Israel Dinga Hosea Taona
14
1 Vo Israel, Pakai na-Pathen koma kile kitnin,ajehchu nangma nakhan gitlouna-a lhu nahitai.
2 Thuho chu ponlang, Pakai henga kile kitnin.
Ahenga, Khangitlouna jouse lamangin,
lungset tah-in nei sangun:
hitia chu keihon kakamuva kilhaina kapeh dingu ahi.
3 Asshur in eihuhhing pouvintin;
keiho sakol ho chunga tou pouvinge:
chule kakhutsoh hou henga chun,
nangho ka-pathen'u nahiuve tinjong seitapou vinge.
Ajehchu nangma-a bou panei louten hepina amuvin ahi,
tin seijun.
Pathen'in Israel Dinga Hinkhothah Athutep
4 Keiman akinung tolnao chu kasuhgampeh-a,
manbeija amaho kangailut dingu ahi;
ajehchu kalungsatna amaho-a konin akihei mangtai.
5 Keima Israel dingin daitwi tobang hing ting;
ama lily pahcha banga khang tou ding,
chule ajungho chu Lebanon banga jamdoh ding ahi.
6 Abahho chu jamdoh-in tin,
ahoina chu olive thingphung bang hiding,
chule Lebanon banga namtui ding ahi.
7 Ama lhalim noija chengte chu hung kileuvintin;
chang banga kidodoh kitnuva,
lengpitwi banga khang dingu ahi.
Chule chu-a anamtui chu
Lebanon'a lengpitwi tobang hiding ahi.
8 Ephraim'in,
alim semthu ho-a hi ipi-a kapansah nahlai ding ham?
Keiman athusei kajan, chule ama kamutai.
Keima theichang phung adohing tobang kahi,
atiding ahi.
Keima-a kona naga kimu-a ahi.
Thu Khumkhana
9 Koiham miching?
chule hiche thil ho hi hethem hen.
Koiham milungching?
hicheho chu hehen;
ajehchu Pakai lampi ho chu adih ahin,
chule midih chu hiho-a chu lamlha ding ahi.
Ahinla suhkhelna neihochu hiche-a chu lhuding ahiuve.