16
1 Maaˈ laung padun ni Isus, “Naa iini tinaluˈu dun diniuig launanen, adun pia melegenan amu, ndiˈ amu lumukas sumalig dinaan, kaas tuliud amu tu kekpetuud niu. 2 Duuni gendaw mateng, utidan amu nu nga getaw Judea dia simbaan nilan. Mukaˈ dema, duuni nga getaw, saˈ bunuˈen amu nilan, laung nilan dun, suminugut ilan tu Megbebayaˈ. 3 Memaˈantu ilan, puˈ ndaˈ ilan sambat tu Gamaˈ ta, mukaˈ ndaˈ ilan dema sambat dinaan. 4 Iini tinaluˈu dun diniu, adun saˈ matengi gendaw nu kegleget nilan diniu maˈnia, melabuˈ dayun dig delendeman niu puˈ iin na su pekteluˈen ku.”
Su Gabang nug Balakat nu Megbebayaˈ
Laung padun ni Isus, “Naa ki nga tinaluˈu kini diniu, genat tu puunanen, ndaˈu pesuun diniu, puˈ duminuma pau diniu. 5 Nandaw pisuun ku na diniu, puˈ muliˈu tu suminuguˈ dinaan. Bisan maˈantu, pia sala tawan diniu, ndaˈi suminaak dun dinaan saˈ tandaˈu pangay. 6 Laak dagid miubaˈ amu gupia sabaˈ nu tinaluˈu diniu. 7 Taman taluˈu diniu, mpianan amu saˈ mawaˈ nau dini. Saˈ ndiˈu mawaˈ dini, naa su Mengingabang diniu, ndiˈ medini niu. Laak saˈ mawaˈu dini, suguˈen ku iin medini. 8 Mukaˈ ki Mengingabang kini, saˈ mateng, pesuunen di nga kilawan su sayep nilan mekatag di salaˈ, di kekesuun, mukaˈ di ginukuman. 9 Pesuunen dinilan su sayep nilan mekatag di salaˈ, puˈ su puun nug limbung, iin su kemilas nilan dinaan. 10 Pesuunen dadema dinilan su sayep nilan mekatag dig bianan nu kekesuun, puˈ muliˈu tu Gamaˈu, ndiˈ niau dayun maitaˈ. 11 Pesuunen pa padun dinilan su sayep nilan mekatag di ginukuman di nga kilawan, puˈ su Palin, su kaunutan nu tibaˈan kilawan, daan na inukuman.
12 “Melaun pai teluˈen ku diniu, laak nemun, ndiˈ na niu muitan. 13 Laak kig Balakat nu Megbebayaˈ, su megbuas di metuud mekatag di Megbebayaˈ, saˈ mateng na, munut diniu tu taman metuud. Su teluˈenen, kanaˈ mikpuun tu pegbayaˈen, iini pesuunen su da medengegen. Teluˈenen dadema su gembianan tug binayaˈ gebii buˈ gendaw. 14 Megleepig dengegan ku puun diniin, puˈ petendayen dadema diniu su pemuun ku. 15 Adin sug danu Gamaˈu, danaan dadema, kaas kiai tinaluˈu dun puˈ petenday diniu nug Balakat nu Megbebayaˈ su pemuun ku.
Su Kelegenay niu, Mbaluy Leliag niu
16 Laung padun ni Isus, “Naa naan kini, ndiˈ nau maiben di mata niu. Dayun laak ndiˈ maiben, maitaˈ da niau puliˈ.”
17 Duun dayuni nga sakupen miksinaakay, laung nilan, “Taˈ mai tinaluˈen dun dinita puˈ ndiˈ na maiben di mata ta, dayun ndiˈ maiben, maitaˈ ta daw puliˈ? Taˈ alanduni guluganeni tinaluˈen kia, ‘Puˈ muliˈu,’ laungen, ‘tu Gamaˈu’? 18 Taˈ mai guluganeni tinaluˈen kia, ‘Ndiˈ maiben’? Ndiˈ ta mesabut!”
19 Naa, si Isus, misuunanen puˈ saakan nilan sia. Kaliˈ pektaluˈ dinilan, “Iin mai migduaˈduaˈig delendeman niu dun su gulugan nu tinaluˈu diniu puˈ ndiˈ nau maiben di mata niu, dayun ndiˈ maiben, maitaˈ da niau puliˈ? 20 Taman taluˈu diniu, mektenlis amu mengaduy, melegenan amu, laak su ngag lain kilawan, leliagen. Su kelegenay niu, ndiˈ maiben mbaluy leliag niu. 21 Pinenggiˈ duunig libun megbataˈ. Saˈ sungu megbatik tian, melibuleng. Laak saˈ migbataˈ na, milingawanen su kelibulengen, puˈ liliag tug bataˈen migigetaw na dinig dibabaw lumbang ta kini. 22 Yamu, maˈantu damu dema, melegenan namu. Laak dagid mekitaˈ ita puliˈ, dayun megelaˈig leliag niu, mukaˈ ndaˈidun nai mekepalin dun diniu.
23 “Taman taluˈu diniu, ki gendaw kiin, ndiˈ na niau mesaakan, puˈ iini penengian niu su Gamaˈu. Pia alanduni penenebiin niu diniin, begayen diniu saˈ sumalabuuk amu dinaan. 24 Sampay nemun, ndaˈi pinenabi niu mesembayan pa niui ngalan ku. Naa, penenabi amu, begayan amu dayun, adun megelaˈig leliag niu.”
Dinaag na ni Isus su Kaunutan nu Tibaˈan Getaw
25 Mendadi, diksuˈ ni Isus ki tinaluˈen, laungen, “Naa, kiai sinambingayu diniu, laak sungu matengi gendaw, ndiˈ nau meksambingay, puˈ penluksaden ku na diniu gupia sug betad nu Gamaˈ ta. 26 Naa ki gendaw kiin, saˈ menenabi amu, mesambay niui ngalan ku. Ndiˈu namu kambat penenebian tu Gamaˈ ta, 27 puˈ iin, melelaat dadema diniu gupia. Melelaat diniu, puˈ mekpetail amu dinaan, mukaˈ mituudan amu dun puˈ pigenatan ku iin. 28 Su kediniin ku lumbang, genatu tu Gamaˈ ta. Nandaw, mawaˈu dinig lumbang, puˈ muliˈu tu Gamaˈ ta.”
29 Kaliˈ pektaluˈ su nga sakupen, “Naa, pinluksad mu na, ndaˈ mu na sambingayay. 30 Misuunan na nami puˈ yaˈai mekesuun tug launanen. Puˈ pia ndiˈa saakan nu getaw, sembagen mui misebuˈan dun, kaas mituudan ami dun puˈ genata tu Megbebayaˈ.”
31 Kaliˈ taluˈ si Isus, “Mituudan bamu dun nandaw? 32 Bentayay pa daan, pegdateng na su gendaw megelaˈ amu mesigwag, puˈ belengan niau, piksesala tawan diniu, muliˈ tug balayen. Mukaˈ minateng nai gendaw kia. Laak kanaˈu da sala, puˈ suminalabuuk dinaan su Gamaˈu. 33 Iini tinaluˈu dun diniu, adun mpiai ginaa niu puun di keksalabuuk niu dinaan. Peglegetan amu nu nga kilawan sabaˈ nu keksalabuuk niu dinaan. Laak ndiˈ amu mendek, puˈ dinaagu na su nga kilawan!”