3
Iin sungkini Gempia Dunutan, sug Diniwata
1 Kaas penemalay niu talentenay sungkin sug betad ditug langit tandaˈ pegingkud si Kristu, puˈ lepeng mipeduma amu dini Kristu petubuˈen puliˈ, puˈ mipeduunan namu di ketubuˈ ndaˈi tamanen. Pegingkud si Kristu dia gupid nu Megbebayaˈ, pegbesaan gupia. 2 Kaas, pektalentenay niu gusay sug betad ditug langit, kanaˈ nug dinig lumbang. 3 Puˈ lepeng minatay namu, kaas mibeleng na sug betad niu kinilawan. Maaˈ nu ketubuˈ nemun ni Kristu ndiˈ maitaˈ, ndiˈ dadema maitaˈi ketubuˈ niu ndaˈi tamanen miksekat di keksalabuuk niu ditu Megbebayaˈ. 4 Saˈ mpuliˈ dini si Kristu, saˈ medayag nain, su mikpetubuˈ diniu ketubuˈ ndaˈi tamanen, mpeduma amu dayun diniin sampay di kepaitaˈ di kelengas nu pegbayaˈen mukaˈ di kegdedengegen.
Sug Begu Betad batul nug Daan
5 Naa mendadi, ki gayak nu kekinilawan niu, subay teliudan niu. Ndiˈ amu megdusa, ndiˈ amu menggulaula melaat, ndiˈ amu megdupang, ndiˈ amu mayak tu melaat, sampay ndiˈ amu pagid mesaku. Puˈ saˈ mesaku amu, mesama amu di getaw pektemuyeneni nga pimetang, sabayaˈ nu Megbebayaˈ. 6 Sabaˈ nu nga gulaula kia, duuni gendaw pelebuˈan pa nu Megbebayaˈ su ngag launan getaw memilas diniin. 7 Yamu dema, maˈniaig daansamaˈ pigbetad niu, su kemilas niu pa tu Megbebayaˈ.
8 Naa nandaw, subay belengen niu kig launan betad maˈniniˈ, ndiˈ amu mangit mukaˈ ndiˈ amu sempaun, ndiˈ amu megbanta mukaˈ ndiˈ amu menlibak, sampay ndiˈ amu meglaat taluˈ mukaˈ 9 ndiˈ amu megbebelusay. Iini ndiˈ amu menggulaula dun, puˈ tiliudan na niu sug daan delendeman niu sampay sug daan betad niu. 10 Tilimaˈ niu sungkinig begu betad niu. Miwat dun su Megbebayaˈ mukaˈ pegisegenen gusayig begu betad niu sampay menggangeti gasal nu Megbebayaˈ diniu, adun sumambat amu diniin tantu. 11 Kaas su gasal getaw Judea saˈ su gasal kanaˈ getaw Judea, saˈ su misirkunsisu saˈ su ndaˈ mesirkunsisu, saˈ lain getaw, saˈ ginuranti, saˈ gulipen, saˈ su kanaˈ gulipen, launanen kini, ndaˈ nai pantagen tantu. Iin laak gembageli pantagen, si Kristu, puˈ iini tampusan metaas di gekleb langit buˈ lupaˈ.
12 Mendadi, subay gempiai pegbetaden niu, puˈ sakup namu nu Megbebayaˈ, pimiliˈ amu niin daniin nga piglegetawan mukaˈ petailen amu niin. Kaas subay melilelaaten amu, mekesuun amu, pebabaˈ niuig lawas niu, mesumayaˈ amu, metau amu mektigel dig dupangan mukaˈ sayep nug duma niu, 13 sampay pedesunen niuig duma niu mikesalaˈ diniu. Subay pedesunen niuig duma niu maaˈ nu kepedasun diniu nu Kaunutan ta si Isukristu. 14 Taman taluˈu diniu, pekpinetailay amu, puˈ su keksalabuuk ta nu nga sakup ni Kristu Isus, miksekat dadema di kepetail ta.
15 Bigay pa pagid diniu ni Kristu pianan ginaa. Subay meguit gusay dig delendeman niu ki gempia ginaa niu. Puˈ iini inggat amu dun mbaal salabuuk laak pikumpungan gitungan dun salabuuk damu lawas, puˈ adun saladuaˈ diniu, meksalabuuk tug dumanen di ginaa. Mukaˈ pekpaladpalad amu lelayun tu Megbebayaˈ. 16 Ki ginukit ni Kristu, subay mengganget dig delendeman niu. Pektituluˈay amu mukaˈ pektikukay amu, gikteb nu tinawan niu. Penalay niu su Megbebayaˈ dig bebat. Bebaten niu dadema su ngag Bebat sinulat di Misulat Taluˈ nu Megbebayaˈ, sampay pia taˈ bebatay duni pedelendem diniu nug Balakat nu Megbebayaˈ, selian niu mekpaladpalad diniin.+\fr 3:16 \ft Kig Bebat kini, iin su piningalan dun nu getaw Judea begudiin Salmo, sug bibat nilan adun pektamuy tug Diwata.
17 Kaas, pia taˈ alanduni penggulaulaan niu, saˈ baalen, saˈ teluˈen, subay penggulaulaan niu bantang tu nga getaw pigwekilan gusay nu Kaunutan ta si Isus, lamug niu mekpaladpalad tu Gamaˈ ta Megbebayaˈ miksekat di keksalabuuk niu dini Isus.
Gempia Pegbetaden diag Balay
18 Naa, yamu ngag libun misuay na, diadia mekpetuud ditu sawanen, puˈ iinig bantang gulaula nu nga sakup ni Kristu.
19 Yamu ngag laki pelum migawid na duayan, diadia petailenen su sawanen, kanaˈ metegasi keguiten dun.
20 Yamu nga gembataˈ, kagina suminalabuuk namu dini Kristu, pekpetuud amu lelayun tu mekegulang niu mekatag dig launan mauyaˈan nilan, puˈ iini leliagen dun su Kaunutan.
21 Yamu nga gamaˈ pelum, ndiˈ niu pelebiay tituluˈay sug bataˈ niu, tekaw buus lumukas ilan mekpetuud diniu.
22 Naa yamu nga gulipen, pekpetuud amu tu gegalen niu dinig lumbang mekatag dig launan suguˈan nilan diniu. Petuuday niu ilan lelayun, ndiˈ mpia saˈ petuuden niu laak saanan nilan megbantay diniu. Kanaˈ dadema mpia saˈ petuuden niu laak di kekpaitaˈitaˈ niu dinilan, segaga petuuden niu di ndiˈ megduaˈduaˈig delendeman niu, meksekat di kegbasa niu tu Kaunutan. 23 Pia taˈ alandunig baalen niu, gikteben laaki ginaa niu, gitungan dun gegalen niu su Kaunutan ta si Isus, kanaˈ nu getaw. 24 Puˈ ndiˈ niu selingaway puˈ su Kaunutani sumugda diniu, sugda diniu su pinasad na nu Megbebayaˈ. Puˈ su tantu gegalen niu su Kaunutan, si Kristu. 25 Laak, sugdaan su menggulaula melaat lepeng dig baalenen, puˈ su Megbebayaˈ, ndaˈig lingken ukumenen.