16
Su Kesambay ni Pablo tu nga Samasakupen
1 Naa, ki mimated dinita si Febe, pailalau diniu, iinig libun megabang ditu pikumpungan nu nga sakup dia Cencrea. 2 Kagina sakup nu Kaunutan ta, melengas penembaˈen niu iin mbantang tug betad nu piglegetawan nu Megbebayaˈ. Pia taˈ alanduni mekpaingabang dun diniu, ebangay niu iin, puˈ migabang gupia tu melaun getaw sampay dinaan.
3 Naa, sambay niau dinilan senlangan si Priscila mukaˈ si Aquila, ngag limbangu megukit di Gempia Petenday mekatag dini Kristu Isus. 4 Piksaliununganu nilan di kebinesaan ku. Gempia gupiai ginau dinilan. Gempia dademai ginaa dinilan nug launan pikumpungan nu nga sakup ni Kristu di nga kanaˈ getaw Judea. 5 Sambay da niau dema tu nga sakup mekpungun lelayun diag balay ni nga Aquila.
Sambay da niau pagid tu petailen ku si Epeneto, sug bekna suminakup dini Kristu di tibuuk prubinsya Asia. 6 Sambay niau dini Maria, su minamal megabang diniu. 7 Sambay da niau dema dinilan senlangan si Junias mukaˈ Andronico, nga samau getaw Judea mukaˈ dumau dia pirisuan. Megdedengeg ilan di nga peneligan ni Kristu. Miguna dailan dema dinaan sumakup dini Kristu. 8 Sambay niau tu petailen ku si Ampliato, su sumalabuuk tu Kaunutan ta. 9 Sambay niau dini Urbano, sug limbangu dadema mangay megukit di Gempia Petenday mekatag dini Kristu. Sambay da niau dema dini Estaquis, su petailen ku sambatu. 10 Sambay pa niau pagid dini Apeles, su mitekad nai kesakupen dini Kristu. Sambay niau tu nga gapen ni Aristobulo. 11 Sambay niau dini Herodion, su samau getaw Judea. Sambay niau dadema tu nga sakup ni Kristu di nga gapen ni Narciso.
12 Sambay pa niau pagid dini nga Trifena mukaˈ Trifosa. Minamal ilan megabang tu Kaunutan ta. Sambay niau dini Persida, petailen ku dadema sambat. Minamal dadema megabang di Kaunutan ta. 13 Sambay niau dini Rufo, su migdedengeg di nga megukit di Gempia Petenday mekatag di Kaunutan ta, sampay su ginaˈen, puˈ pilepengu niin bataˈen. 14 Sambay da niau pagid dini Asincrito, si Flegonte, si Hermes, si Patrobas, si Hermas, sampay su ngag duma nilan kepetedan ta.
15 Sambay niau dinilan senlangan si Julia mukaˈ Filologo, si Nereo mukaˈ su pateden libun, sampay dini Olimpas mukaˈ dig launan piglegetawan nu Megbebayaˈ duma nilan.
16 Naa, saˈ mekpungun amu, pegdedialay amu, maaˈ nug dedial niu di gapen niu. Sinambay amu nug launan pikumpungan nu nga sakup ni Kristu dini dapit.
Katapusan Tituluˈ
17 Naa, taman taluˈu diniu, Mingumpated, ki nga mekpesuay di nga sakup nu Megbebayaˈ mukaˈ mekpeduaˈduaˈ di kekpetuud nu nga sakup, penengiin ku diniu, peglengilamay niu ilan. Maˈnia, kuminuntra ilan di gempia tinituluˈ diniu. Pegliaw niu ilan gusay! 18 Puˈ kanaˈ nu Kaunutan ta si Kristu su pektemuyen nilan, puˈ iin laaki pituud nilan, su gayak nug lawas nilan. Kagina metawakal ilan, mukaˈ sabaˈ nu kekpenalenal nilan, buus melimbungan nilan su nga kulangi kesabuten di metuud. 19 Yamu, migdedengegi kedunut niu tu Gempia Petenday, kaas liliagu dun. Mauyaˈan ku metaasi tinawan niu di kekesuun, mukaˈ meleglud diniui melaat. 20 Su Megbebayaˈ, su pikpuunan nu pianan ginaa, ndiˈ na maiben, daagenen si Satanas mekatag diniu.
Naa, penenebiin ku, mbianan niu lelayun su tulung nu Kaunutan ta si Isus.
21 Naa sinambay amu ni Timoteo, sug limbangu. Sinambay damu dema ni Lucio, si Jason mukaˈ si Sosipatro, nga samau getaw Judea.
22 Naan si Tercio, su suminulat di sulat kini, sinambayu amu, puˈ samasakup daita.
23 Si Gayo, su gapuˈ balay tinuunan ku, tandaˈ pikumpungan nu nga sakup dini, si Erasto dadema, su trisuriru dig lunsud kini, mukaˈ si Cuarto mimated dinita, sinembayan amu nilan gelaˈ. [\v 24 Penenebiin ku mbianan niu lelayun, launan niu, su tulung diniu nu Kaunutan ta si Isukristu. Amen.]
Su Kepededengeg tu Megbebayaˈ
25 Naa su Megbebayaˈ, melengas enalen ta mukaˈ pegbesaan ta. Iin su mekepepagen tu kekpetuud niu, mbantang tu Gempia Petenday pigukitu mekatag dini Isukristu. Mekepepagen tu kekpetuud niu mbantang dadema tu metuud miniben na pegbuniay, laak nemun biwasan na. 26 Nandaw ki metuud kini, pisuun na pibian di nga sinulat nu nga pimuunan nu Megbebayaˈ begudiin. Pisuun di nga tibaˈan bansa puun tu suguˈan nu tantu Megbebayaˈ, adun metuudan duni tibaˈan getaw.
27 Mendadi, gempia ta enalen mukaˈ pegbesaan su Megbebayaˈ, su mekesuun dig launan. Enalen tain mekatag dini Isukristu di ndaˈi gikteben! Amen.
Daal daitu. Pablo