̱ne̱ i̱bo̱le̱nti̱ ci a̱di̱ngdi̱nge̱. Amuda caazok ming een u̱u̱nze̱ta̱ obon co̱de̱ ki moten ram (120) ngen da aavtte buluc orgena. Mazing ovvo bo̱do̱k nginti dici i̱ya̱b, umudda caazok izeto moten torkoc (90) a̱vvu̱to̱ ngati dholoi . 29 O̱ngo̱o̱le̱ ba̱li̱ye̱ nege zoz ci azi ne obboc atidic i̱bo̱ bali kabazia ke̱ ovvocek ngoti bee, u̱ju̱kte̱k kaal cik a̱di̱ngdi̱nge̱ ki biyena een we̱c kar zin kecebtozik i̱bo̱ abunna ming abile moroto kar zin kalac Ta̱mu̱ta̱dde̱n kaala looci. 30 Ma̱i̱je̱ ol wak a̱li̱ngli̱ng i̱bo̱wa̱ orong a̱vi̱ri̱. Idimta i̱bo̱ ci dici i̱ri̱mze̱ ngati goni ci a̱ddi̱ki̱re̱ ke̱, u̱ju̱kte̱k moroto, kar zin kalabta ol ngati otode i̱bo̱ izetek ne ovvo nege adiman gi̱i̱ imma ci a̱di̱ngdi̱nge̱ abiliz i̱bo̱ oowa. 31 Iizek Pa̱u̱lo̱ ddi̱ki̱ri̱yo̱i̱t ci aciiru ki aciir ciginnek ne, “Ming iróng ol ne̱ko̱ aavtte i̱bo̱wa̱, iróng adic niga a̱ru̱gnnu̱, ot labak rok liil ti̱ti̱m.” 32 Kar zin aciiri ettedit baru wak i̱bo̱ wanai orong nege a̱vi̱re̱ ke̱ ki̱tta̱k moro kar zin kanycik katavane kuk liilato.
33 Ma baling orong aaliz looci. Iizek Pa̱u̱lo̱ nogo ne, “E̱re̱yo̱ magizet zee kize wazin necu i̱i̱nya̱ omoto ki we̱c, ngen adait rok gi̱i̱ imma bu̱k. 34 Kilalekung zin i̱yo̱ko̱, ka̱nne̱ku̱ng ne, “Adait gi̱i̱ imma, orongnyu da̱i̱ne̱t kar uruget. I̱llo̱i̱ atin gi̱i̱ ci adakung udut.” 35 Ma baling ize Pa̱u̱lo̱ niko, idima umune kar zin kanyik Ta̱mu̱ta̱dde̱n zany, ngati alawine kiziyet nege do̱o̱k, ubunyan imma, kar zin kakate kadaho. 36 Ma baling u̱tu̱gu̱ niko, okomit zin nogo do̱o̱k zi̱nze̱ti̱, a̱da̱k gon ngengene ngatinne̱ng á̱há̱t imma. 37 Ke̱e̱gi̱na̱ bali do̱o̱k ngati katubena i̱bo̱wa̱ obet rama ki moten turgerem ki torkonom (276). 38 Ma baling adakto ol do̱o̱k ke̱le̱zo̱ ki da̱i̱ne̱t, u̱ju̱kte̱k labi cik ogon ki nga̱li̱ca̱ moro abunna ming ovolvoli i̱bo̱.
I̱li̱b I̱lo̱li̱ i̱bo̱ kazane tadda
39 Ma baling ala nge̱rre̱ti̱ni̱, iróng ol wak a̱li̱ngli̱ng i̱bo̱wa̱ a̱gga̱ liil ti̱ti̱m ci abilnne i̱bo̱ ko̱, kar zin abarik kedenyca nyagule ci moru anyak azzac, kar zin kodoltta kizeto ne, wette ming kuul i̱bo̱ kuk rok ngin neci, kanyik wette kabaize zee kuk ku̱tu̱vu̱v azzace neci, kar kibil ngati okko ki ti̱ti̱m. 40 Ettedit zin kaal wak a̱di̱ngdi̱nge̱ i̱ri̱mze̱ i̱bo̱wa̱ ke̱ ki̱ta̱za̱k moro, kar zin bo̱do̱k koogta baru wak eceb keet wa a̱ddi̱ki̱re̱ aave i̱bo̱wa̱ kar kabaize ol i̱bo̱ ko̱. Odongit zin ru̱u̱m ci a̱ddi̱ki̱re̱ a̱li̱te̱ aave i̱bo̱ ta̱dde̱na̱ kar ku̱vu̱wa̱n ngoti i̱bo̱ kuk ti̱ti̱ma̱. 41 Imma i̱bo̱ u̱gu̱ma̱n azzac ci da alute moro ngati okko ki ti̱ti̱m. A̱gga̱m azzac i̱bo̱ oo kodok kak, ma̱i̱je̱ vu̱rru̱t ci i̱bo̱wo̱ u̱du̱le̱t mama wak appalpalan i̱lo̱li̱ ke̱ koyokyowe.
42 I̱no̱ni̱t aciiri zoz ci kar ku̱ru̱kte̱ ol wak E̱ce̱bje̱ ke̱ kadaito gerza ming a̱du̱nye̱ imma ki̱vi̱r kuk ti̱ti̱ma̱. 43 Imma ddi̱ki̱ri̱yo̱i̱ti̱ wa aciiru eela Pa̱u̱lo̱ ru̱we̱nta̱ eci enne elemi nonno oroot, kar zin kalam nogo ngati orong a̱ru̱we̱ ol ne̱ke̱. Abarik zin ddi̱ki̱ri̱yo̱i̱ti̱ anyik ol wak a̱gga̱ du̱nye̱ne̱t kingoztozik moroto oowa kar ku̱du̱nyce̱ kot ti̱ti̱ma̱. 44 Anuwe atin bo̱do̱k uggak vu̱rrta̱, ngati a̱gga̱me̱ keen balik a̱du̱la̱i̱ i̱bo̱wa̱ ke̱. Gool zin bali kazucana naga do̱o̱k ti̱ti̱m ko̱ nenne necu.