18
Ovolonge Judasi Ye̱su̱ ka̱gga̱me̱ kar zin kecebe
(Ma̱te̱yo̱ 26:47-56; Marko 14:43-50; Lu̱ka̱ 22:47-53)
1 Baling edeca Ye̱su̱ lawinet itingazzo zin ki nuyak kar kettedit tolol ci een Kidron oot ti̱ti̱me̱ ci goola. Aave da̱ moro cidici nginati, anyak keen cik i̱ngi̱ro̱u̱ o̱to̱ne̱ co̱de̱ ke̱; kar zin enne ki nuyak ki̱to̱zo̱ ngin neci.
2 A̱gga̱ zin da̱ Judasi bali okko ovolonge nonno ko̱ ngin neci ma̱rri̱t da̱ gon ming arumo Ye̱su̱ ki nuyak waginnek nginati. 3 Odola Judasi ngati adawane Ye̱su̱, i̱vi̱ta̱ zin ki aciir cik Romi ki ddi̱ki̱ryyo̱k cik i̱tto̱na̱ alaata wak wawaco ki olli Varacisi. Anyak da̱ ol ne̱ke̱ urezwa ki ilanya ki i̱jjo̱ cik jo̱o̱ra̱k.
4 Baling a̱gga̱ Ye̱su̱ kaal cik ovvo i̱nna̱k nonno ke̱ do̱o̱k, iyok uk u̱ru̱me̱k nogo re̱e̱nu̱n kar zin ki̱jji̱n kizek ne, “Ngene dim ette ci orongnyu niga ko̱?”
5 O̱bo̱dde̱k nege nonno izettek ne, “Korongnya Ye̱su̱ wa orog wa een Nazeret.”
O̱bo̱de̱k zin Ye̱su̱ nogo bo̱do̱k izek ne, “Annit nenen icu, Ye̱su̱ wa orog neci een Nazeret ke̱.” Abile enne Judasi bali okko ovolonge nonno ke̱ ki nogo nginati niko. 6 Baling ize Ye̱su̱ ne, “Annit nenen icu.” I̱me̱rte̱ ki vu̱rru̱t kar zin ku̱yu̱gte̱.
7 I̱jji̱n bo̱do̱k Ye̱su̱ nogo de, izek ne, “Orongnyu dim i̱ye̱ niga ngene?”
O̱bo̱dde̱k bo̱do̱k nege nonno izettek ne, “Korongnya Ye̱su̱ wa orog wa een Nazeret.”
8 Izek Ye̱su̱ nogo ne “Ma wanai ming ku̱du̱wa̱u̱ng kizeung ne, annit nenen icu. Ming orongnyang annit, aanycik zin ol ciko koot.” 9 I̱nna̱ zin zoz cu ovvo ol ne̱ko̱ a̱gga̱me̱ Ye̱su̱ ko̱ kar zoz bali a̱du̱wa̱ enne ke̱ kakat mo̱o̱le̱t. Ize zin enne ne, “Ngen zin kokoloz olle balik aanya ke̱ imma, Baba.”
10 Uvuca zin Si̱mo̱ne̱ Peturu nya̱tu̱ba̱t ci da̱ anyak nyakuraru kar zin ketteda itat ci a̱zzo̱, ci e̱e̱t wa a̱li̱ngli̱ng ki alaan wa a̱ddi̱ki̱re̱ wawaco. (Een da̱ zara cik du̱ca̱i̱t neci ne Malkos).
11 Izek Ye̱su̱ Peturu ne, “Bilo, bodek nya̱tu̱ba̱t necunne ko̱! Azi bong i̱nna̱ ne ko̱ngo̱o̱le̱ i̱yo̱ko̱ anna pirnanet ci aanya Baba kar kuk kipira ko̱?”
O̱o̱tte̱ ol Ye̱su̱ ngati e̱e̱t ci een Annas
(Ma̱te̱yo̱ 26:57-58; Marko 14:53-54; Lu̱ka̱ 22:54)
12 Ecebbit zin aciiri ki ddi̱ki̱ryyo̱k wagge̱k ki lo̱ddi̱ki̱re̱ wak Yo̱u̱do̱ Ye̱su̱. 13 Anyakttak arrak e̱e̱t ci een Annas, i̱nyi̱k ci e̱e̱t ci een Kaipas. Een da̱ enne Kaipasi alaan wa a̱ddi̱ki̱re̱ wawaco e̱rki̱t neci. 14 Nonno nenen ci i̱lo̱t ol ne̱k e̱e̱ggi̱n Yo̱u̱d ke̱, a̱nne̱k ne, “Abunna abarik ming a̱da̱i̱ e̱e̱ti̱ co̱de̱ olle wak e̱e̱ggi̱n Yo̱u̱d kar kuruget ol do̱o̱k.”
Amikzene Peturu Ye̱su̱
(Ma̱te̱yo̱ 26:69-70; Marko 14:66-68; Lu̱ka̱ 22:55-57)
15 Annu da̱ Si̱mo̱ne̱ Peturu ki nuyait imma Ye̱su̱. Ma̱rri̱t baling a̱gga̱ alaani wa a̱ddi̱ki̱re̱ wawaco nuyait neci, i̱tto̱ enne re̱e̱nu̱n ci alaano, 16 ma̱i̱je̱ Peturu erewo tatuga eci re̱e̱nu̱no̱. Uk nuyaiti neci a̱gga̱ alaan wa a̱ddi̱ki̱re̱ wawaco ke̱ oboda, kar zin kozozik do̱le̱c ci da̱ a̱li̱ngli̱ng wazin neci, kar zin Peturu ki̱tto̱.
17 I̱jji̱n zin do̱le̱c neci tatuga ke̱ Peturu, izek ne, “Iróng i̱nna̱ e̱e̱ni̱ nuyait imma ci ol wak edemez Ye̱su̱ ko̱?” Obodehe Peturu nonno izek ne, “A̱zze̱ to, ka̱mi̱ri̱.”
18 Alali da̱ looci ba̱a̱li̱n neci oroot. Avadit da̱ to̱ni̱a̱ha̱ ki ol cik a̱li̱ngli̱ng nginati gwo̱o̱ kar zin ka̱vvu̱tte̱k. Avik Peturu gwo̱o̱ neci bu̱k.
I̱jji̱n alaani ci a̱ddi̱ki̱re̱ wawaco Ye̱su̱
(Ma̱te̱yo̱ 26:59-66; Marko 14:55-64; Lu̱ka̱ 22:66-71)
19 I̱jji̱n zin alaani wa a̱ddi̱ki̱re̱ wawaco ko̱ Ye̱su̱ kaal cik obod ki nuyak cik edemez enne ko̱ ki kaal cik obod ki de̱mzi̱ne̱t cinne. 20 Obodehe Ye̱su̱ nonno izek ne, “Kozozi gon zoz cinanni kiziyet ol do̱o̱k i̱i̱wa̱ labak, kar zin gon kedemez ol Ce̱e̱ze̱ wa Ta̱mu̱ta̱dde̱no̱ ki Ce̱e̱zi̱ne̱ wak Lawinto wak gon alutene olli Yo̱u̱do̱ nga̱to̱de̱. A̱zze̱ zoz ci ka̱du̱wa̱ lo̱mu̱k to. 21 A̱jji̱nna̱ i̱ye̱ annit a̱jji̱na̱ka̱ nya? Ji̱n ol ne̱k gon Aziknna annit ming kedemze, a̱gga̱ ri̱t nege zoz ci ku̱du̱wa̱.”
22 Baling u̱du̱wa̱ Ye̱su̱ zoz necu, appan e̱e̱ti̱ imma ci ojongzo ki Ye̱su̱ nonno ngu̱m elya, kar zin ku̱cu̱b kizek ne, “Gool ci ozozike i̱nna̱ alaan wa a̱ddi̱ki̱re̱ wawaco necu?”
23 Obodehe Ye̱su̱ nonno izek ne, “Ming ku̱du̱wa̱ ette zoz ci gerze, du̱wa̱ da̱ zoz neci, mazing ku̱du̱wa̱ zoz ci zong een de̱de̱, appana zin gaganiko nya?”
24 I̱tto̱ni̱k zin bo̱do̱k e̱e̱ti̱ ci een Annas Ye̱su̱ kuk ngati ngen ecebine niko kuk ngati alaan wa a̱ddi̱ki̱re̱ wawaco Kaipasi.
Imigoi bo̱do̱k Peturu Ye̱su̱ kize lak i̱i̱yo̱
(Ma̱te̱yo̱ 26:71-75; Marko 14:69-72; Lu̱ka̱ 22:58-62)
25 Baling ngen Si̱mo̱ne̱ Peturu avik gwo̱o̱, i̱jji̱n bo̱do̱k e̱e̱ti̱ imma nonno, izek ne, “Iróng i̱ye̱ i̱nna̱ bu̱k e̱e̱ni̱ nuyait imma olle wak gon edemez enne ko̱?”
Imma Peturu ize ne, “Ka̱mi̱ri̱.”
26 Een da̱ du̱ca̱i̱ti̱ ci alaan wa a̱ddi̱ki̱re̱ wawaco Kaipas ke̱ bo̱ri̱t ci e̱e̱t bali etteda Peturu itat ke̱, adangek nonno zoz de, izek ne, “Iróng i̱ye̱ ba̱li̱ye̱ anna kicini i̱nne̱t ming orkoryyu ki Ye̱su̱ aratawe ci i̱ngi̱ro̱u̱?” 27 Imigoi bo̱do̱k Peturu de, ma̱i̱je̱ tuulici ogowa.
Ibil Ye̱su̱ lo̱ki̱ko̱ ngati alaan ci een Pilato
28 Inyamanit zin ol cik e̱e̱ggi̱n Yo̱u̱d Ye̱su̱ ce̱e̱ze̱ ci Kaipasi o̱o̱tte̱ ngati alaan imma ci ol cik e̱e̱ggi̱n Rom. Aala da̱ looci, kar zin ol cik e̱e̱ggi̱n Yo̱u̱d iróng orong ku̱tu̱le̱t e̱le̱tti̱ ngati i̱zo̱we̱ orog ci e̱e̱t neci. Orong da̱ nege kar kadait Kwo̱o̱r wa Va̱rda̱ngi̱nto̱. 29 Iyowak zin Pilato nogo reena, kar zin kizek ne, “Abac ette e̱e̱ti̱ cu zoz ci azi ne?”
30 O̱bo̱dde̱k zin nege Pilato izettek ne, “Wo̱ye̱ ette ming iróng e̱e̱ti̱ cu een mu̱ju̱l, iróng wo̱ye̱ kanyahakin.”
31 Izek Pilato ne, “O̱o̱tte̱ kar oot ettedek ba̱ci̱ cinne go̱o̱le̱ ci lo̱ti̱nno̱k waggo̱k e̱le̱tti̱ne̱.” O̱bo̱dde̱k ol ne̱k e̱e̱ggi̱n Yo̱u̱d ke̱ nonno izettek ne, “Iróng naga kanyaka komiz ci wo̱ye̱ kettedika e̱e̱t imma daiz.”
32 I̱nna̱ zoz necu ki i̱yo̱ko̱ kar ki̱ye̱la̱i̱ zoz wa ozoze Ye̱su̱ gool ci okko enne a̱da̱kne̱.
33 I̱tto̱ zin Pilato ce̱e̱z to, kar zin kutu Ye̱su̱ bu̱k kuk ki̱jji̱n kizek ne, “E̱e̱ni̱ i̱nna̱ de̱de̱ alaan ci Yo̱u̱do̱?”
34 I̱jji̱n bo̱do̱k Ye̱su̱ nonno izek ne, “A̱kku̱ zoz cu zinine cunne yo, icima u̱du̱kta̱i̱ da̱ ette ol uggak zoz ci obod ki annita?”
35 O̱bo̱de̱k zin Pilato nonno, izek ne, “Iróng anna ke̱e̱ni̱ Yo̱u̱de̱ni̱t? Ol wagunnek e̱le̱tti̱ ki alaat wak wawaco cik anyahanni i̱nne̱t rok annita. Abacu ette i̱nna̱ zoz ci azi ne?”
36 Izek zin Ye̱su̱ Pilato ne, “Iróng alaanzet cinanni een ci lo̱o̱c cu, wo̱ye̱ ette ming kize anna alaan ci lo̱o̱tu̱, oortto wo̱ye̱ ette du̱cca̱ha̱ cigannik ki ol balik e̱e̱ggi̱n Yo̱u̱d a̱gga̱mnyya̱ annit ke̱. Imma zin i̱yo̱ko̱ iróng alaanzet cinanni een ci lo̱o̱c cu.”
37 Izek Pilato nonno ne, “E̱e̱ni̱ zin ette i̱nna̱ alaan?”
Obodehe zin Ye̱su̱ nonno izek ne, “Ilemi i̱nna̱ ming azi ne ke̱e̱ni̱ anna alaan. Ka̱ri̱ta̱i̱ zin ba̱li̱ye̱ anna zo̱ze̱ ci kar zin ki̱ki̱ya̱k lo̱o̱c kar abunna ming kokko ki̱ye̱le̱i̱ ol zoz wa een de̱de̱. Aziknna zin ol do̱o̱k wak a̱gga̱ zoz wa een de̱de̱.”
38 I̱jji̱n zin Pilato Ye̱su̱, izek ne, “Nya ci een de̱de̱?” Kar zin kiyok kuk reena ngati aavtte ol cik Yo̱u̱do̱ ke̱, kar zin kize ne, “Kamuda i̱llo̱i̱ gi̱i̱ imma ci abaci e̱e̱ti̱ cu kar kettedek nonno lo̱ki̱ko̱.”
Ettedek ol Ye̱su̱ daiz
(Ma̱te̱yo̱ 27:15-31; Marko 15:6-20; Lu̱ka̱ 23:13-25)
39 “Azi zin keer cinno̱ng ne abunna ming koogakkung e̱e̱t co̱de̱ olle ne̱k e̱ce̱bje̱ ke̱, ming adakku Kwo̱o̱r wa Va̱rda̱ngi̱nto̱. Orongnyang koogaung ‘alaan wanno̱ng olli Yo̱u̱do̱’?”
40 Egerenyit izeto ne, “A̱zze̱to̱, ma oogakket nonno! Oogaet abarik Barabas!” E̱ce̱bje̱ da̱ e̱e̱ti̱ neci een Barabas ke̱ ngati aburnnek gaala nong kar ki̱tto̱ zari.