8
Zoz ci ngaa ci orooto ki macuwa
1 Baling engerto enne ki ol, uk zin Ye̱su̱ Biye ci I̱ngi̱ro̱u̱. 2 Obodak bo̱do̱k zin enne re̱e̱nu̱n ci Ce̱e̱z wa Ta̱mu̱ta̱dde̱no̱ nge̱rre̱t ingani ri̱ri̱wo̱na̱; i̱vi̱ta̱k zin ol nonno, a̱vvu̱ zin lo̱o̱ta̱ kar kedemez nogo. 3 Anyakttak zin de̱me̱zo̱wa̱ wak lo̱ti̱nno̱u̱ ki Varacis nonno ngaa ci a̱gga̱m ol orooto ki e̱e̱t imma, kar zin kaarttek ngaa neci orgen. 4 Izettek zin Ye̱su̱ ne, “De̱me̱zo̱i̱t, ka̱gga̱mnya̱ ngaa cu ngati orooto ki e̱e̱t imma. 5 Azi lo̱ti̱nno̱wa̱ wak Musesi ne ngaa ci ogon ki i̱yo̱ko̱ ovvoccit biyene ka̱da̱k. Azi wo̱ye̱ i̱nna̱ ne zo̱ze̱ necu?” 6 A̱jji̱n nege Ye̱su̱ orong ku̱mu̱dda̱ volong, abunna ming ovvo ovolonge nonno.
Abarik Ye̱su̱ u̱lu̱le̱ kar keteher lo̱o̱c valakta. 7 Baling ngen nege acub Ye̱su̱ niko, itinga zin enne ibil je̱e̱na̱, kar kizek nogo ne, “Ming anyak e̱e̱t imma ngatinno̱ng ci iróng anyak mu̱nye̱n, anyik nonno kidima bee oowa kar kovvoc ngaa necu.” 8 Kar zin bo̱do̱k enne ku̱lu̱le̱ keteher lo̱o̱c.
9 Abarik baling iziyyet ol zoz ci a̱du̱wa̱ Ye̱su̱ niko, azantte zin nege e̱co̱de̱, e̱co̱de̱, uwante ma̱ti̱yo̱ oowa, bak alungane nege do̱o̱k ne lai, utungtek Ye̱su̱ do̱ lo̱o̱c ki ngaa neci ming ngen abile nginati.
10 Itinga Ye̱su̱ je̱e̱na̱, kar zin ki̱jji̱n ngaa neci kize ne, “Ti̱na̱t, i̱go̱k zin ol veelek? I̱zzi̱ rok e̱e̱t imma ci etted zoz cunne?”
11 O̱bo̱de̱k ngaa neci Ye̱su̱, a̱nne̱k ne, “I̱llo̱i̱ e̱e̱t imma Manyi.”
O̱bo̱de̱k zin Ye̱su̱ nonno, ize ne, “Iróng anna kettedi zoz cunne, i̱yo̱ko̱ bit labak, tungek baiz ci mu̱nye̱nu̱ ko̱ lo̱o̱c.”
Ye̱su̱ ci een vooriten ci lo̱o̱cu̱
12 Ozozik bo̱do̱k Ye̱su̱ nogo, a̱nne̱k ne, “Ke̱e̱ni̱ anna tukuloc ci lo̱o̱cu̱. Imma ming annuya e̱e̱ti̱ iróng atin owo ngati mu̱hu̱ri̱, abarik atin enne anyak tukuloc ci rugeto.”
13 Ovoccek zin olli Varacis nonno zoz ci azi ne, “I̱yo̱ko̱, u̱du̱wa̱ i̱nna̱ kaal cik obod ki ele cunne do̱, iróng zoz ci a̱du̱wa̱ i̱nna̱ ko̱ een de̱de̱.”
14 O̱bo̱de̱k Ye̱su̱ nogo, a̱nne̱k ne, “Ming nu̱nu̱n kozozi zoz ci obod ki ele cinanni do̱, een zoz neci de̱de̱, eci ka̱gga̱ nginti ka̱kku̱ne̱ ki ci kokkoye. Ma abarik niga iróng a̱gga̱yyu̱ nginti ka̱kku̱ne̱ anna icima nginti kokkoye. 15 Etteddu niga zoz go̱o̱le̱ ci acine e̱e̱ti̱ ci diiri kaal. Imma anna iróng kettedi zoz ci e̱e̱t imma.
16 “Ming kettedi lo̱ki̱ko̱ ci e̱e̱t imma, ka̱du̱wa̱ zoz ci een de̱de̱, eci amire ki annit do̱ ci kettedi zoz, kettedda lo̱ki̱ko̱ nga̱to̱de̱ ki Baba bali i̱tto̱na̱na̱ ke̱. 17 E̱he̱rye̱ lo̱ti̱nno̱we̱ cuggo̱k azi ne, ming anyak bbaccak rama cik ibbac zoz, een zoz cinne̱ng de̱de̱. 18 Kibbaci anna zoz cinanni, okko Baba wa i̱tto̱na̱na̱n ko̱ ibbac zoz cinanni.”
19 I̱jji̱nne̱t zin nege nonno, a̱nne̱k ne, “Aave Batunne nga?” O̱bo̱de̱k zin Ye̱su̱ nogo, ize ne, “Iróng niga a̱gga̱yya̱ng, iróng bo̱do̱k a̱gga̱yyu̱ Baba bu̱k, ming a̱gga̱yya̱ng, a̱gga̱yyu̱ Baba bu̱k.”
20 Ozoz Ye̱su̱ zoz necu baling ngen enne edemze reene ci Ce̱e̱z wa Ta̱mu̱ta̱dde̱no̱, aave enne ojonun ki ngin wagon a̱ju̱ke̱ke̱ ol kaal wak amuce Ta̱mu̱ta̱dde̱n. Iróng zin e̱e̱ti̱ imma ngen eceb nonno, eci ngen i̱i̱ cinne kutube.
21 Izek bo̱do̱k Ye̱su̱ nogo ne, “Kuuwa anna, orongnyang atin, iróng amudannang, a̱da̱knnu̱ atin mu̱nye̱ne̱ cuggo̱k, imma nginti kokkoye anna, iróng niga a̱vvu̱nu̱ rok.”
22 I̱jji̱ntto̱ zin olli Yo̱u̱do̱, anno ne, “A̱ru̱k bong atin enne ele cinne, zo̱ze̱ ci azi enne ne, ‘Ngati kokkoye ko̱, iróng niga a̱vvu̱nu̱ rok’?”
23 Abarik zin Ye̱su̱ okko oowa zoza de, kar bo̱do̱k kize ne, “E̱e̱ggi̱nnu̱ niga ol cik ngololu, kokko anna ke̱e̱ni̱ e̱e̱t ci ta̱dde̱nu̱. E̱e̱ggi̱nnu̱ niga ol cik lo̱o̱c cu, iróng anna ke̱e̱ni̱ ci lo̱o̱c cu. 24 Ku̱du̱wa̱u̱ng anna i̱ge̱ta̱ ka̱nne̱kku̱ng ne, a̱da̱knnu̱ atin mu̱nye̱ne̱ cuggo̱k. Ming iróng a̱tu̱yya̱ng annit, a̱da̱knnu̱ atin mu̱nye̱ne̱ cuggo̱k.”
25 I̱jji̱nne̱t zin nege Ye̱su̱, a̱nne̱k ne, “E̱e̱ni̱ i̱nna̱ ngene?” O̱bo̱de̱k zin enne nogo, a̱nne̱k ne, “Zoz ci bali ku̱du̱wa̱u̱ng ko̱ necu.” 26 Kar bo̱do̱k kize ne, “Kanyai anna zoz ci a̱ppwe̱ zo̱ze̱ cunno̱ng, ki zoz ci kettede lo̱ki̱ko̱ cunno̱ng. Imma e̱e̱ti̱ ci i̱tto̱na̱na̱ ko̱ een de̱de̱. Ma̱i̱je̱ enne e̱e̱ti̱ wa i̱tto̱na̱na̱ annit een de̱de̱, ka̱du̱wa̱k olli lo̱o̱tu̱ zoz ci kiziya anna ngatinne.”
27 Iróng nege a̱gga̱ ming ozozek Ye̱su̱ nogo zoz ci obod ki Batinne. 28 Izek zin nogo ne, “Ming odongtu Ngerrti E̱e̱to̱, a̱gga̱yyu̱ atin ke̱e̱ni̱ anna nonno, kar bo̱do̱k a̱gga̱c iróng anna kogoni gi̱i̱ imma doize cinanni. Abarik kozozi ki bali ming edemeza Baba ke̱. 29 Kaavtiya ki e̱e̱t bali i̱tto̱na̱na̱n, iróng enne ungneka annit lo̱o̱c, kogoni kaal cik anyike nonno katalo.” 30 Baling iziyyet ol cik meelek zoz ci Ye̱su̱ niko, elemtta zin ol cik meelek nonno.
Biilet ci Aburahami
31 Izek Ye̱su̱ ol wak e̱e̱ggi̱n Yo̱u̱d a̱tu̱ nonno ko̱ ne, “Ming azunnu niga de̱mzi̱ne̱t cinanni, e̱e̱ggi̱nnu̱ nuyak waginnek de̱de̱. 32 Kar atin a̱gga̱c zoz ci een de̱de̱, arannung atin zoz neci mu̱nye̱ne̱.”
33 O̱bo̱dde̱k zin nege nonno, a̱nne̱k ne, “Ke̱e̱ggi̱nna̱ naga dooli cik doolik Aburahami, ngen kizeta du̱cca̱k cik e̱e̱t imma udut. Nya ci azi i̱nna̱ ne ogannet atin e̱e̱ti̱ imma du̱cca̱kze̱te̱na̱?”
34 O̱bo̱de̱k zin Ye̱su̱ nogo, a̱nne̱k ne, “Ka̱du̱wa̱kku̱ng zoz wa een de̱de̱, ming ogon e̱e̱ti̱ mu̱nye̱n, een enne du̱ca̱i̱t ci mu̱nye̱nu̱. 35 Iróng e̱e̱ti̱ ci een du̱ca̱i̱t abak ce̱e̱ze̱ ci a̱li̱ngli̱nge̱ enne ke̱ udut, do̱le̱c ci ce̱e̱zu̱ ci abak ce̱e̱za̱ udut.”
36 Ming aara Ngerinne mu̱nye̱na̱ cugunnek, abau i̱nna̱ labak ki̱zze̱c mu̱nye̱na̱ to. 37 Ka̱gga̱yyu̱ng niko ming e̱e̱ggi̱nnu̱ dooli cik dooli Aburahami. Abarik orongnyu u̱ru̱kta̱ng, ma̱rri̱t zoz cinanni iróng i̱i̱zo̱ o̱o̱tti̱ cuggo̱k. 38 Ka̱du̱wa̱kku̱ng zoz ci kicina ngati Baba, ogonnu bo̱do̱k niga zoz ci izikttu ngati be̱e̱tu̱nno̱ng.
39 O̱bo̱dde̱k zin nege nonno, a̱nne̱k ne, “Een Aburahami be̱e̱ti̱nna̱ng”
Okko zin Ye̱su̱ a̱nne̱k nogo ne, “Ming e̱e̱ggi̱nnu̱ dooli cik Aburahami, ogonnu wo̱ye̱ niga kaal balik ogon enne ke̱. 40 Abarik i̱yo̱ko̱ orongnyu u̱ru̱kta̱ng ka̱da̱k gaganiko, ke̱e̱ni̱ e̱e̱t ci ka̱du̱wa̱kku̱ng zoz ci een de̱de̱ a̱kku̱ ngati Ta̱mu̱ta̱dde̱no̱. Ngen zin bali Aburahami ku̱tu̱gu̱ kaal cik ogonnu niga ko̱. 41 Ogonnu niga kaal wak u̱tu̱gu̱ be̱e̱tu̱nno̱ng.”
Utuburet zin nege nong, kar zin kizettek nonno ne, “Iróng naga ke̱e̱ggi̱nna̱ dooli cik a̱ri̱ta̱i̱ te̱ge̱la̱, ke̱e̱ggi̱nna̱ dooli cik Ta̱mu̱ta̱dde̱no̱, nonno do̱ niko ci een Be̱e̱ti̱nna̱ng.”
42 Izek zin Ye̱su̱ nogo ne, “Ming een Ta̱mu̱ta̱dde̱n ci een Be̱e̱ti̱nno̱ng, irezang wo̱ye̱ ette niga annita, eci anna ka̱kku̱ni̱ ngati Ta̱mu̱ta̱dde̱no̱, i̱yo̱ko̱ ka̱vvu̱ ngatinno̱ng ngatu. Iróng anna ka̱kku̱ni̱ o̱o̱we̱ cinanni do̱, nonno ci i̱tto̱na̱na̱n. 43 Nya ming iróng zoz ci kozozi anna ko̱ i̱i̱zo̱ iin cuggo̱k? Ma̱rri̱t iróng niga aziknnu zoz ci kozozi anna ko̱. 44 E̱e̱ggi̱nnu̱ niga dooli cik lo̱rye̱nta̱k, be̱e̱ti̱nno̱ng, ogonnu gi̱i̱ ci orong enne. Bali oowa, een enne e̱e̱t ci a̱ru̱k ol ka̱da̱i̱to̱, iróng enne abak zo̱ze̱ ci een de̱de̱, eci enne iróng anyak zoz ci een de̱de̱. Ming kovolonga zoza, een neci kaale wanne̱ng, eci enne een volongnyoit, be̱e̱ti̱ volongo. 45 Abarik ming ka̱du̱wa̱kku̱ng zoz ci een de̱de̱, iróng niga a̱tu̱yya̱ng. 46 I̱llo̱i̱ wo̱ye̱ e̱e̱t imma ngatinno̱ng ci azi ne kanyai anna mu̱nye̱n. Ming ka̱du̱wa̱kku̱ng zoz ci een de̱de̱, elemtta zoz neci. 47 Aziye ol cik Ta̱mu̱ta̱dde̱no̱ zoz ci a̱du̱wa̱ enne. Iróng niga aziknnu zoz ci Ta̱mu̱ta̱dde̱no̱ eci niga iróng e̱e̱ggi̱nnu̱ ol ciginnek.”
Zoz ci Ye̱su̱ ki zoz ci Aburahami
48 Izettek zin ol cik een Yo̱u̱d ko̱ nonno ne, “Kabbacca ming ka̱du̱wa̱nna̱ zoz ci azi ne e̱e̱ni̱ i̱nna̱ i̱do̱nge̱ni̱t ci ol cik een Samariya, kar bo̱do̱k nyak kuuloc wa lo̱rye̱nto̱?”
49 O̱bo̱de̱k zin Ye̱su̱ nogo, a̱nne̱k ne, “Iróng anna kanyai kuuloc wa lo̱rye̱nto̱, ko̱ngo̱o̱le̱ anna Baba, ma̱i̱je̱ niga iróng o̱ngo̱o̱li̱nna̱n. 50 Iróng anna korongi ol ki̱di̱ngdi̱nga̱ta̱n, abarik anyak e̱e̱t ci orong ki̱di̱ngdi̱nga̱ne̱, nonno ci atin etted lo̱ki̱ko̱. 51 Ka̱du̱wa̱kku̱ng zoz wa een de̱de̱, ming azune e̱e̱ti̱ zoz cinanni, iróng atin acin daiz.”
52 Baling iziyyet ol cik e̱e̱ggi̱n Yo̱u̱d zoz neci a̱du̱wa̱ Ye̱su̱ ke̱, u̱ku̱ltte̱k je̱e̱n, kar zin kizettek nonno ne, “I̱yo̱ko̱, ka̱gga̱yi̱ niko ming anyai i̱nna̱ kuuloc wa lo̱rye̱nto̱! A̱da̱i̱to̱ ba̱li̱ye̱ ciko Aburaham ki a̱ri̱tto̱k wak zoz ci Ta̱mu̱ta̱dde̱no̱, kar zin abarik i̱nna̱ azi ne ‘Ming azune e̱e̱ti̱ zoz cunne, iróng atin atari daiz?’ 53 A̱ddi̱ki̱ri̱ i̱nna̱ mmog be̱e̱ti̱nna̱ Aburaham bali a̱da̱k ke̱? A̱da̱i̱to̱ bo̱do̱k a̱ri̱to̱wa̱ cik zoz ci Ta̱mu̱ta̱dde̱no̱. Iróng i̱nna̱ e̱e̱ni̱ e̱e̱t imma.”
54 O̱bo̱de̱k Ye̱su̱ nogo, a̱nne̱k ne, “Ming ka̱di̱ngdi̱nga̱ni̱ anna ele cinanni, i̱llo̱i̱ gi̱i̱ imma. Batanni ci a̱di̱ngdi̱nga̱nna̱n ci awuyyu niga kize Ta̱mu̱ta̱dde̱n cunno̱ng ko̱. 55 Ming nu̱nu̱n iróng niga a̱gga̱yyu̱ nonno, ka̱gga̱ anna nonno. Ming kazi ne iróng anna ka̱gga̱, kiize volongnyoit ki i̱yo̱ko̱ niga ko̱; abarik ka̱gga̱ nonno kar bo̱do̱k kuzute zoz cinne. 56 Atal ba̱li̱ye̱ Aburahami orong kicin i̱i̱te̱n ci ka̱kku̱ne̱ anna, icin zin kar katalo.”
57 Izettek olli Yo̱u̱do̱ nonno ne, “Ngen e̱rki̱to̱wa̱ cigunnek bu̱k kizeto moten tu̱r, icinnu Aburaham de̱de̱?”
58 A̱nne̱k Ye̱su̱ nogo ne, “Ka̱du̱wa̱kku̱ng zoz ci een de̱de̱, baling ngen Aburahami ki̱ti̱ra̱i̱, ka̱vvu̱ anna to la̱du̱n.” 59 35 Baling iziyyet zoz ci a̱du̱wa̱ Ye̱su̱ ko̱, ebertta biyen oronggit kovvoccit nonno, u̱lu̱gu̱ny zin enne ele kar zin kinik lo̱mu̱k kutungek re̱e̱nu̱n ci Ce̱e̱z wa Ta̱mu̱ta̱dde̱no̱ lo̱o̱c.