14
Su nga Samasakup niu, ndiˈ niu Mpia Pegdenaˈen
1 Naa, su nga sakup ni Kristu ndaˈ pa mpanteki kesaligen, melengas penembaˈen niu. Laak ndiˈ niu ilan sualay mekatag di gempia gulaula mukaˈ di ndiˈ mpia. 2 Duuni getaw, mikpuun tu kesaligen, ndaˈi piliˈen. Su sala, kagina kulangi kesaligen, maˈaanen laak lempaan mesedaˈen di gaanen. 3 Naa, su kanaˈ mesumiliˈ, ndiˈen mpia peksudiˈani gendiˈen maˈaani karni. Maˈantu dadema su maan laak lempaan, subay ndiˈen pegdenaˈen su kanaˈ mesumiliˈ, puˈ pinembaˈ nu Megbebayaˈ. 4 Ndiˈ niu mpia pegdenaˈen su sesuguˈen nug duma niu, puˈ su gegaleneni metau dun saˈ mitembusanen su pibaal diniin, saˈ ndaˈ. Maˈniin dadema, ndiˈ ta mpia pegdenaˈen su samasakup ta, puˈ iini megbayaˈ dun su Megbebayaˈ. Mukaˈ su samasakup ta, metembusaneni kekpetuuden, puˈ meˈebangan nu Megbebayaˈ mekpetindeg dun.
5 Naa duuni getaw, delendemanen duuni gendaw pegbesaanen. Duun laungi gendaw gempia pegbesaan, duun dademai ndiˈ. Duuni sala tawan, peksemaaneni nga gendaw. Saladuaˈ, subay ndiˈ megduaˈduaˈig delendemanen dun. 6 Adin su getaw megbasa di gendaw, iini pegbesaanen dun, su kektamuyen tu Kaunutan ta. Adin su getaw kanaˈ mesumiliˈ di kaˈaanen, mesuunan ta dayun puˈ iin dademai aanenen dun, su kektamuyen tu Kaunutan ta, puˈ mekpaladpalad dun tu Megbebayaˈ. Maˈantu dademai getaw duuni ndiˈen maˈaan. Mesuunan ta puˈ iini ndiˈen maˈaan dun, su kektamuyen tu Kaunutan ta. Saˈ maan, mekpaladpalad dun dadema tu Megbebayaˈ. 7 Saanan ta tetubuˈ pa, kanaˈ laak itai metau dun. Mukaˈ saˈ matay naita, kanaˈ daita dema laaki metau dun. 8 Puˈ saˈ pektetubuˈ paita, mektamuy ita tu Kaunutan ta. Saˈ matay naita, megangag daita dema diniin. Kaas matay saˈ metubuˈ, danu Kaunutan ita. 9 Iini minatay mukaˈ mitubuˈ puliˈ dun si Kristu, puˈ adun meglekaunutan di nga sakupen, su nga tetubuˈ mukaˈ su nga minatay na.
10 Mendadi, yamu nu nga maan laak lempaan, mauma dema pegdenaˈen niui samasakup niu? Yamu dema nga ndaˈi pemiliˈen, mauma dema peksudiˈan niui samasakup niu? Ditug binayaˈ gebii buˈ gendaw mengadap ita tu Megbebayaˈ, launan ta, puˈ iin dai mukum dinita. 11 Ndaˈ ba mesulat,
“Kaliˈ pektaluˈ su Kaunutan, ‘Metuud ini, naani tantu Megbebayaˈ.
Maˈantu dadema ini,
mektamuy dinaan su tibaˈan getaw.
Mukaˈ peglegintuuden nug launan getaw puˈ naani Megbebayaˈ.’ ”
12 Kagina maˈantu, misuunan ta puˈ saladuaˈ, subay sumbag ita tu Megbebayaˈ mekatag di gulaulanen.
Ndiˈ niu Pegdaangan su Samasakup niu
13 Kaas, subay mesikpaˈ ita megigukumay. Tumuˈ pegdelendemen ta pa pagid ndiˈ ta penggulaulaan su mekegdaang tu samasakup ta. 14 Kagina suminakupu tu Kaunutan ta si Isus, mituudanu dun gupia puˈ ndaˈiduni gaan ndiˈ maˈaan. Laak dagid, saˈ duuni getaw batiken dun duuni ndiˈ maˈaan, naa ndiˈ mpia saˈ aanenen. 15 Saˈ melibuleng su samasakup niu sabaˈ nu kaˈaan niu, ndaˈ na niu pematut sug lelaat niu diniin. Mendadi saˈ meglaat su kesalig nu getaw megentiˈan nu kepatay ni Kristu sabaˈ nu kaˈaan niu, subay ndiˈ niu aanen. 16 Adin su mipemilang niu melengas, saˈ teluˈen nug duma niu melaaten, ndiˈ niu penggulaulaay. 17 Puˈ su kaˈaan ta mukaˈ keginum ta, ndaˈig labeten tu Keglekaunutan nu Megbebayaˈ. Iin daig duuni pantagen, su kekesuun, su gempia ginaa mukaˈ sug leliag mikpuun da tanan tug Balakat nu Megbebayaˈ. 18 Saˈ duuni mektamuy dini Kristu maˈnia, naa leliagen dun su Megbebayaˈ, mukaˈ pegbesaan dadema nu ngag duma getaw.
19 Kaas, subay penemalan ta penggulaulaay su mekegbegay pianan ginaa mukaˈ su mekepaiseg di kesalig ta dini Kristu. 20 Ndiˈ niu dayun mpeglaatan su pegbaalen nu Megbebayaˈ dialem ginaa nu samasakup niu sabaˈ nu gaan. Mesuˈat aanenig launan ginis gaan, laak ndiˈ maˈaan su mekegdaang di samasakup ta. 21 Gempia na niu belengan aanayi karni, peginum mukaˈ penggulaulaay bisan taˈ alandun, saˈ mekegdaang di samasakup niu. 22 Adin su mituudan amu dun mikpuun tu kesalig niu dini Kristu, pegbuni niu deliˈ, puˈ yamu laak nu Megbebayaˈi mekesuun dun. Ndiˈ niu deliˈ pesuunay su nga samasakup niu. Pektalentenay niu ini, leliagen su getaw saˈ ndaˈi pegbiksuˈanen di penggulaulaanen, su kebaalen dun di gempia ginaanen. 23 Laak dagid, saˈ duuni getaw, migduaˈduaˈ dig delendemanen su gininisan pengaanenen, dayun aanenen, ukuman nu Megbebayaˈ, puˈ ndaˈ sekat di kesaligen su pinggulaulanen. Adin su penggulaula nu getaw ndaˈ peksekat di kesaligen, iini salaˈ.