Yesusé néfétén Yohanesé njé pai
11
Yesusé nfasodoto ni motemote yófésó re séluwé nesté rewóré, tabóngo nfatoléné keé géwgów ta néi. Se nfané nfasodoto re nfawómo Habar ta Fié yama Jou Lahatala ni po kyaté-kyat ta si po kota-kota ta po bótén Galilea né.2 Po waktu ta néi, Yohanes ta nénbaptisé kyaté njé i po bui wlólo. Se nlongé kyaté né réfétén férimé ta Yesusé Kristusé re npe né, tabóngo nané ni motemote nesté rfan néli bo rutné Yesusé. 3 Néli faje bóngo rutné, “Moke, Awé ro Kolano ta Jou Lahatala néjaji bo nwómé njé? Pari bo kéftón ta nésé nóté?”
4 Bóngo Yesusé nécegé si faje, “Fpóléné mew néli po Yohanes ni, bo féfétno i sói ta Ya re kpe, ta re flongé re fémnawé né: 5 kyat ta rébyafé né re rémnawé, ta rkafé né re rfané, ta rpado né ma re rfié, ta rpongo né ma re rlongé, kyat ta rmóté ma re rpangén si nmulé, re kyat ta reriri reróri pa né ma re kéfétno si Habar ta Fié yama Jou Lahatala nia.” 6 Pocé Yesusé nané si récego Yohanesé nóté, “Kyat pai ta nétóf Ya pa se ndélé be maduga Ya le, kyat ta njéi ta nase séngséngé bóto i.”
7 Waktu ta Yohanesé ni motemote nesté re rfan si né, bóngo Yesusé néfétén Yohanes po kyaté-kyat ta si pocé né. Se nécegé si faje, “Fakéjéré ta Yohanesé nfasodoto kyat po géwgów ta sésé bóto i bóngo nélówé pnuwé njé, mewé ffan po i ni né bo fpe sói? Bo fémnawé kyat ta ngénngan pésénte néceg nésé, móné néceg nésé njé, tadolo gamuné ta moré nufé se nméyawén néli re lima né? Nase tisé to? 8 Pari fpe néli né bo fpe sói? Bo fémnawé kyat ta nénduo i kabaya ta fié njé? Nase tisé to? Sababta kyat ta randuo si kabaya ta fié né, góori be po kolano né riri kadatongé lo. 9 Néga fpe sói se fpe néli? Sogado fpe néli né nihalé bo fémnaw Yohanesé, sababta i ta njé i nabi ta nénfawómo Jou Lahatala ni faftóté njé! Fatuwé né! Mayta fatélolmo mew fafié é, Yohanesé njé lebe npélóy po férimé nabi tatubé lima nesté nib. 10 Sababta po tatubé lima lesu, po Jou ni Buké wlólo né, nabi Yesaya re nécegé, Jou Yesusé nwóm pafule, Yohanesé ta bo nwómé ntubé. Ta Yesaya nlefo né ni glio faje,
‘Ffaméilongé fafié!
Ya nase kané nik nénan isó ntubé po Aw ni.
Kyat ta njéi ta bo nfamówé nim yéféné bo nfasadia kyaté né wlori bo rdéréré Awé.c’ ”
11 Yesusé nécegé nóté, “Fatélolmo mew fafié é, po férimé kyat ta mépiné né re rfantuné si po dunia nje ni wlólo né, reni isó pa ta lebe npélóy po Yohanes ta nénbaptisé kyaté njé ni. Mayta po waktu ta ntei óro, kyat pai le, masike gélesó ni ngale i pa, iga npo wlo bo Jou Lahatala Nkawasa dolo Kolano po ni hidupé wlólo né, kyat ta njé i ta lebe npélóy po Yohanes ni. 12 Po waktu Yohanes ta nénbaptisé kyaté njé nwóm sogado ngénngan pésénte né, reni kyaté-kyat léo ta rfakotale re kyat iglé ta re rdadi Jou Lahatala ni kyat si né bo ma rdélé Jou Lahatala le na, bóngo réyówé yéféné bo rkawasa keé si.d 13 Sababta po waktu ta Yohanesé nwóm pafule né, férimé nabi né re rfébingé ta Jou Lahatala bo nkawasa óro. Se Hukum Taurat ta Musa nlefo né ma re nécegé nóté. 14 Pocé ma re rfébingé, ta nabi Elia bo nwómé nmulé né. Se iga bisa ftarima nabi Elia ta récegé bo nwómé njé, nejé Yohanes óro. 15 Se flongé fafié ta Ya kécegé né, bo fisén po wlomi wlólo!
16 Kyat ta isémé nte, Ya bo kfatailo si né dolo sói é? Si ta néi tadolo yomya ta rfangyangto si bo rémongé, se réceg faje,
17 ‘Mew lima bo témongé fafsówé.
Néli, amé kuf sulingé bo fsawélé, mayta wlomi fsawél pa!
Rewóré ga témongé métmóté, amé knyanyi po métmóté lo mayta mewé wlomi ftangés pa!’ ”
18 Pocé tabóngo Yesusé ntebo adeade njé ni ngale, se nécegé si faje, “Kyat ta isémé nte tadolo yomya nesté, se wlori pa ndimé. Sababta po waktu ta Yohanesé nwómé né, rtarima i pa. I nénpuasa bóngo nénfainém pa, mayta récegé cogo, ‘I ta njéi setané ntolno i!’ 19 Se nte, Kyaté Ntu ta re kwóm yama soroga njé, Ya kpuasa pa se kamnóm re kéninémé. Mayta kyaté-kyaté né réceg faje, ‘Coba fémnawé! Kyat ta njéi, ta féléo né po I ni ndimé: nmamnómé, nmaféinémé, tagare nfaljilé ndé keé kyat ta ranfalutno pajak re kyat léo ta iglé né nóté.’ Mayta masike mewé ftarima Ya re Yohanes pa, mayta po waktu nuéncó ga nase fémnaw po kyaté-kyat ta rdéréré Jou Lahatala ni dodoto né, rpe be ta fié re métegélé ndimé.”
Yesusé ncawan kyaté-kyat ta rngali si pa né
20 Rewóré ta néi, ga Yesusé ncawané keé kyaté-kyat po kota séfis néli né, sababta masike re rémnaw I npe mujizat félé, mayta wlori pa bo rngali si. 21 Se nécegé si faje, “Sené mewé, kyat Khorazim re Betsaida né. Mewé nase bo fkangelangé! Sababta re fémnaw mujizat félé ta kpe po mew ni né, mayta fngali mew pa, bóngo re fdéréré Ya pa nóté. Mujizat ta néi, iga kpe po kyat ta si po kota Tirus re Sidoné né, masike wlori né matué, mayta nase rngali si. Re iga rngali si né, résyapé géyapé né po babokor i lo, bóngo réngalno si kabaya né karongé, necé ni ngale fatuw-fatuw ta re rngali si se rdéréré Jou. 22 Fatélolmo mew fafié é, pote se néli iga dunia njé bo nkiamaté ga Jou Lahatala bo nadili keé farimé kyaté né, kyat Tirus re kyat Sidoné né nase rduk hukumané né lebe manóné po ta mewé fduké né.
23 Se mewé kyaté-kyat Kapernaumé né, mewé facogoma mewé ro ta fié se nase fsung soroga? Fsung pa! Mayta Jou Lahatala nase nwóté keé mew néli po naraka wlólo. Sababta po nimi pnuwé lo né, re fémnaw ta kfafié kyat re kpe mujizat félé, mayta fngali mew pa le. Né bo ma mew na bo kyat Sodomé né, iga re rémnaw ta dolo kpe po mew ni né, nase re mnuwé rngali si se riri pnuwé njé sogado nte i pocé lesu. 24 Ya kécego mewé, pote se néli sogado dunia njé nkiamaté né, masike kyat Sodomé né rduk sélsól ta météo i né, mayta ménómi né nase ta délé lebe météwé.”
Yesusé nécegé, “Lima bo ffatóyné mew po Ya ni”
25 Po waktu ta néi, Yesusé nméiténé ndé Jou Lahatala, néceg faje, “Ya nik Moke Jou Lahatala ta mkawasa po langét re bétbété. Ya kéceg tarima kase po Aw ni, sababta Anim faftóté ta kfawómo po kyaté né, mpe sogado kyaté-kyat ta rpélóy ta cogo runé félé né rcae pa. Mayta kyaté-kyat ta rémya ta runé gélesó pa né ga, Awé mpe sogado rcae fié. 26 Moke, Awé mpe né tadélé mgó wlemé.
27 Férimé ta po Aw ni né, Awé re mpo Ya. Bóngo isó pa ta nuné Ya, maduga Awé le ta muné Ya. Re isó pa ta nuné Awé, maduga Jou Lahatala ni ntu Ya nte ta kuné Awé, re kyaté-kyat ta Ya kaftul si bo rféyal Awé né.
28 Ta fbósém météw sogado fémgaé né, mew lima bo kfamanóné mewé. Bo férimé ta nfamétéwé mewé né kféyangésé keé bo wlomi né séngséngé bóto. 29 Fwóm lima po Ya ni bo fdadi niké kyaté mewé, kfatailo né dolo sapi ta ndéréré ni wlóné njé se nétané ni wólé né bóngo ntuda keé i né. Se fwóm lima bo fdéréré Ya ro, sababta Ya kuté mew fié, nase kfasusa mew pa, mayta nase kgali mewé bo wlomi né nténténgéné. 30 Sababta ta fdéréré Ya né, nase fkangelang pa, re sói ta Ya kané mewé né ma météw pa.”