8
Sug Libun Miglaat Pekesuunan
1 Laak si Isus, miditug Bentud nu nga Gayu Olibo. 2 Benaˈ migendaw puliˈ, milapus mangay ditug Balay Pengedapan tu Megbebayaˈ. Dekag minateng dia, mikpungun diniin su melaun getaw. Migingkud dayun si Isus, piktuˈunanen ilan. 3 Naa duunig libun iwit dia nu nga mekpetuˈun di Palinta nu Megbebayaˈ mukaˈ nu nga Pariseo. Kig libun kini, duun dawi mikaitaˈ dun, tebiaˈ miglaat pekesuunan. Mendadi, pinindeg nilan dia gedapan nu nga getaw kig libun kia. 4 Laung nu miguit dun dia, “Sir, kig libun kini, duuni mikaitaˈ dun gupia miglaat pekesuunan daw. 5 Naa, iini palinta nu Megbebayaˈ dinita pisulaten dini Moises, subay betuun ta. Mendadi yaˈa, taˈ mai ketaluˈ mu dun?” 6 Naa iini tinaluˈ nilan duni maˈnia, puˈ pengimanan nilan sia si Isus di metaluˈen, adun dengaten nilan sia.
Mendadi si Isus, migdukung, sinulatanen tenduˈen sug lupaˈ. 7 Minamal ilan dayun sumaak diniin. Migindeg dayun si Isus, kaliˈ pektaluˈ, “Naa, adin diniui ndaˈi salaˈen, iini meguna megbatu dun.” 8 Migdukung puliˈ si Isus, dayun peksulat puliˈ diag lupaˈ. 9 Mendadi ki nga getaw kia, mimegawaˈ ilan dayun dia, piksesala tawan dinilan mipanaw, miguna su nga megulang dinilan. Tigaˈwan, iin laaki mibilin dia si Isus, dumanen laak sug libun pegindeg pa dia. 10 Mendadi, migindeg puliˈ si Isus, kaliˈ saak tug libun, “Ibun, adin mailan? Ndaˈ bai mbilin mukum diniˈa?”
11 Kaliˈ sembag, “Sir, ndaˈidun.”
“Mendadi naan,” laung ni Isus, “ndiˈ dau dema mukum diniˈa. Uliˈa na, mukaˈ ndiˈa puliˈ pegbaal salaˈ.”]
Si Isus su Tiag nu Tibaˈan Getaw
12 Naa, mikpetuˈun puliˈ si Isus tu nga getaw. Kaliˈ pektaluˈ, “Naa, pektalentenay niu ini. Naani Tiag mekpedelag di tibaˈan getaw. Adin su getaw dumunut dinaan, iini medelagan nu Tiag, su puun nu ketubuˈ ndaˈi tamanen, mukaˈ iin, ndiˈ na mekepanaw di medelem.”
13 Kaliˈ pektaluˈ su nga Pariseo, “Naa, taˈ mai metuudan ami dun, puˈ yaˈa laaki tuminakesiˈ dun? Su takesiˈ mu, ndaˈi gatagen.”
14 Kaliˈ sembag si Isus, “Pia naan laaki miketakesiˈ dig lawasu, laak metuudi tinakesiˈan ku, puˈ misuunan kui pigenatan ku mukaˈ peguliˈan ku, laak yamu, ndaˈ niu mesuunay ia. 15 Saˈ mukum amu, su kinilawan dai pigunut niu. Naan, ndiˈu mukum di kilawan. 16 Laak saˈ pinenggiˈ puˈ mukumu di nga getaw, mpiai kaukumu dun, puˈ kanaˈu laak salai mukum dun, puˈ dumananu dun nu suminuguˈ dinaan. 17 Pektalentenay niu ini, misulat di Palinta niu sinulat ni Moises, saˈ duaˈ tawani meketakesiˈ dun, mpemilang metuud su takesiˈan nilan. 18 Naa, mitakesiˈan kuig lawasu mukaˈ tinakesiˈan dau dema nu Gamaˈu, su suminuguˈ dinaan.”
19 Kaliˈ saak su nga Pariseo, “Naa ki gamaˈ mu kini, adin ma dun?”
Kaliˈ sembag si Isus, “Ndiˈ amu sumambat dinaan, mukaˈ su Gamaˈu dema, ndiˈ amu sumambat dun. Saˈ sia suminambat amu tantu dinaan, naa suminambat damu dema tantu tu Gamaˈu.”
20 Kiai tinaluˈ ni Isus su dia pa Pengedapan tu Megbebayaˈ mekpetuˈun dia nga getaw, dia mesempel nug betangan nu nga getaw gamut nilan ditu Pengedapan. Ndaˈ pai duminaap dini Isus, puˈ ndaˈ pa datengi gendaw su tinduˈ nu Megbebayaˈ kedaap diniin.
Ndiˈ amu Mekeditu Pegengayan ku
21 Kaliˈ padun pektaluˈ si Isus tu nga getaw, “Naa mawaˈu dini, penengaun niau dayun, laak ndiˈ niau mbaangan. Kaas matay damu, ndaˈ namu lelaatay di salaˈ niu. Ndiˈ amu mekeditu pegengayan ku.”
22 Naa, su nga kaunutan nu getaw Judea, kaliˈ ilan pektaluˈ, “Kagina tinaluˈen puˈ ndiˈ ita mekeditu pegengayanen, mabuˈ iini guluganen, megeget.”
23 Kaliˈ sembag si Isus, “Yamu, dangen amu dinig lumbang. Naan, genatu tu gekbus langit, kaas sakup amu laak nu kekinilawan. Laak naan, kanaˈu sakup kekinilawan. 24 Kiai tinaluˈu dun puˈ matay damu ndaˈ namu lelaatay di nga salaˈ niu. Matay amu tuˈu ndaˈ amu lelaatay, subay metuudan amu dun naan su pekteluˈen ku kini.”
25 Kaliˈ ilan saak, “Adin ka getaw?”
Simbag dayun ni Isus, “Naa genat tu puunanen, naani pekteluˈen ku diniu. 26 Yamu kiin, melaun pa paduni metaluˈu mekatag diniu, laak ndiˈu teluˈen. Melaun dademai maukuman ku amu dun, laak ndiˈu dadema mukum. Su taluˈ nu suminuguˈ dinaan, iin su metuud mukaˈ iin laaki ukiten ku di tibaˈan getaw.”
27 Naa su nga mikedengeg tu tinaluˈen kia, ndaˈ nilan mesabut puˈ su pekteluˈenen dinilan, iin su Gamaˈen Megbebayaˈ. 28 Maˈantu, kaliˈ dayun pektaluˈ si Isus, “Naanig Bataˈ nu Kilawan. Saˈ inaten na niau, mesuunan na niu puˈ naan su pekteluˈen ku kiin. Mukaˈ dema mesuunan niu dayun ndaˈi penggulaulaan ku mikpuun tug danaan pegbayaˈ, puˈ teluˈen ku su laak pisuun dinaan nu Gamaˈu. 29 Iin su suminuguˈ dinaan, megduma lelayun dinaan mukaˈ ndaˈu niin petuyangay salau, puˈ pinemalan ku lelayun penggulaulaay su mauyaˈanen.”
30 Mendadi melauni nga mikedengeg tu tinaluˈ kia ni Isus, mituudan ilan diniin.
Su Getaw Mekpetuud, iini Megawen
31 Mendadi, kaliˈ pektaluˈ si Isus tu nga getaw Judea dia mikpetuud na diniin, “Saˈ penemalan niu dunutay su teluˈen ku, naa sakupu namu tantu. 32 Mesuunan pa niu dayuni metuud mukaˈ pebeluyen amu nu metuud.”
33 Su nga getaw Judea, kaliˈ ilan pektaluˈ, “Mauma dema teluˈen mu puˈ pebeluyen ami, asa sapuˈ ami ni Abraham, ndaˈ nami mainsan mbianayi gulipen di getaw. Taˈ mai pengmaˈanan mu pebeluyen ami?”
34 Kaliˈ sembag si Isus, “Naa, taman taluˈu diniu, adin su mikesalaˈ, malap gulipen nu salaˈen. 35 Saˈ upama gulipen, kanaˈ sakup lelayun nu mingulipen dun, laak dagid sug bataˈ nu mikpaulipen dun, danilan da lelayun. 36 Kaas saˈ iini mekpebeluy diniu sug Bataˈ nu Megbebayaˈ, naa mbeluy damu gupia. 37 Naa, misuunan ku puˈ yamui sapuˈ ni Abraham, laak pia maˈantu, mauyaˈan niu petain niau, puˈ ndaˈ pengganget dig delendeman niu su pekteluˈen ku. 38 Naan, piktuˈun ku diniu su pinitaˈ dinaan nu Gamaˈu. Yamu dema, penggulaulaan niu su midengeg niu dig daniu gamaˈ.”
39 Sumimbag ilan, “Sapuˈ ami ni Abraham.”
“Saˈ upama sapuˈ amu ni Abraham, penunggilingan niu sia su pinggulaula ni Abraham, 40 laak dagid iini penggulaulaan niu sia, petain niau. Naa, ndaˈi pinggulaula ni Abraham maˈnia. Daal dai pinggulaulau, inukitu diniu su midengegu metuud tinaluˈ nu Megbebayaˈ. 41 Yamu, iini pinunggilingan niu, su pinggulaula nu tantu gamaˈ niu.”
“Salabuuk dai gamaˈ nami, su da laak Megbebayaˈ. Bataˈ ami niin tantu.”
42 “Kanaˈ, puˈ saˈ iini tantu Gamaˈ niu, petailen niau sia, puˈ iini pigenatan ku su Megbebayaˈ, mukaˈ kini dau. Kanaˈ laak puun tu pegbayaˈu su kediniin ku, puˈ iini suminuguˈ dinaan su Megbebayaˈ. 43 Mauma dema ndaˈ niu mesabuti taluˈu? Iini pikpuunanen, ndiˈ niu muit su pekteluˈen ku. 44 Mingemaˈan damu gusay tu gamaˈ niu, su Palin. Iin laaki mauyaˈan niu pektalentenay, su mauyaˈan nu Palin. Su Palin, genat tu pikpuunanen, memunuˈan iin mukaˈ belusen, puˈ ndaˈ na daan pegilengig delendemanen tu metuud, pia maikaˈ. Saˈ megbalus, bantangen da, puˈ belusen, mukaˈ iin demai pigenatan nug balus. 45 Kaas, iini ndiˈ amu metuudan dun dinaan, puˈ teluˈen ku su metuud. 46 Ndaˈidun diniui mekeglegintuud dun puˈ naani mikesalaˈ. Saˈ piglegintuudu su kekesuun, mauma dema ndaˈ amu metuuday dun? 47 Pektalentenay niu ini, adin su tantu sakup nu Megbebayaˈ, iini mekineeg tu taluˈ nu Megbebayaˈ, laak ndiˈ niu pektalentenan, puˈ kanaˈ amu daniin piglegetawan.”
Miguna pa si Isus dini Abraham
48 Mendadi ki nga getaw Judea kia, kaliˈ ilan saak dini Isus, “Ndiˈ ba metuud, yaˈa su pekteluˈen nami getaw Samaria, su pingepuˈan menulay?”
49 Kaliˈ sembag si Isus, “Ndaˈu lai pengepuˈay menulay. Adin su pinggulaulau, mekpebasau dun tu Gamaˈu, laak yamu, piksudiˈan niau. 50 Ndaˈu pegelapayi megdedengegu dun, laak dagid duuni mekpededengeg dun dinaan, puˈ iini metau mukum. 51 Naa, taman taluˈu diniu, adin su mekpetuud tu tinaluˈu, ndiˈ na matay.”
52 Kaliˈ ilan taluˈ diniin, “Nandaw, mitekad na nami tantu pingepuˈan ka tuˈu menulay! Puˈ si Abraham mukaˈ su nga pimuunan nu Megbebayaˈ dengantu, minatay da. Dayun pelum iini teluˈen mu, su mekpetuud di tinaluˈ mu, ndaˈ nai petayanen. 53 Su ginepuˈay ta si Abraham, minatay da. Masiˈ metaasa pa ba diniin? Su nga pimuunan nu Megbebayaˈ dengantu, minatay dadema. Taiˈ delendeman mu dun, adin ka getaw?”
54 Laung ni Isus, “Saˈ naani migalap dun sug dengegan ku, ndaˈi gatagen. Laak iini migbegay dun dinaan su Gamaˈu, iin su tinaluˈ niu pektemuyen niu. 55 Laak dagid sampay nemun, ndaˈ niu iin sembatay. Naan, suminambatu gupia diniin. Saˈ pinenggiˈ gelalen ku ndaˈu sembatay, naa, belusenu maˈniin diniu, puˈ suminambatu gupia diniin, mukaˈ piktalentenan ku su teluˈenen. 56 Naa si Abraham kiin, su gamaˈ niu laung, pigleliag, puˈ mikpedateng di ketuaˈu dini. Naa minitaˈen na, mukaˈ liliag na gupia.”
57 “Kendutaˈ mai kaitaˈ mu dini Abraham, asa ndaˈ pa peglima puluˈi taun mu?”
58 “Taman taluˈu diniu, su ndaˈ pa pegigetaw si Abraham, naan, daan nau.”
59 Mingimud dayun batu su nga kaunutan kia, puˈ betuun nilan sia si Isus adun matay. Laak dagid si Isus, luminamug tu tebenan getaw, migawaˈ dayun dia Pengedapan tu Megbebayaˈ.