10
Su Sambingay mekatag di Megingat tu Karniru
1 Kaliˈ pektaluˈ si Isus, “Taman taluˈu diniu, pinenggiˈ duuni galad melauni karniru dun. Naa, adin su ndiˈ mian di gengaˈan saˈ suled, laak mengkalemikit tug labat, iini megdaaw mukaˈ tulisan. 2 Laak dagid adin su mian tu gengaˈan saˈ suled, iin su tantu megingat tu karniru. 3 Iin, saˈ mateng tu galad, pukaˈan nu megingat tu gengaˈan. Saˈ suled, medengeg dayun nu nga karniru su tingegen. Tuaganen su ngag daniin karniru, piksesalabuuk ingelananen ilan, mukaˈ egakenen ilan mangay ditug liu. 4 Benaˈ megelaˈen ilan uitay ditug liu, meguna dinilan mpanaw. Dunutan nilan iin gupia, puˈ mailala nilan su tingegen. 5 Ndiˈ ilan dumunut tug lain getaw, segaga menggebek ilan, puˈ ndiˈ nilan mailalai tingeg nug lain getaw.”
6 Naa iini sinambingay ni Isus tu nga kaunutan nu getaw Judea, laak ndaˈ nilan mesabuti guluganen.
Si Isusi Metau Megingat
7 Mendadi, laung dayun ni Isus, “Taman taluˈu diniu, naani gengaˈan bianan nu nga karniru saˈ suled. 8 Sug launan getaw miuna dinaan, tautau pegwekilan ilan nu Megbebayaˈ, ilani megdaaw mukaˈ tulisan, laak ndaˈ ilan pekineegay nu nga karniru. 9 Naani gengaˈan, adin su mian di gengaˈan kini saˈ suled, iini megawen. Suled dayun mukaˈ luyu meksukat meseksaben. 10 Naa saˈ pinenggiˈ su megdaaw, metuaˈ adun laak megdaaw mukaˈ mekpatay sampay menggebaˈ. Iini midiniinu dun puˈ adun mpeduunan su sumakup dinaan ketubuˈ ndaˈi tamanen, su ketubuˈ ndaˈ dademai taman nu kelengasen.”
11 Laung pa ni Isus, “Naani gempia megingat tu nga karniru. Naa, su gempia megingat tu nga karniru, iin su miuyaˈ gumantiˈ di kepetayan nilan. 12 Laak dagid su tinindanan, su kanaˈ megingat tantu, saˈ maitaˈen mesebangi mendapaˈ tu karniru, gubek, belenganen su nga karniru, puˈ kanaˈ maini gapuˈen. Dumapaˈ dayun su mendapaˈ tu karniru mukaˈ mpelak su ngag duma. 13 Gubek su tinindanan, puˈ tinindanan laak mukaˈ ndiˈ melelaat tu nga karniru. 14 Laak naan su gempia megingat. Suminambatu tug danaan karniru mukaˈ suminambat ilan dinaan, 15 maaˈ nu kesambat nu Gamaˈu dinaan sampay su kesambatu diniin. Miuyaˈ nau gumantiˈ dadema di kepatay nu nga karniruu. 16 Naa duun pai ngag lain karniruu kanaˈ pa di sekauluan kini. Subay engain ku ilan dema. Mektalenten ilan di tingegu, mbaluy ilan pa pagid sekauluan, sala tawan dai megingat dun.
17 “Iini pegbesaanu dun nu Gamaˈu, begayu matayig lawasu, puˈ metubuˈu puliˈ. 18 Pia taˈ taway dun, ndaˈi mekegbayaˈ mekpatay dinaan, subay begayan ku pegbayaˈen mekpatay dinaan. Mukaˈ saˈ begayu, danaan da delendeman. Duuni pegbayaˈu megbegay dun, mukaˈ duun dademai pegbayaˈu metubuˈu puliˈ. Iini sinuguˈan dinaan nu Gamaˈu.”
19 Naa sikna midengeg nu nga getaw Judea su tinaluˈ kia ni Isus, miksumpakiˈ puliˈig delendeman nilan. 20 Melaun mektaluˈ, “Pingepuˈan ma menulay ki getaw kiin! Mibuˈang! Mauma dema pekineegan niu?”
21 Laak sug duma, laung nilan, “Saˈ pinenggiˈ pingepuˈan menulay, kanaˈ maˈniai teluˈenen. Ki menulay, mekeneguliˈ ba dig buta?”
Pimilas nu nga Getaw Judea si Isus
22 Naa kagina timpu na metegdaw, miktelipuun dia Jerusalem sug lumpuk nu getaw Judea gindan tu Kegugas Balay Pengedapan tu Megbebayaˈ. 23 Si Isus, mikpanawpanaw dia Pengedapan, dia silung piningalan dun Silung ni Salomon. 24 Mendadi ki nga getaw Judea, miktabuˈ ilan diniin, kaliˈ ilan pektaluˈ, “Taˈ ma, maiben mu pa pekegelegelayig delendeman nami? Pemantek mu dinami, yaˈa ba tuˈu su Tinduˈ nu Megbebayaˈ Meglekaunutan?”
25 Kaliˈ sembag si Isus, “Mitubusu na taluˈ diniu, laak ndaˈ amu metuuday dun. Iini miketakesiˈ gupia dinaan, su pinggulaulau, su pigwakil dinaan nu Gamaˈu. 26 Laak dagid, ndiˈ niu petuuden, puˈ kanaˈu amu karniru.a 27 Puˈ saˈ su nga karniruu, pektalentenan nilan su tingegu. Suminambat dau dema dinilan, kaas duminunut ilan dinaan. 28 Begayan ku ilan ketubuˈ ndaˈi tamanen, ndiˈ ilan matay, mukaˈ ndaˈ demai mekagaw dun di gengkeman ku. 29 Su Gamaˈu migbegay dun dinaan, iin su megbayaˈ pa dun dig launan. Ndaˈi mekagaw dun di gengkemanen.” 30 Diksuˈ ni Isus su taluˈen, “Naa, naan mukaˈ su Gamaˈu, iin da.”
31 Benaˈ midengeg nu nga getaw Judea, mingimud ilan puliˈ batu, puˈ betuun nilan sia si Isus adun matay. 32 Kaliˈ pektaluˈ si Isus, “Naa, melaun gempia pinitaˈu diniu di pipenggulaula nu Gamaˈu dinaan. Taˈ mai betuun niau dun?”
33 Kaliˈ ilan sembag, “Kanaˈ nu gempia pinggulaula mu. Iinig betuun ka nami dun, puˈ sudiˈan mu su Megbebayaˈ! Puˈ pilepeng mu sug lawas mu tu Megbebayaˈ, asa kilawan ka da!”
34 Laung dayun ni Isus, “Ndaˈ ba mesulat di Palinta niu puˈ miktaluˈ su Megbebayaˈ, ‘Yamui ngag diwata’? 35 Misuunan ta puˈ su Misulat Taluˈ nu Megbebayaˈ, ndaˈi gikteb nu ketuuden. Mukaˈ su nga getaw kia dengantu pimuunan nu Megbebayaˈ, piningalanen dun ngag diwata. 36 Saˈ maˈantu, ndiˈ niu mpia teluˈen puˈ piksudiˈan ku su Megbebayaˈ saˈ tinaluˈu puˈ naanig Bataˈ nu Megbebayaˈ, asa pimiliˈu niin medinig lumbang. 37 Saˈ pinenggiˈ ndiˈu sia penggulaulaan su pibaal dinaan nu Gamaˈu, naa megdadi ndiˈ amu metuudan dun. 38 Laak dagid, saˈ penggulaulaan ku tuˈui pibaalen dinaan, naa pia ndiˈ niu duateni taluˈu, subay petuuden niu su nga penggulaulau. Saˈ pemaˈantuun niu, naa subay metuudan amu dun, naan mukaˈ su Gamaˈu, iin da tanan.”
39 Mendadi, pikpulingkasan puliˈ nu nga getaw Judea daapay si Isus, dagid migliaw dinilan.
40 Saˈ maˈnia, mipuliˈ si Isus ditug dipag tubig Jordan tandaˈ pigbunagan ni Juan diniin tubig, migbebenwa pa dia. 41 Melaun getaw miditu niin, laung nilan, “Si Juan kiin, ndaˈi mekesalebuˈ pinggulaulanen. Laak dagid ki kelaun tinaluˈ ni Juan mekatag di getaw kini, lumbus minuud.” 42 Melaun dayun getaw dia mituudan dini Isus.