Su Sulat ni Pablo
tu nga Getaw
EFESO
1
1 Naan si Pablo, peneliganu ni Kristu Isus tinduˈ nu Megbebayaˈ. Suminulatu diniu nu nga piglegetawan nu Megbebayaˈ megbenwa diag lunsud Efeso, puˈ meseligan damu di keksalabuuk dini Kristu Isus. 2 Penenebiin ku tu Megbebayaˈ su Gamaˈ ta mukaˈ tu Kaunutan ta si Isukristu, begayan amu niin tulung mukaˈ pianan ginaa.
Sug Bigay dinita nu Megbebayaˈ
3 Naa mendadi, su Megbebayaˈ, ki Gamaˈ nu Kaunutan ta si Isukristu mukaˈ su pektemuyenen pa pagid, pekpaladpalad ita diniin. Puˈ puun tu keksalabuuk ta dini Kristu, pipianan ita niin dig launan ginis kepia di ginaa ta mukaˈ dig delendeman ta, su kepia genat tug langit. 4 Puˈ su ndaˈ pa mbaali gekleb langit buˈ lupaˈ, pimiliˈ ita niin sakupen pebian dini Kristu, adun medawat ita niin mukaˈ ndiˈ ita medangat di gedapanen.
5 Naa su Megbebayaˈ, kagina gempetail dinita, daansamaˈ pigdelendemen betaˈen ita niin pebian dadema dini Isukristu, puˈ kia gupiai mauyaˈanen. 6 Subay enalen tain, sabaˈ nu gembagel tulungen dinita, puˈ pipianan ita niin, ita nu nga suminalabuuk ditu petailenen bataˈen si Isukristu. Pipianan ita niin di ndaˈi sugda ta dun. 7 Puˈ su kepatay ni Kristu kini, likat ita nu Megbebayaˈ di ginukuman dinita, puˈ pidasun ita niin di kemilas ta. Maˈantu, gembagel gupiai tulung nu Megbebayaˈ dinita! 8 Ndaˈig labaw dun di tulungen mbianan ta!
Mendadi, puun tu tinawanen mukaˈ ketelisebutayen, 9 pisuun dadema dinita nu Megbebayaˈ sug daansamaˈ pigbuninen delendemanen, puˈ pipenggulaula nu Megbebayaˈ dini Kristu sug delendemanen kia. 10 Puˈ saˈ metektak nai sesaˈen, tubusenen penggulaulaay su pigdelendemen puˈ peksalabuukenen su tibaˈan binaalen dini gekleb langit buˈ lupaˈ. Mukaˈ si Kristu, iini pepeglekaunutanen dun.
11 Mendadi, kig launan pigdelendem nu Megbebayaˈ, saˈ penggulaulaanen, dunutanen gupia su mauyaˈanen. Mukaˈ danita, mitenduˈ ita nu Megbebayaˈ piglegetawanen meksalabuuk dini Kristu Isus miksekat tu pigdelendemen kanugdiin. 12 Kaas ita nu nga miuna mekpedateng dini Kristu, subay penalan ta su Megbebayaˈ sabaˈ nu kelengas nu pegbayaˈen.
13 Yamu nu nga kanaˈ getaw Judea, naa maˈantu damu dema. Benaˈ midengeg niu su metuud, su Gempia Petenday mekatag di kegawen nu getaw, mituudan amu dun si Kristui Meglegawen. Binaal amu dayun nu Megbebayaˈ nga piglegetawanen, mukaˈ bigayan amu niin Balakaten, su pinasaden tuˈus puˈ sakup amu niin. 14 Piunanen sug Balakaten dig launan begayen dinita. Saˈitada, kagina megbenwa na di ginaa ta sug Balakat nu Megbebayaˈ, pedetengen ta puˈ mekegduma daita dema ditu Megbebayaˈ di ndaˈi gikteben. Pedetengen ta pa gusay sampay di gendaw pebeluyenen tantu sug launan sakupen. Kaas, penalan ta su Megbebayaˈ mekatag di kelengas nu pegbayaˈen.
Su Kenenabi ni Pablo
15 Mendadi, kagina maˈantui kepepia dinita nu Megbebayaˈ, sikna midengegu puˈ mekpetuud amu tu Kaunutan ta si Isus mukaˈ mekpetail amu tu samasakup niu tu Megbebayaˈ, 16 mekpaladpaladu gusay tu Megbebayaˈ mekatag diniu. Mukaˈ saˈ menenabiu 17 tu Megbebayaˈ, su mekesalebuˈ Gamaˈ ta pektemuyen nu Kaunutan ta si Isukristu, iini penenebiin ku, begayen diniu sug Balakaten, adun megiseg su tinawan niu mukaˈ adun buasanen dig delendeman niu su metuud mekatag diniin, sampay sumambat amu gupia diniin. 18 Penenebiin ku dadema petiaganenig delendeman niu, adun mesuunan niu gupia saˈ alanduni pedetengen niu puun tu kegenggat diniu nu Megbebayaˈ sumakup diniin. Penenebiin ku pa pagid, mesuunan da niu dema gupia sug lagaˈ nu kepia pinasaden tu nga piglegetawanen. 19 Mukaˈ mesuunan pa niu pagid su ketaas nu ginuungen dig delendeman ta, ita nu nga suminalig diniin. Ki ginuungen, ndiˈ metepeng, puˈ iini ginuungen 20 saˈ pitubuˈen puliˈ si Kristu, mukaˈ piningkuden di gupiden dapit lintu ditu gekbus langit. 21 Si Kristu, iin su megbayaˈ ditug langit mukaˈ pia adini nga ndiˈ maitaˈ, kaas iini metaas pa dig launan megbayaˈ, meglegadiˈ, meglekaunutan, mukaˈ meguit tug duma ditug langit, sampay di nga ndiˈ maitaˈ dinig lumbang kini. Pia ki gelalen, metaas pai kegbasa dun di kegbasa dig launan gelal nu nga metaas, nandaw mukaˈ di ndaˈi gikteben. 22 Pipeguit dadema nu Megbebayaˈ diniin sug launan bitang di gekleb langit buˈ lupaˈ. Mukaˈ iin pa pagidi bigay nu Megbebayaˈ ditu tibuukan pikumpungan nu nga suminakup diniin, puˈ mibaal gulu nilan. 23 Ita nu pikumpungan nu nga suminakup dini Kristu, itai maaˈ nug lawas ni Kristu metektub diniin, mukaˈ si Kristui megektub dig launanen, bisan adin mibetang.