5
Piseksud ita ni Kristu tu Megbebayaˈ
1 Mendadi ita, kagina pimilang ita nu Megbebayaˈ mekesuun sabaˈ nu kesalig ta, piseksud daita dema nu Kaunutan ta si Isukristu ditu Megbebayaˈ. 2 Mukaˈ piduma naita niin di tulungen mbianan ta gebii gendaw mekatag di kesalig ta. Kaas liliag ita tu pedetengen ta puˈ ditug binayaˈ gebii buˈ gendaw, mpeduma ita tantu tu kegdedengeg nu Megbebayaˈ. 3 Sinangkaliˈ pa tanan, liliag ita tu kegleget dinita, puˈ misuunan ta saˈ peglegetan ita, meglegintau paita mektigel dun. 4 Mukaˈ saˈ metau naita mektigel di kegleget dinita, leliagen dinita su Megbebayaˈ. Mendadi kagina leliagen dun su Megbebayaˈ, pedetengen ta puˈ pepianan ita niin. 5 Ki pedetengen ta, kanaˈ kebulug, puˈ lilaatan ita gupia nu Megbebayaˈ pibian dig Balakaten bigayen megbenwa di ginaa ta.
6 Naa, su ndaˈ paita megawen, saˈ minateng nai gendaw tinduˈ nu Megbebayaˈ, minatay si Kristu megabang dinita nu nga memilas getaw. 7 Melegen ta pegdelendemeni getaw meliag matay adun megabang dig duma ndaˈi salaˈen. Asa duuni getaw mauyaˈanen matay megabang di mekesuun getaw. 8 Laak su Megbebayaˈ pasiˈ, pinitaˈen dinita su kebagel petailanen, puˈ sinegay mikesalaˈ paita getaw, minatay si Kristu megabang dinita. 9 Kagina mipemilang ita nu Megbebayaˈ mekesuun miksekat tu kepatay ni Kristu, labi naita niin megawen di ginukumanen tug launan getaw. 10 Puˈ saˈ saanan ta kumuntra tu Megbebayaˈ, mipeseksuden ita diniin sabaˈ nu kepatay nug Bataˈen, labi na guunen ita niin meksekat di ketubuˈen nemun. 11 Pidag pa tanan, liliag ita tu pipenggulaula nu Megbebayaˈ di Kaunutan ta si Isukristu, puˈ piseksud ita ni Isukristu ditu Gamaˈen Megbebayaˈ.
Peguntain ta si Adan buˈ si Kristu
12 Naa sug betad mekesalaˈ, iini mituaˈ dun dinig lumbang, puˈ duuni sala tawan mikesalaˈ kanugdiin, si Adan. Sabaˈ nu salaˈ ni Adan, pipatay nu Megbebayaˈ, kaas mileep na dig launan getaw ki gasalen matay, puˈ mikesalaˈ dademaig launan getaw. 13 Su ndaˈ pa palintaay nu Megbebayaˈ su Palintanen, daan na dinig lumbang sug betad mekesalaˈ. Kagina ndaˈ pai Palinta, ndaˈ pa mpengebeti salaˈ. 14 Pia maˈantu, genat di timpu ni Adan sampay di gendaw pisuun nu Megbebayaˈ dini Moises su Palintanen, mesuunan ta mikesalaˈ da gusay su nga getaw, puˈ launan nilan, minatay. Minatay dailan gusay, asa su salaˈ nilan, kanaˈ maaˈ nu salaˈ ni Adan, su mimilas tu tinituluˈ diniin nu Megbebayaˈ.
Naa, si Adan mukaˈ ki getaw metuaˈ pa dig binayaˈ gebii buˈ gendaw, mesuˈat peguntain tailan. 15 Laak ndaˈ ilan duaˈ peksama, puˈ ki tulung nu Megbebayaˈ pibian di sala tawan kini si Kristu, kanaˈ maaˈ nu salaˈ ni Adan. Sala da ni Adan, laak minatay su melaun getaw sabaˈ nu melaat pinggulaulanen. Gembagel paig lelaat nu Megbebayaˈ ditu salaˈ ni Adan, puˈ tinulungen su melaun getaw sabaˈ nu kepepia dinita nu sala tawan si Isukristu. 16 Ndiˈ meksamai mibianan ta sabaˈ nu tulung nu Megbebayaˈ mukaˈ su mibianan ta sabaˈ nu melaat gulaula nu sala tawan kia si Adan. Sikna na mikesalaˈ si Adan, inukuman dayun nu Megbebayaˈ mikesalaˈ su nga getaw. Laak kagina tinulung ita nu Megbebayaˈ, pimilang ita niin mekesuun, pia mikesalaˈ daita dema gupia. 17 Metuud, kagina mimilas si Adan, mengasal menumpat, matay sug launan getaw. Misebuˈan paita dun su tulung nu sala tawan si Isukristu, puˈ mpeduunan ketubuˈ ndaˈi tamaneni nga getaw dumawat tu gembagel tulung nu Megbebayaˈ, mukaˈ pimilangen nailan mekesuun mikpuun dini Kristu. Mukaˈ pa pagid saanan nilan metubuˈ pa, mekedaag dailan dema di melaat.
18 Mendadi sabaˈ nu kemilas nu sala tawan, inukuman nu Megbebayaˈ sug launan getaw salaˈen, lagaˈ na ginaanen. Maˈnia dademai kekesuun pinggulaula nu sala tawan pelum, saˈitada su kepatayen. Sabaˈ nu pinggulaulanen kia, pibeluy naita nu Megbebayaˈ di ginukumanen dinita, mukaˈ bigayen dinitai ketubuˈ ndaˈi tamanen. 19 Sabaˈ nu kemilas nu sala tawan kia si Adan, mibaluy mikesalaˈ sug launan getaw. Maˈnia dadema, pemilangen nu Megbebayaˈi melaun getaw mekesuun, mikpuun di kekpetuud nu sala pelum, si Kristu.
20 Naa, iini pisuun dun nu Megbebayaˈ su Palintanen dini Moises, puˈ adun medugangi kemilas dun. Laak dagid, saˈ migdugangi salaˈ nu nga getaw, pibagel nu Megbebayaˈ su tulungen dinita nu nga getaw. 21 Mendadi, daansamaˈ mengasal menumpat, matay su nga getaw mikpuun di salaˈ. Laak nandaw, kagina pimilang ita nu Megbebayaˈ mekesuun, su tulungeni megbayaˈ na di ginaa ta, mukaˈ su gasal ta, ketubuˈ ndaˈi tamanen mikpuun di kepatay nu Kaunutan ta si Isukristu.