3
1 Naa saˈ maˈantu, su nga getaw Judea, gembagel pa bai pantagen batul nu nga kanaˈ getaw Judea? Mukaˈ ki tuˈus nilan kia, duun bai pantagen? 2 Duun lai! Gembageli pantagen dig launan kibianan. Beknanen, siligan ilan nu Megbebayaˈ Misulat Taluˈen. 3 Metuud, duuni getaw Judea kanaˈ meseligan. Laak, pia maˈantu, penuuden tantu nu Megbebayaˈ su pinasaden dinilan kanugdiin. 4 Puˈ pia belusenig launan getaw, ndaˈiduni teluˈen nu Megbebayaˈ, subay metuud. Ndaˈ ba mesulat kanugdiin,
“Subay mpaitaˈ mu su kekesuun mu dig launan taluˈ mu.
Mukaˈ subay mekegdaaga saˈ dengaten ka.”
5 Laak dagid, pinenggiˈ saˈ mpaitaˈ ta di kemilas ta puˈ mekesuun pasiˈ su Megbebayaˈ, taˈ maig delendeman ta dun? Delendeman ta ba sia puˈ kanaˈ ita mbantang ukumen nu Megbebayaˈ? Kinilawan laaki sinulatu kini. 6 Ndiˈ lai mesuˈat! Puˈ saˈ metuud, kanaˈ meglepengi kaukum nu Megbebayaˈ, kendutaˈi kaukumen dun sug launan getaw?
7 Naa, saˈ pinenggiˈ megbalusu, mukaˈ puun tug balusu maitaˈ dayun puˈ meglegintuud su Megbebayaˈ, mauma dema ukumen dinaan mikesalaˈu, asal metaas pai kegdedengeg nu Megbebayaˈ sabaˈ nug balusu? 8 Mukaˈ pa pagid, mauma dema ndiˈ teluˈen, “Penemalan ta penggulaulaay su melaaten, adun medeksuˈ di melengas?” Duun daani getaw miglekuti dinaan, puˈ laung nilan kiai tituluˈan ku. Ukuman pailan nu Megbebayaˈ di mitibabaˈ nilan!
Ndaˈiduni Getaw Mekesuun
9 Naa mendadi, taˈig batik niu dun? Su kebetang nami nga getaw Judea, melengas pa ba di pegitaˈen nu Megbebayaˈ batul nu kebetang niu nga kanaˈ getaw Judea? Kanaˈ! Ndaˈi pigbidaˈanen. Ndiˈ ba metuud pinitaˈu na daan diniu puˈ gempantek sug launan getaw, milabuˈ dig betad nilan mekesalaˈ, su nga getaw Judea sampay su nga kanaˈ getaw Judea? 10 Ndaˈ ba mesulat,
“Saladuaˈ, ndaˈiduni mekesuun di pegitaˈen nu Megbebayaˈ.
11 Ndaˈidun dademai getaw mesabuten saˈ taˈ alanduni kekesuun.
Ndaˈi getaw pekpenengaunenig bianan pangay tu Megbebayaˈ.
12 Tiliudan nug launan getaw su Megbebayaˈ.
Kig launanen kia, mikesalaˈ.
Bisan sala tawan, ndaˈiduni mekesuun.
13 Su peneluˈen nilani maaˈ nug lebeng binulingkal, sabaˈ kelaatenen.
Ndaˈiduni kabit nilan, lumbus balus.
Mukaˈ iin dademai teluˈen nilan, su kegbulang nilan tug duma nilan, maaˈ nu telis nu mamak.
14 Maˈniin miglimpawaˈig babaˈ nilan di tuyud.
15 Iini mededaliˈ nilani pemesait mukaˈ patay.
16 Bisan tandaˈ ilan pangay, pikiatiat nilani kelaatan mukaˈ kelegenay nilan di nga getaw.
17 Ndiˈ nilan eksudeni nga getaw di kelinaw.
18 Ndaˈ dig delendeman nilan su Megbebayaˈ, kaas ndaˈ nilan iin pegbesaay, mukaˈ ndaˈ nilan endekay.”
19 Naa, su kelaun Palinta nu Megbebayaˈ, mesuunan ta puˈ iin laakig duunig labeten dun, yami nga getaw Judea. Kagina maˈnia, sug launan ta, ndaˈi gempia ta sembag dun sug dangat dinita, kaas mbianan ta pai ginukuman nu Megbebayaˈ, puˈ migelaˈ mekesalaˈ sug launan getaw. 20 Puˈ pia sala tawan, ndaˈiduni mekesuun di pegitaˈen nu Megbebayaˈ mekatag di kedunuten tu Palinta. Iini pinalinta dun dinita nu Megbebayaˈ, adun mesuunan nug launan getaw, mikesalaˈ ita.
Taˈ mai Kemilang dun nu Megbebayaˈ Mekesuuni nga Getaw?
21 Naa, nandaw, kig bian nu Megbebayaˈ tu kemilangen di nga getaw mekesuun, biwasanen na. Kanaˈ iinig bian dun su kedunut nu nga getaw di Palinta. Pia maˈantu, duuni misulat di Palinta nu Megbebayaˈ pisulaten dini Moises mukaˈ su ngag duma pimuunanen dengantu mekatag di kepesikesuun di getaw. 22 Pemilangen nu Megbebayaˈ mekesuun su nga getaw pebian di kesalig ta dini Isukristu. Sug launan getaw mekpetuud diniin, mesamai kemilangen dun, saˈ su getaw Judea, saˈ kanaˈ. 23 Puˈ mikesalaˈ ita, launan ta, mukaˈ melayuˈ naita di kelengas nu pegbayaˈ daansamaˈ mitenduˈ nu Megbebayaˈ gasal getaw. 24 Laak dagid, tinulung naita nu Megbebayaˈ di ndaˈi sugda ta dun. Pemilangen ita mekesuun, sabaˈ nu kegantiˈ ni Kristu lekaten ita di salaˈ. 25 Mitenduˈ nu Megbebayaˈ si Kristu kini matay megusan duguˈ, adun launan getaw sumalig diniin, pedesunenen di salaˈ nilan. Mingmaˈnia adun pesuun nu Megbebayaˈ di nga getaw puˈ iini mekesuun. Pia daansamaˈ pituyang nu Megbebayaˈ su salaˈ nu getaw sabaˈ nug lelaaten dinilan, 26 nandaw, pisuunen di nga getaw puˈ meglepengi kaukumen di getaw, puˈ pengebetenen nai salaˈ nilan. Mukaˈ pisuunen na puˈ mesuˈat na pemilangen mekesuun su mekpetuud dini Isus.
27 Naa maˈantu, taˈ mai gempia ta pengangyaˈ? Ndaˈidun! Mauma dema? Puˈ su kemilang dinita nu Megbebayaˈ mekesuun, kanaˈ sabaˈ nu kedunut ta tu Palinta. Iini pemilangen ita niin dun mekesuun, puˈ sumalig ita diniin. 28 Puˈ mituudan ita dun puˈ pemilangen nu Megbebayaˈ mekesuun su nga getaw sabaˈ nu kesalig ta laak, kanaˈ nu kedunut ta tu misulat Palintanen. 29 Su getaw Judea ba laaki mektamuy tu Megbebayaˈ? Saˈ pektemuyen dadema nu nga kanaˈ getaw Judea? Pektemuyen dadema nilan lai! 30 Asa salabuuki Megbebayaˈ. Pemilangen mekesuun su nga getaw Judea meksekat di kesalig nilan dini Kristu. Pemilangen dadema mekesuun su nga kanaˈ getaw Judea, saˈ sumalig dailan dema diniin. 31 Mingmaˈanan ba ia puˈ tiliudan nu kesalig ta su Palintanen? Ndiˈ lai! Kagina sumalig ita dini Isukristu, dumunut daita dema tu Palintanen.