9
Su Pegbaya' nu Peneligan ni Isus muka' su Ketendananen
1 Naa danaan kini, mibuang dinaan metau dau dig lawasu. Gempantek dadema pu' peneligan mau ni Isus, pu' minita'u iin gupia, su Kaunutan ta. Muka' gempantek pa pagid mibaalu amu sakup nu Kaunutan ta. 2 Pia duuni getaw ndi' metuudan dun pu' peneligan mau ni Isus, yamu pasi', mituudan amu dun. Naa, kagina suminalabuuk namu tu Kaunutan, mikpaita' amu dig launan getaw pu' peneligan nau niin. 3 Sa' medena'an nu getaw su pigbetadu, iini sembagen ku dinilan, 4 Kana' ba mbantang sugdaanu nu nga samasakupu titulu'an ku gaan muka' penginumen ku? 5 Naa, duuni nga samau peneligan ni Isus, muka' su nga ngudan nu Kaunutan ta sampay si Pedro, sa' mpanaw ilan, tendugen nilan su sawa nilan samasakup nilan. Kana' ba dema mbantang duuni sawau samasakupu tundug sia dinaan? 6 Mbantang ba si Bernabe muka' naan laaki ndi' sugdaan nu nga pektu'unan nami, kaas subay mengimbaal ami adun megleketubu'? 7 Muka' duun pai sembagu. Pinenggi' duuni sundalu, gumastu bain dig lawasen sinegayen meksundalu? Pinenggi' pa pagid, duuni memula belagen gubas. Ndi' bain maan dig bunganen? Muka' pa pagid sa' duuni megingat karniru. Ndi' ba mesu'at inumenen su gatas karniru? 8 Metuud, kinilawan laak talu' ki sembagu kini, laak ma'antu dai Palinta nu Megbebaya'. 9 Pu' nda' ba mesulat di Palintanen pingumbilin ni Moises, “Ndi' mpia egbeden sug baba' nug baka mu, saananen meglegiik.” Naa, pingma'anan dun ba nu Megbebaya' baka laak? 10 Nda' bami mesambingayay dun nu Megbebaya' pu' su getaw megdaru, sa' su meglegani, saanan nilan mengimbaal, subay duuni pedetengen nilan gilas nilan di sengku'? 11 Naa su metuud mekatag di Megbebaya', ma'niin pimula nami di ginaa niu. Gempia dayun sengku'an ami pelum di pigamut niu dinami. 12 Sa' pekpelaban diniu nu ngag duma mekpetu'un diniu su kegleketubu' nilan, subay labi pami mekepelab dun.
Dagid bisan kiai pegbaya'u, nda'u pegbia'ay, pu' tekaw buus mekesaba'u mbelebagan su keksigwag tu Gempia Petenday mekatag dini Kristu. Baa, pia ta' alanduni mbianan ku, mektigelu dun adun ndi'u mbelebagan su Gempia Petenday. 13 Pu' misuunan na niu daan tu'u pu' ki nga mengimbaal ditug Balay Pengedapan tu Megbebaya', malap nilani gaan nilan dia. Mesama da su ngag belian nu getaw Judea, pegilasan ilan di gilak sa' mekanu ilan. 14 Naa, ma'nia dademai megukit Gempia Petenday, pinalinta nu Kaunutan pu' subay pegemutan ilan nu nga ukitan nilan.
15 Laak naan, nda'u daan pegbia'ay su pegbaya'u ma'nia, muka' kana' iini sinulatu dun ini, adun mekpamutu diniu. Tumu' pai unusanu, sabaya' di mekpamutu diniu. Migangya' pau pagid di kegukitu di nda'ig bayad dun, kaas mpauku gupia sa' mawi' sia dinaan su pigangya'u. 16 Pu' sa' megukitu laak Gempia Petenday, ndi'u mpia mangya', pu' sinugu' dau laak megukit dun. Baa, sa' ndi'u megukit, mekelelaatlelaatu! 17 Sa' upama megukitu sekat laak tu mauya'an ku, mpia tindananu, laak dagid sa' sekat tu gelalu, subay megukitu dun, sa' tindanan sa' ndi', pu' pigwakil dinaan nu Megbebaya'. 18 Sa' ma'antu, ta' alandun dayuni tindan dinaan? Iin mai tindan dinaan, mekegukitu Gempia Petenday di nda'ig bayad dun, pia duuni pegbaya'u mekpebayadu.
19 Naa duun pa pagidig delendeman ku, pu' pia nda'i getaw mekegbaya' dinaan, mikpaulipenu tug launan getaw, adun melaun getawi magaku sumakup dini Kristu. 20 Kaas, sa' meguliugu tu nga getaw Judea, meginetaw Judeau, adun duun dinilani magaku sumakup dini Kristu. Sa'itada, pia ndi'u kambat dumunut tu Palinta pingumbilin ni Moises, pegbetaden ku gusay su maa' danu pigbetad nu nga getaw mekpetuud ditu Palinta. Mingma'niau dun adun magaku ilan sumalig pagid dini Kristu meglegawen dinilan. 21 Dayun sa' meguliugu pelum ditu nga kana' getaw Judea, pegbetaden ku su maa' danilan nga getaw nda'i seliganen tu Palinta, adun magaku dailan dema sumakup dini Kristu. Laak ndi'u pemilasen su Palinta nu Megbebaya', pu' mekpetuudu gupia ditug begu Palinta ni Kristu. 22 Dayun sa' megdumau pelum di samasakup ta nda' pa mpanteki kesaligen, pegbetaden ku maa' danug daniin, adun megiseg su kekpetuuden. Kaas su ngag launan pedumau, maa' danilanig betadu adun sa' mesu'at, duuni nga magaku megawen puun dini Kristu, pia ta' pebianay.
23 Kaas pia ta' alandunig baalen ku, launanen, penggulaulaan ku adun mesigwag su Gempia Petenday, adun melauni mekpetuud dun. Iini mingma'niau dun, pu' adun mpedumau di kepepia nu Megbebaya' di nga mikpetuud dun. 24 Naa misuunan niu pu' sa' duunig lumba', melauni gubek, laak sala tawan dai mekedaag muka' sugdaan. Naa yamu nga sakup ni Kristu, subay pengma'nia amu, gebek amu gusay, adun sugdaan amu, sa'itada, subay dunutan niu gusay si Kristu, adun mesugdaan amu niin ditu gekbus langit. 25 Su nga megayep ma'nia, diadia ektakenen su tegelen gebii gendaw, adun meglegintau gupia megayep. Mengma'nia adun begayan sugda mpupus da, laak ita, ektaken tai tegel ta, adun malap tai sugda ndi' mengikteb. 26 Kaas sa' ma'antu, mengma'niinu nu menandeng gubek tu pegengayanen. Saanan ku mektitulu' di nga getaw, ma'niinu nu menuntuk lelayun mesugati suntukenen, pu' mesugati titulu'u. 27 Pengmensuun ku muka' pemesaitan kuig lawasu adun tugas, sa'itada pegliaun kui melaat gayaku sia, pu' sikna ukitan ku su ngag duma mekatag di metuud, mpauku sa' ndi' dau sugdaan nu Megbebaya'.