Mare lenglongomi fié po Jou ni
4
Mewé nte ffakotale sogado ffamngamo né, ni mdio né sói? Mewé wlomi bo fdéréré Jou, mayta nimi nafsu né pélóy be po ta dunia njé ni né, maduga bo ffasénangé mewé le. 2 Mewé wlomi né métmóto fagélesó, mayta fduk pa, tabóngo nawto mewé ga ffpuné keé kyaté. Bo tisé, fémnawé kyat ta reriri reróri né bóngo ftelengen si, masolo fduk pa se ffamngamo re ffanpuné fdé si. Ta mulo sogado fduk pa né, ga féror po Jou Lahatala ni pa né! 3 Mayta bo sogado féror po I ni ma nase fduk pa, sebabta nimi réroré né sólé. Mewé masolo féroré bo nimi re nómi né fafélé, bo ffasénang be mewé le.4 Mewé fécegé cogo fdélé Jou Lahatala, né ga flolém be ta dunia nje ni né. Funé pa? Necé re tpeé lé Jou Lahatala. Bo sogado ité tlolém be ta dunia nje ni né, necé re ttekile keé Jou Lahatala. 5 Po Jou ni Buké wlólo né reni méitén esó nóté ta ni ngale né pélóyé, ta ni glio né faje,
“Jou Lahatala wlo bo tdéréré be I le.
Se roh ta I re nfapel po wloré wlólo né,
I ta délé nfaléngóto keé i né.
Bo sogado tdéréré be ta nésé né,
nase wlo njé npisé.”
6 Mayta masike ité tpe ta sólé né, béréga Jou ni féyfié né npo ité le, nbóng ma nbóng i sogado tdéréré I né ma téfené. Po Jou Lahatala ni Buké wlólo né ma reni méitén esó nóté ta ni glio né faje,
“Kyat ta masolo rfaséngé si né,
Jou Lahatala ncawané ndé si,
mayta kyat ta rfamya wlori né se ryó be pópé le,
Jou nmésié si se n-gali si ndimé.”a
7 Se ta mulo kécego mewé nte, mare lenglongomi né fié po Jou Lahatala ni. Mati flongé setané né riri kolano njé na, fétófé keé i bo nówés i. 8 Férakén néli po Jou Lahatala ni, pocé I ma nase nérakéné mewé. Mew ta fénpe be sélsólé né, fngali mewé, fpóléné mew néli po Jou Lahatala ni. Mew ta fécegé bo fdéréré Jou, mayta wlomi né nésagél i, se ffamétegélé wlomi né bo fdéréré be Jou le.b 9 Ngénngan néya fémlifé nimi le, séngséngé bóto mewé le. Mayta kécego mewé nte: nómi sélsól po Jou ni né félé. Se mare ftoléné bo ffatélolmo nómi sélsólé né sogado wlomi né mjakémé, re feféntangésé né sogado féfénsesewle. Pocé bóngo ftébné nómi sélsólé né bo fpóléné mew néli po Jou ni. 10 Kécego mewé nte pa? Ffamya wlomi né re fyó be pópé le, fpóléné mew néli po Jou Lahatala ni. Necé ga tagare Jou nase nélóngé mewé.
Mati técegé kyaté róri ta lé na
11 Nik délut, faftén re farémóné ta mewé. Mati téceg isó re isó nó ta lé na. Sebabta fanfaje: bo téceg be kyaté né róri ta lé pari téfétén be róri sélsólé né, necé re tpalté keé Jou Lahatala ni méiténé né, cogo métegél pa ndimé. Bo sogado re técegé ni méiténé né métegél pa, necé re tdéréré pana, cogo ité ro ta tuné kyaté né róri sélsólé né. 12 Farimé ta Jou Lahatala nané ité né, I ro ta nécegé né. Bo sogado tdéréré pa, maduga Jou le ta nfasól ité né. Bo nfasélamat it pari nfasólé keé it pari, ndé be po I ni. Né ga mewé ftoléné ga maduga ffrat be kyaté róri sélsólé né!
Tméiténé né mati tfaséngé it na
13 Mewé nte ya dolo kékénlongé féfénméiténé né, dolo bo sólé, sebabta ta fécegé né faje, “Nganesó pa luwé nte, amé bo kfan néli po pnuw ta npélóyé njé ni, ktolén am pocé fataun nuéncó wlólo bo kfalwagé mamé, bo kduké mam pipis fafélé.” 14-16 Féceg fajé né, mewé fsólé, sebabta funé pa ngénngan ta i móné bo ndadi i pari tisé né. Féceg ta néi né, masolo ffaséngé be mewé le. Sói pa sói ta bo ndadi i né ité tuné pa, maduga Jou Lahatala le ga nuné. Ffaséngé mewé ta dolo re fénpe né, necé fsólé. Kyat ité nte tfatailo dolo fom re yasé né. Tómémóné né i pocé lesu, ngénngané njé re i néya tabóngo tiso i ro. Kyat ité nte ma fajé. Ngénngan péséwé nte it i pocé lesu, mayta tuné pa, péséwé nte pari móné né, tésib re télélé re tmót ité. Se kyat ité nte tméiténé né mati tfaséngé it na. Ndé fafié téceg be faje, “Bo Jou npo ya fié nfalóngé nik umur sogado móné, ya nase kpe faje re fajé.”
17 Se kécego mewé nte, coba ité tuné ta fié né ga tpeo pa, necé ité re tcól po Jou Lahatala ni.