10
1 Naa, uu Mingumpated, ki nga samatawu su nga sapuˈ ni Israel, mauyaˈan ku gupia di ndiˈ megduaˈduaˈig delendeman ku, megawen ilan. Penenebian ku ilan gusay ditu Megbebayaˈ. 2 Misuunan ku gupia, mukaˈ peglegintuuden ku diniu, puˈ menamal ilan sia mektamuy tu Megbebayaˈ, laak su kektamuy nilan, kanaˈ mekpuun tu metuud sinuunan. 3 Puˈ ndaˈ nilan mesuunayi gempia nilan penggulaulaan adun mpemilang ilan mekesuun. Laung nilan dun, subay penemalan nilan dunutay su nga pinalintanen, kaas ndaˈ ilan metuuday dun sug betad nu Megbebayaˈ pemilangeneni nga getaw mekesuun. 4 Puˈ tinubus ni Kristu su pegbayaˈ nu Palinta nu Megbebayaˈ, kaas nandaw, adini getaw mekpetuud diniin, pemilangen nu Megbebayaˈ mekesuun.
Sug Launan Getaw Sumalig, Megawen
5 Naa, saˈ su getaw dunutanen sug betad nu Palinta nu Megbebayaˈ adun pemilangen sia nu Megbebayaˈ mekesuun, duuni sinulat ni Moises mekatag diniin. Ndaˈ ba mesulat, laungen, “Adini getaw dumunut tu nga pinalinta nu Megbebayaˈ, malapeni ketubuˈ mekpuun ditu.” 6 Laak saˈ su getaw sumalig ditu Megbebayaˈ adun mpemilang mekesuun, duun dademai misulat mekatag diniin. Ndaˈ ba mesulat, “Ndiˈ mu betangay di ginaa mu puˈ subay duuni luntu ditug langit” (saˈitada, adun pelusadenen dinig lumbang si Kristu). 7 “Mukaˈ ndiˈ mu na kambat betangay di ginaa mu puˈ subay duuni lumusad ditu guliˈan nu minatay” (saˈitada, adun uitenen dinig dibabaw si Kristu genat tu kepatayen). 8 Iin pai misulat kanugdiin, laungen, “Su pimuun nu Megbebayaˈ, mesempel na diniˈa. Diin da ginaa mu, mukaˈ diin da babaˈ mu.” Kia su Gempia Petenday pegukit nami diniu mekatag di kesalig niu dini Kristu. 9 Puˈ saˈ meglegintuuda di ngag duma mu puˈ si Isusi Kaunutan ta, mukaˈ saˈ metuudan ka dun puˈ pitubuˈ puliˈ nu Megbebayaˈ, guunen ka niin di ginukuman dinita nu Megbebayaˈ. 10 Puˈ saˈ sumaligi getaw dini Kristu, pemilangen nu Megbebayaˈ mekesuun, mukaˈ saˈ ukitenen su kesaligen tu ngag dumanen, megawen. 11 Maˈantui misulat pa pagid kanugdiin, laungen, “Adin su sumalig diniin, ndiˈ mekpelilu.” 12 Kig launan getaw, duunig labeten dun, ndaˈi pigisu dun su getaw Judea mukaˈ su kanaˈ getaw Judea, puˈ salabuuk dai tantu Kaunutan di tibaˈan getaw, mukaˈ ndaˈi gikteb nu kepianen dig launan mekpaingabang diniin. 13 Maˈniai misulat kanugdiin, laungen, “Adin su getaw mekpaingabang tu Kaunutan, iini guunenen.”
14 Laak, ndiˈ mesuˈat mekpaingabangi nga getaw dini Kristu, saˈ ndaˈ ilan metuuday dun. Ndiˈ mesuˈat mekpetuudi nga getaw diniin, saˈ ndaˈi midengeg nilan mekatag diniin. Ndiˈ mesuˈat medengeg nu nga getaw mekatag diniin, saˈ ndaˈi megukit dun dinilan. 15 Mukaˈ ndiˈ pa pagid mesuˈat megukit, saˈ ndaˈ suguˈay. Laak, duuni sinuguˈ, puˈ ndaˈ ba mesulat kanugdiin, “Melengas lai gupiai pegdateng nu nga megukit Gempia Petenday mekatag di keseksud nu getaw tu Megbebayaˈ.” 16 Laak dagid, pia maˈantu, ndaˈ megelaˈ metuuday dun su nga mikedengeg tu Gempia Petenday, puˈ sinulat ni Isaias kanugdiin, laungen, “Uu Kaunutan, taˈ taway duni mituudan dun su ginukit nami? Ndaˈidun.” 17 Mendadi, iini puun tu kesalig nu getaw, su kedengegen di Gempia Petenday. Mukaˈ iini puun tu kedengegen dun, su kegukit tu Gempia Petenday mekatag dini Kristu.
18 Naa, saaken ku saˈ ndiˈ ba metuud puˈ su nga getaw Judea, midengeg nilan su ginukit kiin? Midengeg na nilan tantu, puˈ ndaˈ ba mesulat di Misulat Taluˈ nu Megbebayaˈ,
“Su tinaluˈ nilan, mileep na di tibuukan lumbang.
Su ginukit nilan, midepet na ditu pingikteban nug lupaˈ.”
19 Saaken ku pelum, saˈ ndiˈ ba metuud puˈ misabut nu nga sapuˈ ni Israel su ginukit? Mialapu bekna sembagu di tinaluˈ nu Megbebayaˈ sinulat ni Moises kanugdiin, laungen,
“Yamu nga piglegetawan ku, pepengimbeguun ku amu di nga kanaˈ getaw Judea.
Su nga getaw benguˈbenguˈen, pepangitu amu dinilan.”
20 Keduaˈen, labi pa gembeluˈ si Isaias, kaliˈ pektaluˈ,
“Mibaanganu nu nga getaw ndaˈu nilan penengaway.
Mikpaitaˈu tu nga getaw ndaˈu nilan laaway.”
21 Laak duun pai sinulat ni Isaias mekatag di nga sapuˈ ni Israel, laungen, “Lilabungu sabaˈu menembaˈ dinilan, su nga getaw mibuklusi kemilasen dinaan.”