19
Ditug Efeso si Pablo
1 Naa selian ni Apolos dia Corinto, si Pablo, minian diag binuidan, dayun tumigbeng ditug Efeso. Benaˈ minateng dia, duuni nga sakup ni Isus mipekitaˈen. 2 Kaliˈ saak dinilan si Pablo, “Pingepuˈan mamu nug Balakat nu Megbebayaˈ sikna mikpetuud amu?”
Simbag nilan, “Baa, ndaˈ nami medengeg puˈ duunig Balakat nu Megbebayaˈ.”
3 Sinaak ni Pablo, “Naa saˈ maˈnia, saˈ binunagan amu tubig, taˈ alanduni pituud niu?”
Kaliˈ ilan sembag, “Pituud nami su kegbunag ni Juan tubig.”
4 Kaliˈ pektaluˈ si Pablo, “Su kegbunag ni Juan tubig tu nga getaw, kitui tuˈus di keksikesuun nilan. Mukaˈ padun tinaluˈ ni Juan tu nga getaw Israel puˈ petuuden nilan ki sungu mateng mbinayaˈ diniin, saˈitada si Isus.”
5 Mendadi ki nga sakup ni Isus kia, benaˈ midengeg nilan ki tinaluˈ kia ni Pablo, mikpebunag ilan puliˈ tubig, tuˈus di kesakup nilan tu Kaunutan si Isus. 6 Benaˈ dipenan ilan ni Pablo, pingepuˈan ilan tuˈu nug Balakat nu Megbebayaˈ. Mikekabit ilan dayun dig lain pikebitan dakus migwali ilan taluˈ nu Megbebayaˈ. 7 Duun saani sepuluˈ buˈ duaˈ tawanig laun nilan.
8 Tubus itu, minangay si Pablo tu simbaan nu getaw Judea, minibeluˈ dayun megukit tu nga getaw dia, gikteb telu bulan. Minamal megyagayaga dinilan, pingmetuudanen sia ilan mekatag di kesakup tu Keglekaunutan nu Megbebayaˈ. 9 Laak sug duma dun, meketegasi gulunen, mimilas ilan, dakus piglaat teluˈan nilan dia gedapan nu tibuuk pikumpungan sug Bianan nu Kaunutan si Isus. Sumiway dayun dinilan si Pablo, mukaˈ pisuayen dadema dinilan su nga sakup ni Isus. Guminalin si Pablo ditu gusekilaan ni Tirano, gendawgendaw dayun migyaga dia. 10 Iin nai migbatag sampay duaˈ taun, kaas su taluˈ nu Megbebayaˈ, midengeg nug launan getaw dig benwa Asia kia, su nga getaw Judea sampay su nga kanaˈ getaw Judea.
Su ngag Bataˈ ni Esceva
11 Mendadi, mekesalebuˈ gupiai pinggulaula nu Megbebayaˈ pebian dini Pablo. 12 Su nga pegladu, saˈ uiten dinilani panwilu ni Pablo atawaka ginabas penepetenen, metekaw ilan mauliˈay, dakus mautidan dinilani menenulay. 13 Mendadi, duuni nga getaw Judea megleepleep dig benwa megutid di menenulay, indanan da nilan dema sembayay su ngalan ni Isus. Miktaluˈ ilan di menenulay, “Utidan ku amu di pegbayaˈ ni Isus, su pegukiten ni Pablo.” 14 Duuni pitu tawan mekpated, ngag bataˈ nu Tampusan Metaas Belian nu getaw Judea ngalanen si Esceva, maˈantu dademai pinggulaula nilan.
15 Dagid su menulay, saˈ inutidan sia nu ngag bataˈ ni Esceva kia, miktaluˈ dinilan, “Si Isus, miˈilalau, mukaˈ si Pablo dema. Laak yamu, adin amu getaw?”
16 Linumpakan dayun nu piglegetan nu menulay kiai ngag bataˈ ni Esceva kini, dinaagen ilan gelaˈ, mikelaguy ilan dayun diag balay kia, milebasan ilan mukaˈ ingelan. 17 Benaˈ misuunan nu nga getaw diag Efeso su mipenggulaula, mindek ilan gupia, su nga getaw Judea dakus su kanaˈ. Inal dayun nu nga getaw su Kaunutan si Isus. 18 Melaun mikpetuud mituaˈ dayun dini nga Pablo, pegukiten nilan su melaat gulaula nilan. 19 Duun paduni nga mensaled, pinungun nilan su ngag libru nilan sinulat dun su nga ginis saled, sinsulan nilan dayun dia gedapan nu nga mikpetuud. Piglekwinta dayun sug lagaˈ nu ngag libru kia, lima puluˈ ngibu denario. 20 Maˈnia, minamal gusay mesigwag su taluˈ nu Kaunutan Megbebayaˈ, ndiˈ megaga nu nga getaw su ginuungen.
Su Samuk tug Efeso
21 Tubus itu si Pablo, delendemanen biananen puliˈ su Macedonia mukaˈ Grecia, dayun mundas tu Jerusalem. Laung ni Pablo, “Dayun genat ditu Jerusalem, subay maitaˈu sug Roma.” 22 Saˈ maˈnia, sinuguˈ ni Pablo meguna tu Macedoniaig duaˈ tawan megabang diniin, si Timoteo mukaˈ si Erasto. Iin, mibilin pa diag Asia.
23 Naa di gendaw kiin, misasaw gupia sug lunsud Efeso sabaˈ dig Bianan nu Kaunutan si Isus. 24 Puˈ duuni getaw menensal dig bulawan selapiˈ, ngalanen si Demetrio, megbaal balaybalay penunggilinganen sug balay pengamuyuˈan dig diwata libun, ngalanen si Diana. Melaun miselapiˈ nu nga tinindanan ni Demetrio. 25 Mendadi kini si Demetrio, pinungunen su tinindananen dakus su sama menensalen, kaliˈ pektaluˈ dinilan, “Yamu nga getaw, misuunan niu iini puun nu kegdatuˈ ta, su pendayan ta kini. 26 Mendadi, minitaˈ niu dakus midengeg niu su pinggulaula ni Pablo kiin. Laungen, sug ledawan pigbaal nu kilawan, kanaˈ tantu diwata. Melaun getaw mituudan dun, dinig Efeso sampay di tibuuk Asia. 27 Naa saˈ maˈantu, mbuus meglaatig dengeg nu pindayan ta, mukaˈ meglaat dadema su kegbasa nu getaw tug balay pengamuyuˈan ta tu mekesalebuˈ diwata si Diana. Pidag pa tanan, mbuus mbeleng sug dengeg ni Diana, sug diwata pektemuyen nu tibaˈan getaw dinig Asia sampay su tibaˈan getaw dig dibabaw lumbang!”
28 Naa benaˈ midengeg nu nga melaun getaw ki tinaluˈ kia ni Demetrio, mitutung ilan gangit. Minekeg ilan dayun megbeksay, laung nilan, “Mekesalebuˈ diwata si Diana, su pektemuyen nu getaw Efeso!”
29 Misasaw dayun su tibuuk lunsud. Migdengan dayun gubek dia tebuˈan su nga getaw, piminteng nilan dia si Gayo mukaˈ si Aristarco, duaˈ tawan getaw Macedonia, tendug ni Pablo. 30 Naa si Pablo, mauyaˈanen sia madap tu nga getaw kia, dagid ndaˈ begay nu nga sakup ni Isus dia. 31 Duun dademai nga kaunutan dig benwa Asia kia, sambat ni Pablo, pimuun nilan si Pablo, ndiˈ na mekpaitaˈ dia tebuˈan.
32 Naa ditu tebuˈan, misasaw gupia su nga getaw. Sug duma, salaig beksainen, sug duma, sala pelum, puˈ su tibaˈanen, duun dai misuunanen, saˈ taˈ alanduni pikumpungan nilan. 33 Naa duuni getaw, ngalanen si Alejandro, piadap nu nga getaw Judea. Pipengamed sia ni Alejandro su nga getaw, adun kineegan nilan sia su sembagen. 34 Laak saˈ miˈilala nilan puˈ getaw Judea iin, mimegdengan ilan memeksay taman duaˈ uras, laung nilan, “Mekesalebuˈ diwata si Diana, su pektemuyen nu getaw Efeso!”
35 Mendadi tigaˈwan, su sikritaryu dig lunsud kia, pipengameden su nga getaw. Kaliˈ dayun pektaluˈ, “Yamu nga samau getaw Efeso! Suunan nug launan getaw puˈ ita nu nga getaw Efeso, itai megingat tug balay pengamuyuˈan tu mekesalebuˈ diwata si Diana, mukaˈ ita dademai megingat tu meˈelig batu kiin milabuˈ genat tug langit. 36 Naa kagina ndaˈi getaw mekepemalaw dun, subay mengamed amu, puˈ mbuus mekesabaˈ amu. 37 Puˈ iwit niu dini kig duaˈ tawan kini, asa ndaˈi melaat gulaula nilan ditug balay pengamuyuˈan ditug diwata ta, mukaˈ ndaˈ nilan dema tampalaksaay sug diwata ta kiin. 38 Naa saˈ duunig dangat ni nga Demetrio, ilan nu samapandayen, naa melengas ditu nilan pengukuman dengatay, puˈ duuni nga kuis dia. 39 Laak saˈ duun pai mauyaˈan niu, melengas pausay niu ditu pikumpungan nu kunsial. 40 Puˈ mbuus itai tempuan di keglekesasaw kini nandaw, dayun ndaˈiduni mesembag ta dun.” 41 Benaˈ mideksuˈ su taluˈ nu sikritaryu, piuliˈen su nga getaw mikpungun dia.