8
Ki Gaan Bitang tu Pekenuan di ngag Ledawan
1 Naa su sinaak niu ditu sinulat niu mekatag di ginilak di ngag ledawan pektemuyen nu getaw. Metuud, launan ta, duun dawi sinuunan ta mekatag di nga maita' muka' di nga ndi' maita'. Laak, duunig duma mekpelabawlabaw saba' nu sinuunanen. Talu'u diniu, tumu' mekpinetailay ita, adun megisegi kekpetuud nu ngag duma ta. 2 Pu' sa' duun diniui samasakup ta laungen dun pu' duuni sinuunanen, kulang pai sinuunanen. 3 Laak su getaw mekpetail pasi' tu Megbebaya', iini misuunan tantu nu Megbebaya'.
4 Kaas, mekatag dig betad maan di genat ilak tu ngag ledawan, misuunan ta pu' su ngag ledawan, minget laak nda'i pantagen. Misuunan ta dadema pu' salabuuk dai Megbebaya', kana' melaun. 5 Melaun daw daani paingalan dun diwata, sa' ditug langit, sa' dinig dibabaw lupa'. Laak pia melaun dawig diwata muka' nga kaunutan daw, 6 ita, misuunan ta pu' salabuuk dai Megbebaya', ki Gama' ta. Iin dademai puunan nug launan biwat di gekleb langit bu' lupa', muka' metubu' ita pu' adun megdedengeg iin. Sala tawan dadema laaki Kaunutan ta, si Isukristu. Pibaal diniin nu Megbebaya' sug launan biwaten, muka' iini puunan gusay nu ketubu' ta.
7 Laak duuni nga samasakup ta, nda' pa nilan suunay pu' nda'i pegbaya' nu ngag ledawan. Tigaman nilan gusay sug ledawan, kaas sampay nandaw, sa' aanen nilan sug daansama' ginilak dig ledawan, laung nilan dun metamuy nilani tautau diwata. Kagina nda' pa metuuk dig delendeman nilan su metuud, laung nilan dun melemu'an nu gaan kia sug delendeman nilan. 8 Laak dagid, misuunan ta kana' gaani mekepemilang dinita mekesuun adun medawat ita nu Megbebaya'. Sa' ndi' ta aanen sug betang, nda'iduni pantagen. Sa' aanen ta pasi', nda' da gusayi pantagen. 9 Laak pia nda'iduni geligen dinita, subay peglengilamay niu kig buangen diniu kini. Pu' tekaw buus mpegdaangan dun su nga samasakup niu nda' pa metuuk dig delendeman nilan su metuud. 10 Naa yamu, duuni sinuunan niu mekatag di metuud. Duun dademai samasakup ta ndi' pa metau memili' di gempia gulaula mekatag tu ginilak dig ledawan. Iin, sa' upama maita'en amu maan diag balay pektemuyan tug ledawan, mpalinig delendemanen, kaas mpeduma maan. 11 Kaas sa' mpenggulaula ma'antu, puun tu sinuunan niu mpeglaatan niu sia su kekpetuud nu mimated diniu kia, pu' ndi' pa metau. Laak su kepatay ni Kristu, ginanti'en dadema su getaw kia. 12 Kaas, ma'niin mekesala' amu dini Kristu pebian di sala' niu di mimated diniu kia, su ndi' pa metau memili' di gempia. Lepeng mingelan niu sug delendemanen. 13 Kaas, sa' mpegdaangani samasakupu saba' nu ka'aan ku, tumu' pa ndi'u ma'aani karni, adun ndi'u mesaba' su sala' nu samasakupu.