7
Penenggiˈan su Senlangan
1 Naa, Mingumpated, mesabut niui sunguun ku sulatay, puˈ sug betad palinta, misuunan niu, launan niu. Su palinta, iin su meguit di getaw sampay matengi gumulen. 2 Pinenggiˈig libun, sinegay pektetubuˈ pai sawanen, diin pa gengkeman nu sawanen, miksekat tu palinta. Laak, saˈ matay nai sawanen, meleksunen nai palinta. 3 Kaas, saˈ upama uliˈanenig lain laki sinegay tetubuˈ pai sawanen, paingalan dun megdusa. Laak dagid, saˈ upama minatayi sawanen, mileksuneni palinta. Mukaˈ saˈ penginsuaan nug lain laki, kanaˈ na dusa. 4 Naa yamu, Mingumpated, maˈnia damu dema. Kagina maˈniin amu sengkapan nug lawas ni Kristu, su kepatayen, minatay damu dema. Kaas kanaˈ namu di gengkeman nu Palinta, puˈ suminalabuuk amu dig lain, saitada dini Kristu. Su ketubuˈen puliˈ, gitunganen dun mitubuˈ damu dema puliˈ, adun penggulaulaan ta su gempia, sug leliagen dun su Megbebayaˈ. 5 Su kedunut ta pa tug betad nu kinilawan, pidelendem dinita nu Palinta su melaat gayak ta. Kiai migbayaˈ di ginaa ta, mukaˈ deksuˈanen ia, kepatay ta sia. 6 Laak nandaw, mileksu ta su Palinta, puˈ maˈniin daita minatay mekatag di migbalud dinita, tug daansamaˈ mikpedelendem dun dinita. Su kektamuy ta tu Megbebayaˈ, kanaˈ na nu kedunut ta tu Misulat Palinta, puˈ pektemuyen tain miksekat dig Balakaten.
Su Palinta buˈ Salaˈ
7 Naa kagina maˈantu, saˈ su Palinta, taˈ alandun mai gempia ta teluˈen? Mesuˈat ta ba teluˈen puˈ melaati Palinta nu Megbebayaˈ? Ndiˈ lai! Su Palintai mikpesuun dinaan puˈ melaat gupiai salaˈ. Pinenggiˈ, ki kesaku, ndaˈu sia mesuunay puˈ salaˈ, saˈ ndaˈ sia palintaay, “Ndiˈa mayak tug danug duma mu.” 8 Benaˈ misuunan ku su pinalinta, mikesikaw dayunig betad mekesalaˈ tu pinalinta, mukaˈ milamug dayun di gunedui gayak. Puˈ saˈ sia ndaˈiduni pinalinta, ndaˈi mekesuun tu salaˈ. 9 Su ndaˈu pa mesuunayi pinalinta, metubuˈ pau, puˈ maˈniin ndaˈiduni salaˈu. Saˈ mitituluˈan nau, milamug dayunig betad mekesalaˈ di gunedu, 10 kaas maˈniin nau minatay. Iin siai tinituluˈu dun nu Megbebayaˈ, puˈ adun mesuunan ku sug bianan di tantu ketubuˈ. Laak danaan, mibianan ku iini miukumanu dun, su pinalinta. 11 Pisikaw nu palinta su salaˈ, kaas milimbunganu, puˈ laung ku dun, ketubuˈig deksuˈanen sia. Masiˈ kepatay!
12 Misuunan ta puˈ su Megbebayaˈi pigenatan nu Palinta. Su nga tituluˈ dia Palinta, genat dadema diniin, kaas melegdeng mukaˈ melengas. 13 Taˈ alandun dayuni maˈananen? Iin bai mikesabaˈ dinaan su melengas? Kanaˈ lai! Puˈ iini mikpatay dinaan su salaˈ, pibian di gempia tituluˈ, adun medayagig betad nu salaˈ. Mendadi, mibuasan nu palinta puˈ sug betad mekesalaˈ, melaat gupia, mukaˈ naan, maˈniinu minatay na.
Miksinibelaˈani Ginaa nu Getaw
14 Naa ki Palinta, misuunan ta puˈ genat tu Megbebayaˈ. Laak naan, kilawan dau, mukaˈ maˈniinu piksaluy tug betadu mekesalaˈ, kaas gulipenu nug betadu. 15 Ndiˈu mesabuti pigbetadu, puˈ iini pinggulaulau, su ndaˈ dig delendeman ku, sabayaˈ tu mauyaˈan ku penggulaulaay. 16 Kagina pinggulaulau su ndaˈ dig delendeman ku, mipantek puˈ misanguˈu su kelengas nu Palinta. 17 Saˈ maˈantu, kanaˈ naan tantui minggulaula dun, puˈ sug betad nug lawasu mekesalaˈ, iin su minggulaula dun. 18 Misuunan ku puˈ ndaˈiduni kekesuun dig lawasu, saˈitada, ndaˈi melengas mikpuun dig betadu kinilawan. Puˈ pia duuni mauyaˈan ku penggulaulaan ku su gempia, ndiˈu megaga. 19 Su melengas, ndiˈu mpenggulaula, pia mauyaˈan ku. Laak iin dai mpenggulaulau, su melaat ndaˈ dig delendeman ku. 20 Naa, saˈ penggulaulaan ku su ndaˈ dig delendeman ku, maˈananen, kanaˈ na naani minggulaula dun, puˈ iini minggulaula dun, sug betad mekesalaˈ miseled dig lawasu.
21 Kaas mbianan kuig betad maˈniniˈ. Saˈ mauyaˈan ku penggulaulaan ku su melengas, metulimbagu sungkin tu melaat. 22 Su Palinta nu Megbebayaˈi mauyaˈan ku gupia di ginau. 23 Laak lain betadi miseluk dinaan megbayaˈ dig betadu kinilawan, puˈ miksumpakiˈ di Palinta mitaguˈ dig delendeman ku mukaˈ mingulipen dinaan. Maˈnia, gulipenu nug betad mekesalaˈ. 24 Apelai! Milegenanu lai dun gupia! Saaken ku dayun, taˈ mai kegawen dinaan di kekilawan ku mekangay ditu kepatay di ndaˈi tamanen? 25 Mukaˈ didaliˈu sembagay, mekeglegawen dinaan su Megbebayaˈ, sabaˈ nu Kaunutan ta si Isukristu! Kaas mikpaladpaladu diniin, pibian dadema dini Isus pelum.
Mendadi, iini kebetangu. Su Palinta nu Megbebayaˈi dunutan nug delendeman ku, laak su kekilawan ku, mitulu na tug betad mekesalaˈ.