4
1 Yamu nga gegalen, peglepeng niu su kepia niu tu nga gulipen niu, mukaˈ peksemaan su nga pemegay niu dinilan. Ndiˈ niu selingaway puˈ duun dademai gegalen niu, su Kaunutan ta ditug langit.
Nga Tituluˈ
2 Naa launan niu, penamal amu menenabi. Selian niu menenabi, peglengilam amu, mukaˈ pekpaladpalad amu tu Megbebayaˈ, 3 sampay mpeduma niau penenebiay dadema. Penenebiay niu tu Megbebayaˈ begayanu niin sikawan ku megukit, adun maukitu su petenday mekatag dini Kristu daansamaˈ pigbuni, mukaˈ mibuasan na, puˈ kiai mipikutanu dun. 4 Penenebiay niau adun mpanteku ukitay su melaun getaw, puˈ ndiˈ mesuˈat saˈ ndiˈu megukit dinilan.
5 Naa, ki nga ndaˈ pa sakup dini Kristu, peksibaˈay niu su pegbetaden niu dinilan, gebii gendaw, gikteb tu sikawan niu, pepianay niu ilan. 6 Pelengas niu lelayun sug yaga niu dinilan mukaˈ peleliagay niu ilan, adun metau amu sumbag dig launan getaw sumaak diniu mekatag di kekpetuud niu.
Simbayan ni Pablo su nga Samasakupen
7 Naa sug launan mipenggulaulau, megukit dun diniu si Tiquico, su mimated dinita petailen ku gupia. Meseligan iin lumimbang dinaan, sama sesuguˈen ku di pibaal dinami nu Kaunutan. 8 Iini sinuguˈu dun mangay dia niu, adun pesuunen diniu su nga mipenggulaula nami, launan nami, adun mawaˈ su kelibuleng niu dinami. 9 Petendugen ku diniin si Onesimo, kig duma niu kiin. Petailen ku dadema iin, meseligan mimated dinita. Ukitan amu nilan duaˈ mekatag dig launan mipenggulaula nami dini.
10 Naa si Aristarco, sama pirisuu, sinambay amu niin. Si Marcos tinindegay ni Bernabe, sinambay damu dema niin. (Mabuˈ midawat na niu su tinituluˈu diniu mekatag diniin puˈ penembaˈen niu iin saˈ mekeditu niu.) 11 Si Josue, sala ngalanen si Justo, sinambay damu dema niin. Ndaˈig lain getaw Judea samasakup ta megabang dinaan megukit mekatag di Keglekaunutan nu Megbebayaˈ, ki telu ilan kia. Gembageli gabang nilan dinaan.
12 Naa si Epafras, sala pa di ngag duma niu dini, sesuguˈen ni Kristu Isus, sinambay damu niin. Gebii gendaw, pinemalan amu niin penenebiay adun meligeni kesalig niu, mukaˈ adun metuudan amu dun gupia su tibaˈan mauyaˈan nu Megbebayaˈ. 13 Puˈ misuunan ku pia taˈ alandunig baalenen, adun ebangan amu niin, pinemalanen baalay. Pengmaˈantuunen dadema su nga samasakup niu ditug lunsud Laodicea mukaˈ diag lunsud Hierapolis. 14 Naa si Lucas, su petailen nami memulung, mukaˈ si Demas, sinambay damu dema nilan.
15 Naa, su kepetedan ta diag lunsud Laodicea, sembayay niu ami dinilan sampay si Ninfa, ilan nu nga samasakup ta mekumpung diag balayen. 16 Sikna besaan niu di gedapan niu su sinulatu kini, kelelaat puit niu pelum tu pikumpungan diag Laodicea, adun besaan nilan dadema. Maˈantu, pegbesaay niu su sulatu piwitu tu nilan. 17 Mukaˈ taluˈ niu dini Arquipo, “Subay tubusen mu su pibaal diniˈa nu Kaunutan miktenduˈ diniˈa.”
18 Naan si Pablo, sulaten ku dadema diniu gempia gendaw. Kelelaat, ndiˈ niau selingaway penenebiay, puˈ pinikutan pau gusay sampay nemun.
Naa, penenebiin ku tu Megbebayaˈ, mbianan niu su tulungen gebii gendaw.
Daal daitu. Pablo