Kyat ta rmamétuwé né nase rbolito
5
Kyat ta renimi renómi ta mewé. Flongé fafié ta ya bo kécegé nte. Mewé nase fduk bolito félé, se féféntanges re féféngegélayé mewé le. 2 Sebabta pote se néli, nimi re nómi né nase bo léo mewé. Nimi kebaya né nfamteto i. 3 Nimi guraci re salaka né ma nase nfaceceno i. Cécéné ta né nase nfaftulo ta fatuwé mewé fmamétuwé, se Jou Lahatala nase nfasólo mewé, néslayé keé nimi wóngété né ta dolo lutén ta néslay gémuné. Mnuw pana dunia nje bo tiso i, mewé ga masolo ffaléyówé be nimi re nómi né fafélé, momongo ta féléo i né nase myangso mewé ndimé. 4 Nómi sélsólé né ta nte: nimi kyat ta rpe nómi bété né, fpólso si pa. Flongé si pa? Ta réréntangésé né, réroré bo fpólso si ro, masolo ffaténténgéné mewé le. Mayta masike ffaténténgén mewé le, Jou Lahatala ta nlongé si. I ta nkawasa farimé ta po langét re bétbét re i wlólo né ndimé, I re nlongé si se nase bo nfasólé mewé. 5 Mewé re ffasénangé mew po dunia lo, fdéréré be mew wlomi ta mamétuwé né, mnómomi ma fié, inmomi ma fié, fénuta gélesó pana. Mayta pote se néli nase fémnawé. Tfatailo dolo haiwan ta tpiara si se tfabékbóké si bo téwetésé keé si. Fajé nóté re mewé. Mewé ma ffasénang be mewé né sogado nómi sélsólé né félé, se pote se néli sogado dunia nje re bo tiso i né, Jou Lahatala ma nase nfasólé keé mewé. 6 Sól esó nóté ta mewé re fpe né. Kyat ta rcól gélesó pa né mewé ffalélólé keé si bo fyó keé riri re róri né se fut si néli kyat tut fapnuwé né, fané si bo rfasólé keé si. Pocé kyat tuté né ma rlongé mewé, kyat ta pélóy bóto mewé se rfasól si, iglé sogado rfamóté keé si. Né ga kyaté nesté bo réceg sói? Si nase réceg gélesó pana, sebabta si re riri kawasa esó pa.Masike kyaté rfakangelangé mewé, ffaténténgéné mewé le, fdélé be Jou re tebtebnomi na
7 Nik délut, faftén re farémóné ta mewé. Kécego mewé nte: masike kyaté né rfakangelangé mewé, ffaténténgéné mewé le, féftón be Jou Yesusé bo nwómé nmulé né. Adeade kyat faisó npe nó bété. I nfatónémé rewóré, nfaménawé nó téntónémé né fafié, i néftóné né sogado pyoné. I néftóné sni séfis néli sogado nwómo ni góo, ga tagare nfalingété nó, bo nduké ni pipis fafélé. 8 Fajé nóté re ité: Jou Yesusé bo nwómé nmulé né, se masike tduk kangelangé né félé, tdélé be I, téftón I fafié, tfabusu it na. Tfakuat wloré né bo tdélé be I. Sebabta re rakén óro, ta I bo nwómé né.
9 Faftén re farémóné ta mewé. Masike ga tduk kangelangé, mati tkurubu re twóto sól po isó re isó na. Tpe fajé né bo Jou ma mati nfasólo it na. Kéceg pa? Jou Yesusé bo nwómé ro nte, bo nyó kyat ta rdéréré I né, kyat ta rdéréré I pa né ga nfasólé keé si.
10 Nik délut, faftén re farémóné ta mewé. Tduk kangelangé né, ta fié né tfatélolmo ité Jou ni nénan tatubé né bo ité ma tpe dolo si. Jou ni nénané nesté rfafan Jou ni Meiten ta I nfawómo si né. Nópé ga kyaté né rlongé si pa ga rfanpuné si re rfaméymóé keé si. Mayta masike fajé ma, Jou ni nénané nesté rfaténténgén si le, rdélé be Jou. Ta mulo ité ma mare tpe dolo si. 11 Kyat ta dolo nesté ta rdélé be Jou masike rduk kangelangé né, it ta tdéréré Jou Yesusé nte né ttail si, téceg be, “Alli, ga kyat fio si né ga!” Isó njé Ayube. Mewé re flongé ta réfétén i né se ffatélolmo mewé. I ni re nó né myangso i sogado ntu né ma rmót si ndimé. Pocé fefose se npekpike ndimé bóngo némnapo pisé. Mayta masike fajé ma, i ndélé be Jou Lahatala, ncópén nésé pa, se ni wóré nópé né Jou nfafié keé i, pocé bóngo i ni re nó né nduké nmulé, sogado re ntu nóté. Se ité ma re tuné ta Jou ni mésié re ni féyfié re pélóyé po i ni né.
12 Nik délut, faftén re farémóné ta mewé. Bo kécego mewé nte: ta délé ndél pa bo tcasi. Masike Jou Lahatala ngósno pari ngósén ta nésé pari, ndél pa tcasi. Iga bo téjaji fagélesó, tcónglo be “Iya”, pocé bóngo tpe. Iga bo tpe pa né, tcónglo be, “Tpe pa”. Mati ma tlól na. Tpe fajé né bo Jou mati nfasólo it na.
Bo téror fagélesó po Jou ni, mare fatuw-fatuwé
13 Bo po it ni reni kyat faisó wlo njé nkangelangé, ta fié né néror po Jou Lahatala ni bo npo i wloné ta fié. Bo reni kyat ta séngséngé bóto i, ta fié né nnyanyi ni le nfapélóy Jou Lahatala ngósno. 14 Bo reni kyat faisó ta npisé, ta fié né nkakém majelis jemaate, bo si lima rméiténé rdé Jou re résao i yégété. Rméiténé néya Jou ni, réror re Jou Yesus ngósno bo nfafié keé i. 15 Si réror ta néi, iga rdélé Jou Lahatala ta fatuwé, nase Jou nfapangén i se nfié i. Bo sogado i ma renó sélsólé, Jou Lahatala ma nase nfayangésé keé ndimé. 16 Ta mulo necé, isó-isó mare nfasópéné nó sélsólé né, tagare tut néya Jou Lahatala ni, téroré bo nfayangésé keé ndimé. Tpe fanfajé né bo Jou nfafié ité. Bo wloré né nmétegél po Jou ni né, ité rir réror néya po Jou ni né reni kawasa, sogado ta téroré né ma ndadi i ndimé.
17 Necé ta dolo tatubé Jou ni nénan Elia re npe né. Elia ma kyat ta dolo ité nte le, mayta I néror ta fatuw-fatuw po Jou Lahatala ni, bo nfatébén félfélé, bóngo re félfélé pana sogado taun nuén tel re spalé. 18 Pocé ga Elia néroré bo félfélé nóté, bóngo félfélé se téntónémé né ma pyoné nmulé.
Tgali rir délé né bo rduk ta fié po Jou ni
19 Nik délut, faftén re farémóné ta mewé. Po mew ni né, bo reni kyat faisó ta re ndéréré Jou ni méiténé né, nópé ga ta ndéréré né re fatuw pana, ta fié né faisó néli bo nfaméteglo i, ma ga n-ngale i ga npólén i bo ndéréré Jou nmulé. 20 Kécego mewé: bo sogado kyaté njé npólén i se ndéréré nmulé, ta i ni délé njé npe né fié tuwé, sebabta i re nfasélamaté keé i se renó sélsól pana. Bóngo nó sélsól ta téténé tefen pana né, Jou nfayangésé keé ndimé.