Tito
K'art'a Pablopa Tito pae bɨda
Pablopa nãɨ k'art'a Tito pae bɨsima. Mãɨ Titopa Pablodepa Jesucristode ĩjãasima (1:4). Mãɨ ewaridepa Pablo ome p'ɨrrɨapachima. Pablo naa Jerusalenea wãside ũpẽarã minachia k'awa p'anɨrã ome pedeai k'orea, Tito ateewãsima (Gálata 2:1-3). 2 Corintio 2:12-13de, mãɨnepa 2 Corintio 7:5-6de jara bɨma Titopa ũpẽarã Corinto p'uurudepemarã́ jaratea bapachit'a. 2 Timoteo 4:10de jara bɨma Tito Dalmacia tuadea wãsit'a.
Romane eda jɨ̃a nɨbada awara wãk'ari Pablopa mãicha p'uurucha ũpẽarã ak'ɨde wãsima. Tito ome Jesú k'orea pedea pia p'usa estaik'a ĩjũa bɨ Creta apataɨdea jarade wãsidama (1:5). Waapẽarãpa ĩjãanak'ari Pablopa Tito mãma ameesima jaratea bamẽrá. Mãɨya nak'ari Pablopa nãɨ k'art'a tea peesima Tito ichi ome Nicópolis p'uurudea wãmẽrá (3:12). Ũpẽa Tík'ik'o wa Artema peesima Tito k'ak'ua pae ũpẽarã́ jaratea bamẽrá. K'ɨ̃risiapatama ãyo 63de Pablopa nãɨ k'art'a Corinto p'uurudepa tea peesit'a. Ũpẽa Zenapa mãɨnepa Apolo pida Titomá ateewãsidama (3:13).
Pablopa Tachi Ak'õrea sõpia bɨade ak'ari bɨsima ĩjãapataɨrã ak'ɨpataɨrã chõarã sãmaasã́ p'ananai p'anɨ (1:1-9) mãɨnepa Titopa chi sea jarateapataɨrã k'orea jĩrak'aua bai bɨ (1:10-16). Mãɨ ɨ̃ari bɨsima chõarã, chõtãarã, k'ũtãarã, chi chipari pae pari mimiapataɨrã sida sãmaasã́ p'ananai p'anɨ (2:1-10). Mãɨ ɨ̃ari bɨsima Tachi Ak'õrepa ãchi k'aripada pẽra jĩp'a nipadai p'anɨ (2:11—3:10). K'aadea bɨsima Tito chemẽrá (3:12-15).
Chi k'art'adepema k'ɨ̃risia aba pia bɨ bɨt'a nãɨpɨ 2:15de: «Jõma mãɨ jaratea base. K'aripase ũpẽarãpa mãɨ pedea oodamẽrá. Piawẽa oo be ɨtɨase, Tachi Ak'õrepa pɨ bɨda pẽra mãɨya oomẽrá. Ũpẽarã́ pɨ itu bɨpirãse».