5
Si Ananias mukaˈ si Safira
1 Laak duuni getaw ngalanen si Ananias, su sawanen si Safira. Kini si nga Ananias, duunig lupaˈ nilan piksaluy nilan. 2 Dagid duuni sinawad dun ni Ananias su galinen, sinanguˈ dadema nu sawanen. Dayun uitay ni Ananias su galinen ditu nga peneligan ni Isus, pigwakilen dinilan. 3 Dagid sinaak ni Pedro diniin, “Ananias, mauma dema pinulaya ni Satanas, adun migbalusa tug Balakat nu Megbebayaˈ? Miksawada dun su galin nug lupaˈ niu kiin. 4 Naa su ndaˈ mu pa peksaluy, yaˈai metau dun. Mukaˈ saˈ piksaluy mu, yaˈa da gusayi megbayaˈ dun su galinen. Naa, mauma dema midelendem mu menggulaula maˈniin? Kanaˈ laak nu kilawani piglimbungan mu, su na Megbebayaˈ!”
5 Lemen laak midengeg ni Ananiasi tinaluˈ kia ni Pedro, miseksud dayun, mitigbak. Mindek dayun patiˈ su nga mikedengeg dun. 6 Dekag minatay si Ananias, migbuat su ngag begu getaw, pigupianan nilan dayun sug bangkayen, iwit nilan diag liu, inangay nilan dayun lebengay.
7 Mendadi, duun saani telu uras, minateng su sawa ni Ananias, laak ndaˈen suunayi mipenggulaula. 8 Miktaluˈ si Pedro dini Safira kini, “Pesuun mu dinaan saˈ iin baig launen, ki galin nug lupaˈ niu.”
“Waˈa,” simbag ni Safira, “daal daitu.”
9 Kaliˈ pektaluˈ si Pedro diniin, “Mauma dema amu duaˈ, midelendem niu pengindanan niu sug Balakat nu Megbebayaˈ? Naa, diin na bisuangan kiin su nga getaw miglebeng tu sawa mu mundiin. Pedumaan ka nilan lebengay!” 10 Mitekaw dayun meseksud ki sawa ni Ananias kia, mitigbak pagid. Sumiled dia su ngag begu getaw kia. Benaˈ minitaˈ nilan puˈ minatay dadema iin, iwit nilan diag liu, dayun nilan lebengay, ditu dadema gupid nug lebeng nu sawanen. 11 Benaˈ midengeg nu pikumpungan nu sakup ni Isus ki mipenggulaula kia, migelaˈ ilan mendek. Maˈantu dadema su taman mikedengeg dun, sakup saˈ kanaˈ.
Nga Mekesalebuˈ Penggulaula mukaˈ Tuˈus
12 Naa su nga peneligan ni Isus, melaun mekesalebuˈ penggulaula mukaˈ tuˈus binaal nilan di pegitaˈen nu nga getaw. Tatap mekpungun su nga kelaun mikpetuud ditu Pengedapan tu Megbebayaˈ, dia Silung ni Salomon. 13 Pigbesaan gupia nu nga getaw su nga suminakup dini Isus, laak pia maˈantu, mindek lumamug dinilan su ngag duma getaw. 14 Laak minamal ilan gupia megdugang, puˈ melaun gupia getaw mikpetuud tu Kaunutan si Isus, libun laki. 15 Kaas su nga migladu, iwit nug dumanen dia nga karsada, pibelilid nilan di sampuyuan atawaka di gikam adun puluˈ sug duma dun, mbianan ilan nug lingu laak ni Pedro. 16 Melaun getaw mikpungun ditu nga peneligan ni Isus dia Jerusalem genat di ngag lumibut lunsud, peguiten nilan dia su nga pegladu mukaˈ nga piglegetan menenulay. Mendadi miuliˈan ilan dayun, launan nilan.
Piglegetan su nga Peneligan ni Isus
17 Naa kagina maˈantu, ki Tampusan Metaas Belian nu getaw Judea mukaˈ ki ngag dumanen di pikumpungan nu nga Saduseo, misigi ilan patiˈ ditu nga peneligan ni Isus. 18 Mendadi dinaap nilan si nga Pedro mukaˈ pinikutan nilan. 19 Dagid su gebii kitu, duun masiˈi sesuguˈen nu Megbebayaˈ getaw langit minukaˈ tu pirisuan, inagaken dayun si nga Pedro gumawas dia. Kaliˈ pektaluˈ dinilan, 20 “Naa, puliˈ amu ditu Pengedapan tu Megbebayaˈ. Pegindeg amu dia, pegukit amu dayun ditu nga getaw mekatag dig begu ketubuˈ kini.” 21 Benaˈ midengeg nu nga peneligan ni Isus kia, pituud nilan dayun. Benaˈ daliˈ endaw, milapus ilan mpanaw ditu Pengedapan, mikpetuˈun ilan dayun dia.
Mendadi ki Tampusan Metaas Belian kia mukaˈ ki ngag dumanen, pinsabi nilan su tibuuk Pikumpungan nu Metaas Gukum nu getaw Judea. Benaˈ migelaˈ ilan mpungun, piangay nilan sia su nga peneligan ni Isus dia pirisuan. 22 Laak dagid saˈ minateng dia pirisuan su nga pegingat tu Pengedapan tu Megbebayaˈ, ndaˈ na nilan metaangay su nga peneligan ni Isus. Mipuliˈ ilan dayun ditu nga gukum, kaliˈ ilan pegukit dinilan, 23 “Saˈ minateng ami ditu pirisuan, mitaangan nami, pimegenan pa tekepay. Su nga megingat di pirisuan, dia dailan bisuanganen. Laak benaˈ pinukaˈ nami, ndaˈidun nai getaw diag dialem!” 24 Naa, apelai. Benaˈ midengeg nu nga kaunutan nug belian kini mukaˈ nu kaunutan di pegingat tu Pengedapan, milibuleng ilan gupia, saˈ taˈ alandun pai mpenggulaula dig binayaˈ gebii buˈ gendaw. 25 Naa segay nilan mesebuˈay dun, duuni getaw minateng, laungen dinilan, “Ki nga pinikutan niu kiin, dia dailan dibaluy nu Pengedapan kini, mikpetuˈun ilan tu nga getaw!” 26 Saˈ maˈnia, inangay dayun nu nga megingat kia su nga peneligan ni Isus, dinunutan ilan nu kaunutan nilan. Laak ndaˈ nilan pendegay si nga Pedro, puˈ mendek ilan mbuus betuun ilan nu nga getaw miktabuˈ dia.
27 Mendadi benaˈ inagak dia su nga peneligan ni Isus, pinindeg ilan dia gedapan nu Pikumpungan nu nga Gukum, sinaakan ilan dayun nu Tampusan Metaas Belian. 28 Kaliˈ pektaluˈ su Metaas Belian, “Naa mendadi, pimeek nami amu gupia puˈ ndiˈ niu sembayani ngalan kini saˈ mekpetuˈun amu! Naa bentayay pa daan niu, su pigukit niu, mileep na dini Jerusalem! Mukaˈ pingelegan niu ami, laung niu yamii mikpatay di getaw kiin!”
29 Kaliˈ sembag si nga Pedro, “Subay mekpetuud ami tu Megbebayaˈ, sabayaˈ diniu. 30 Puˈ su Megbebayaˈ pektemuyen nu nga ginepuˈay ta, iini mikpetubuˈ puliˈ dini Isus kiin, su pinatay niu, linansang niu di kurus. 31 Mendadi kini si Isus, pitaas dadema nu Megbebayaˈ, piˈingkuden di gupiden dapit lintunen adun iini meglekaunutan mukaˈ meglegawen, adun ebangan ita niin nga getaw Israel meksikesuun mukaˈ pedesunen ita niin di nga salaˈ ta. 32 Naa, yami kenii miketakesiˈ di ketubuˈen puliˈ. Miketakesiˈ dun padun sug Balakat nu Megbebayaˈ, su pepengepuˈen nu Megbebayaˈ di nga mekpetuud dini Isus.”
33 Mendadi ki nga gukum kini, benaˈ midengeg nilan su sembag kia ni nga Pedro, mitutung ilan gangit, taginaa nilan dun, pepatay nilan su nga peneligan kia. 34 Dagid migindegi sala tawan gukum, ngalanen si Gamaliel, iini sala tawan di pikumpungan piningalan dun Pariseo. Mekpetuˈun si Gamaliel di Misulat Palinta nu Megbebayaˈ, pegbesaan gupia nu nga kelaun getaw. Migindeg dia gedapan nu nga gukum si Gamaliel, sinuguˈen dayun peguaˈen deliˈ dia si nga Pedro. 35 Benaˈ mipalus ilan, kaliˈ pektaluˈ si Gamaliel dia nga gukum, “Mendadi yamu nga samau getaw Israel, peksibaˈan ta ki gulaula ta di nga getaw kiin, adun ndiˈ ita melapang. 36 Puˈ misuunan ta puˈ begudiin, duuni getaw ngalanen si Teudas, inangkenen metaasi gelalen. Duun saani paat gatus tawan suminakup dayun diniin. Laak binunuˈ iin, dayun mipelak su nga kelaun sakupen, mibulugan na laak. 37 Mendadi tubus itu, duuni getaw Galilea ngalanen si Judas. Su timpu pa nu kenlista tu nga getaw, melaun getaw suminakup dini Judas kia. Laak minatay dadema, mipelak dayun su nga kelaun sakupen.” 38 Laung pa ni Gamaliel, “Naa mendadi taluˈu diniu nandaw, ndiˈ ta pulegen ki nga getaw kiin. Petuyangen ta nailan! Puˈ saˈ genat laak di kilawani penggulaulaan nilan kini, mbulugan laak. 39 Dagid saˈ genat tu Megbebayaˈ, naa ndiˈ ta maulakan. Mbuus mpengetuan ta su Megbebayaˈ!”
Mendadi, sinanguˈ nu nga gukum su tinaluˈ kia ni Gamaliel. 40 Dekag sinabi puliˈ su nga peneligan ni Isus kia, pimbadas ilan mukaˈ pimaag dinilan ki keksambay nilan dini Isus, dayun ilan beluyay. 41 Naa su nga peneligan ni Isus, benaˈ mikeguaˈ ilan dia Pikumpungan nu nga Gukum, liliag ilan gupia, kagina mipemilang ilan nu Megbebayaˈ mbantang pepiidan sabaˈ nu kesakup nilan dini Isus. 42 Genat itu, dia ngag balay mesama ditu Pengedapan tu Megbebayaˈ, gendawgendaw minamal ilan mekpetuˈun mukaˈ megwali di Gempia Petenday mekatag dini Isus, su Tinduˈ nu Megbebayaˈ Meglekaunutan.