Babylon Lhuhding Kimu Masat
21
1 Twipi nelgam pohgih, lhanglamchimpei hungkipei bangin chutichun
nelgamle tijat umtah gama konin ahunge.
2 Lungkham umtah thilmu khat kahenga akiphongin,
kitahlou bolpan kitahlouvin abolin,
misumang pan mi asumange.
Vo Elam kaltouvin,
vo Media gaum kimvelun,
khoisatna jouse kasuhtang ahitai.
3 Hijeh chun kataihohi natna-in adimin;
numei naosonat in aheh bangin,
natna chun eiman chomtai.
Hichu kajan kakunin kho mutheilou
jennin kalungkhamtan ahi.
4 Kalungsung ahaisamtan,
thil gimneitah khatnin eikichat sahtai.
Kanopna janchu aman kadingin
kichatnan aleheitai.
5 Dokhang chu dovin,
daiveina insanga chun ve jingin,
neuvin, donun; kipat un,
nangho pipuiho, lumdal chu thao uvin.
6 Ajehchu hitihin kajah-a aseijin,
Pakaiyin kahenga,
chen, khongah khat koijin amu muchu
phondoh sah-in ati.
7 Chuin aman kangtalai khat sakola tou mi kopkhat toh,
sangan kangtalai khat,
sangongsao ho kangtalai khat amun,
chuin gunchu tahle lunglut tah in angaijin ahi.
8 Chuin ama keipi bahkai bangin apengin,
Pakai keima insang chunga kading jingin,
chule jankhovah in kapansatna-a kaume.
9 # Chule vetan, hiche munahin
miho kangtalai khat,
sakol chungtou kopkhat toh ahungin ahi.
Chuin aman ahindonbut nin, Babylon achimtai,
achimtai, amanu pathen semthu milim jouse
aman tolah avobong gamtai, ati.
10 Vo kachang mola kavohsa kaphola kachang ho,
Israel Pathen, janel ho Pakaiya kona
kanajah chu naheng uva kaphondoh ahitai.
Edom Chungchanga Thu Kisei
11 Dumah pohgih chu, Aman
Seir'a konin eihin kouvin,
khongahpa, jana ipi soh am?
Khongahpa jana ipi soh am? ati.
12 Khongahpa chun jingkah,
chule janjong ahung naitai.
Nakholtoh nomule kholtoh-un,
hungkileuvin, hungun, ati.
Arabia Chungchanga Thu Kisei
13 Arabia te pohgih chu,
Vo Dedanim kholjinho,
nangho Arabia gammang sunga nagedingu ahi.
14 Tema gama chengho chun adangchahpa
twi ahindop peh-un, galjampa chu
amahon changlhah-in avah uve.
15 Ajehchu amaho chemjam'a kon,
chemjam kisatdohsa-a kon,
chule thalpi kijebongsa-a kon,
chule gal nasatah-a kona hungjam ahiuve.
16 Ajehchu Pakaiyin kahenga hitihin aseije; kithalah kumho dungjuija kumkhat sunga Kedarte loupina jouse beisohding ahi.
17 Ajehchu Kedar chate thal kapthem le galhat hochu kilhomsah ding ahi. Ajehchu Pakai Israel Pathen'in hichehi aseisa ahitai.