27
Pigwakil dini Pilato si Isus
1 Naa benaˈ putiˈ delagay na, ki nga kelaun kaunutan nug belian mukaˈ su ngag duma kaunutan nu getaw Judea, miksabutsabut ilan dig bian nilan mekpatay dini Isus. 2 Benaˈ mitubus ilan meksabutsabut, pibalud nilan si Isus, dayun nilan egakay ditu ni Pilato, su gubirnadur tinduˈ nu nga getaw Roma, pigwakil nilan dayun diniin si Isus.
Su Kepatay ni Judas
(Ki nga Pinggulaula 1.18-19)
3 Naa kini si Judas, su tuminipu dini Isus kiin, benaˈ misuunanen puˈ inukuman si Isus lagaˈ na ginaanen, migbiksuˈ dun. Saˈ maˈnia, minangay ditu Pengedapan tu Megbebayaˈ, dayun ki telu puluˈ laad siin pelata kiin, inuliˈen ditu nga kaunutan nug belian kampuˈ nu ngag duma kaunutan. 4 Kaliˈ pektaluˈ si Judas, “Masiˈ mikesalaˈu, puˈ ki getaw ndaˈi salaˈen, misabaˈu ukuman lagaˈ na ginaanen!”
“Naa, tinibabaˈ mu laˈa!” simbag nu nga kaunutan kia. “Yami, ndaˈig labet nami dun.”
5 Tinikpuˈ dayun ni Judasi kwarta kia dia saleg nu Pengedapan, migawaˈ dayun dia. Minangay dayun megeget si Judas, miksilengek.
6 Naa su kepalus ni Judas, pingimud nu nga kaunutan nug belian ki kwarta kia tinikpuˈ ni Judas dia saleg. “Naa kini,” laung nilan, “binandu ditu Misulat Palinta nu Megbebayaˈ saˈ melamug di gemutan di Pengedapan tu Megbebayaˈ, puˈ tindan di kebinasa di getaw.” 7 Saˈ maˈnia, migyagayaga ilan, iin dayuni pidelendem nilan, duunig lupaˈ seluyen nilan, lupaˈ nu mendiun gulen, puˈ baalen nilan kelebengan di ngag lain getaw, saˈitada su kanaˈ dangen dia Jerusalem. 8 Kaas sampay nemun, kig lupaˈ kia, piningalan dun nu getaw, “Lupaˈ nu Kegbinasa di Getaw.”
9 Naa saˈ misaluyig lupaˈ kia, iin nai kebianen, minuud su sinulat dengantu nu pimuunan nu Megbebayaˈ si Jeremias ditu Taluˈen, laungen, “Inalap nilan ki telu puluˈ laad siin pelata, su pilegaˈan nu getaw Israel diniin, 10 dayun iinig bayad nilan tug lupaˈ nu mendiun gulen, maaˈ dadema nu sinuguˈ nu Kaunutan Megbebayaˈ dinaan.”
Sinaakan ni Pilato si Isus
11 Naa mendadi, minadap si Isus ditu ni Gubirnadur Pilato kia, dayun sinaakanen. Suminaak si Pilato dini Isus, “Naa, metuud ba, yaˈa su gadiˈ nu getaw Judea?”
Kaliˈ sembag si Isus, “Yaˈa mai miktaluˈ dun.” 12 Melaun dayun inaleg nu nga kaunutan nug belian mukaˈ nug duma kaunutan nu getaw Judea dini Isus. Laak dagid ndaˈ gusay sembag si Isus tu kelaun dangat nilan diniin.
13 Sinaak pelum ni Pilato dini Isus, “Ndaˈ mu ba medengegi melaun dangat nilan kini diniˈa?”
14 Laak dagid ndaˈ gusay sembagay ni Isus ki kelaun dinangat kia. Mipatiˈ mesebuˈay dun su gubirnadur kia.
Inukuman na Tuˈu Petain si Isus
15 Naa tauntaun, metaang dig Lumpuk kiin nu getaw Judea gindan tug Liniusan, duunig betad nu gubirnadur, beluyeneni sala tawan pinikutan, adini ubugen diniin nu melaun getaw. 16 Naa su taun kia, mitaang dema duuni sala tawan pinikutan, ngalanen si Isus Barabas, melaat gupiaig dengeganen. 17 Naa mendadi, benaˈ mikpungun su nga melaun getaw, sinaak dayun ni Pilato dinilan, “Mendadi, taˈ taway duni mauyaˈan niu beluyen ku diniu? Si Isus Barabas ba, saˈ si Isus kini, ki gilal Tinduˈ nu Megbebayaˈ Meglekaunutan?” 18 Iini tinaluˈ dun ni Pilato maˈnia, puˈ misuunanen, kaas pa dinangat diniin nu nga kaunutan nu getaw Judea si Isus, puˈ misigi mailan diniin.
19 Naa keduaˈen, selian ni Pilato megingkud dia pengukuman, duuni pimuun nu sawanen diniin, laungen, “Ki getaw kiin ndaˈi salaˈen, ndiˈa dema tuˈu megduma di kaukum dun. Puˈ duuni teginepen ku kagebii mekatag diniin, milegenanu dun patiˈ!”
20 Laak dagid ki nga kaunutan nug belian kampuˈ nug duma kaunutan nu getaw Judea, pingmetuudan nilan su melaun getaw, adun ubugen nilan dini Pilato, iinig beluyen si Barabas. Kini si Isus, petain. 21 Naa saˈ maˈantu, sinaak puliˈ ni Pilato di nga melaun getaw, “Naa taˈ ma, adin ma dun dig duaˈ tawan kiai mauyaˈan niu beluyen ku diniu?”
Sumimbag ilan, “Si Barabas!”
22 Mendadi, suminaak puliˈ si Pilato tu nga getaw, “Saˈ maˈantu, taˈ mai penggulaulaan ku dini Isus kiin, ki gilal Tinduˈ nu Megbebayaˈ Meglekaunutan?”
“Lensangen di kurus!” simbag nu nga kelaun getaw.
23 Sinaak na pelum ni Pilato, “Mauma, alandun bai salaˈen?”
Laak migdegadega ilan memeksay, laung nilan, “Ki getaw kiin, lensangen ba di kurus!”
24 Naa si Pilato, misabuten puˈ palu pa mpalinig delendeman nu nga melaun getaw kia, ndiˈ na daan, buus menlimuuk ilan. Naa saˈ maˈnia, minalap tubig si Pilato, dayun mingingenaw dia gedapan nu melaun getaw, dunut miktaluˈ, “Naa kia, saˈ petaini getaw kia, naan, ndaˈig labetu dun! Daniu da pegbayaˈ!”
25 Migdengan dayun sumbag su nga kelaun getaw, “Waˈa, danami da pegbayaˈ, sampay megbalaˈ di nga sapuˈ nami!”
26 Naa saˈ maˈantu, biluy tuˈu ni Pilato si Barabas ditu nga melaun getaw. Kini si Isus, pibadasen, dayunen pegwakil tu nga sundalu, adun lensangen nilan di kurus.
Piksudiˈan nu nga Sundalu si Isus
27 Naa saˈ maˈantu, inagak si Isus nu nga sundalu nu gubirnadur, si Pilato, tug balayen. Piglidungan dayun si Isus nu kelaunan sundalu. 28 Benaˈ miktabuˈ ilan dini Isus, piluas nilan su suuben, piselukan nilan dayun melambung suub gempula, tautau suub gadiˈ. 29 Mukaˈ miglingkin ilan dugi, tautau tundek gadiˈ dadema, dayun nilan peselup di gulu ni Isus. Piwidan nilan dayun seputuk belaw dig lintunen, tautau bastunen, dayun minginlulud ilan di gedapanen, dunut piksudiˈan nilan, laung nilan, “Naa mpianan ka, Sir, Gadiˈa daw nu nga getaw Judea!” 30 Pindulaˈan pa nilan padun si Isus, dayun inawiˈ nilan pelum diniin kig belaw kia, pimentul nilan dayun di gulu ni Isus. 31 Mendadi, benaˈ mitubus nilan peksudiˈay, piluas nilan diniin su gempula suub, piseluk nilan puliˈ diniin sug daniin suub. Dayun nilan egakay si Isus ditu tandaˈ lensangan nilan dun di kurus.
Su Kelansang dini Isus tu Kurus
32 Mendadi, benaˈ mipalus nailan dia syudad, duuni misungkak nilan getaw Cirene, ngalanen si Simon, iini tigel nu nga sundalu mekpisan tu kurus ni Isus. 33 Naa saˈ maˈantu, midepet ilan dia dapit nu syudad piningalan dun “Tulan Gulu.” Saˈ dig danilan pikebitan, Golgota. 34 Benaˈ minateng ilan dia, duuni piˈinum nu nga sundalu dini Isus penginumen limugan gempait bulung. Laak dagid benaˈ miˈinaman ni Isus, mipauk minum dun.
35 Dayun nilan lensangay tu kurus si Isus. Benaˈ milansang na tu kurus si Isus, piktali nu nga sundalu su nga penepetenen, bian nilan mekilas dun. 36 Dayun mimegingkud dia su nga sundalu, pegingaten nilan si Isus dia kurus. 37 Naa duuni tuˈus pidekep nilan dia tandaˈ nug dimpulunen, sinulatan sumbungan diniin, “Kini si Isus, su Gadiˈ nu getaw Judea.” 38 Mukaˈ pa pagid duunig duaˈ tawan tulisan piduma nilan dini Isus lensangay di kurus, miktimpang di kurus ni Isus su kurus nilan.
39 Naa su nga getaw minian dia, pingimusaungan nilan si Isus, miktakuˈtakuˈ ilan, dunut teluˈen nilan, 40 “Yaˈa mai miktaluˈ puˈ gebaˈen mu su Pengedapan tu Megbebayaˈ, dayun gikteb telu endaw, baalen mu puliˈ! Naa saˈ maˈnia, gawen mu nandawig lawas mu, saˈ yaˈa tuˈu sug Bataˈ nu Megbebayaˈ! Penauga di kurus kiin!”
41 Ki nga kaunutan nug belian mukaˈ su nga mekpetuˈun di Misulat Palinta nu Megbebayaˈ, kampuˈ nu ngag duma kaunutan nu getaw Judea, maˈantu dadema, pingimusaungan da nilan dema si Isus, laung nilan, 42 “Paa, megaganen daw megaweni ngag lain getaw, laak ndiˈen pelum megaga guunayig lawasen! Naa ki Gadiˈ daw nu nga getaw Israel, melengas saˈ menaug ma nandaw di kurus kiin, dekag paita pekpetuud diniin! 43 Suminalig daw tu Megbebayaˈ. Saˈ maˈantu, melengas guunen na sia nandaw nu Megbebayaˈ, saˈ mauyaˈanen da. Puˈ tinaluˈen ma, ‘Naanig Bataˈ nu Megbebayaˈ.’”
44 Sampay sug duaˈ tawan tulisan dumanen linansang di nga kurus, maˈantu dadema, pingimusaungan dadema nilan si Isus.
Su Kepatay na ni Isus
45 Naa su kelansang dini Isus tu kurus, benaˈ miktui gendaw, tekaw dumilemi tibuuk benwa, duun saani telu uras, sampay miginengaˈ menaugi gendaw. 46 Mendadi, benaˈ miginengaˈ menaugi gendaw, minekeg megbeksay si Isus, laungen, “Eli, Eli, lama sabaktani?” Maˈananen, “Uu Megbebayaˈ pektemuyen ku, Megbebayaˈ pektemuyen ku, mauma bilengan mau tuˈu?”
47 Midengeg nu ngag duma getaw pegindeg dia, kaliˈ ilan pektaluˈ, “Naa, tuaganen si Elias dengantu!” 48 Duun dayuni gumibek malap maaˈ palas napes, inulemen dayun di penginumen, tinangenen di gayu tigbaw, pisangalen dayun dig babaˈ ni Isus adun meseksepen.
49 Dagid laung nu ngag duma getaw, “Ala, pegbentayan ta pa deliˈ, kalukalu lumusad na buus si Elias, adun gumawen diniin!”
50 Mendadi si Isus, benaˈ mitubus megeksep di penginumen kia, migbeksay dayun puliˈ mainsan, metenug. Dayun megetusi ginaanen.
51 Naa mendadi, su kurtina bilet ditug dialem nu Pengedapan tu Megbebayaˈ, masiˈ mitekaw meginengaˈ megedit, genat diin dapit ditaas sampay ditu geksiden diin dapit silung. Miglinug dayun, mimegbektik pa paduni nga genduk. 52 Mukaˈ melaun lebeng mipukaˈ, kig libengan nga piglegetawan nu Megbebayaˈ, pitubuˈ ilan puliˈ. 53 Mimegawaˈ ilan dayun diag lebeng nilan, naa benaˈ mitubuˈ puliˈ si Isus, mipanaw ilan dayun tu Jerusalem, kaas minitaˈ ilan nga melaun getaw dia.
54 Naa duuni kaunutan sundalu kampuˈ nu nga sama sundalunen megingat dini Isus dia pa kurus. Benaˈ mibetikan nilan sug linug dakus su kelaun mipenggulaula, mipatiˈ ilan mendek. Mitaluˈ nilan dayun, “Aa naa, masiˈ metuud tuˈu, ki getaw kini, iin sug Bataˈ nu Megbebayaˈ!”
55 Melaun pa pagidi ngag libun dia mesempel, pegbantay dailan dema, ilan su tumindug dini Isus genat ditu Galilea, puˈ miktagikul ilan diniin. 56 Telu tawan dinilan, si Maria Magdalena, mukaˈ si Maria su ginaˈ ni Santiago mukaˈ ni Jose, mukaˈ su sawa ni Sebedeo, su ginaˈ nu sala Santiago mukaˈ ni Juan.
Libeng si Isus
57 Naa benaˈ sungu na mesindepi gendaw, duuni getaw minateng dia genat tug lunsud Arimatea, ngalanen si Jose. Iin kiin, medatuˈ getaw, sakup dadema ni Isus. 58 Mendadi si Jose, minangay madap dini Pilato, inubugen diniin, elapenen sug bangkay ni Isus. Sinanguˈ dadema ni Pilato, sinuguˈen dayun pegwakil diniin. 59 Naa saˈ maˈantu, inalap ni Jose sug bangkay ni Isus. Benaˈ mialapen, pinutusen dig begu penepeten gemputiˈ. 60 Naa si Jose kini, duuni sangyab begunen peluakay di telektap, inandamen pedaan di kelebeng gupia diniin saˈ matengi gumulen. Ditu dayun ni Jose libeng sug bangkay ni Isus. Benaˈ milebengen, linuliden dayuni gembagel batu, tinakepen ditu gengaˈan nug lebeng. Benaˈ mitubus, minawaˈ dia si Jose. 61 Naa si Maria Magdalena mukaˈ su sala Maria, pegingkud pailan dia mesunguˈan nug lebeng ni Isus.
Pigingat sug Lebeng ni Isus
62 Naa benaˈ miksala gendaw, saˈitada su Gendaw Pelali nu getaw Judea, ki nga kaunutan nug belian sampay su nga Pariseo, minadap ilan dini Pilato, 63 kaliˈ ilan pektaluˈ diniin, “Naa Sir, milabuˈ dig delendeman nami ki tinaluˈ nug belusen getaw kiin su tetubuˈ pa, laungen, ‘Di ketelu endawen genat di kepatayu, petubuˈenu puliˈ.’ 64 Naa kagina maˈantu, Sir, melengas suguˈen mu pepegenen kig lebengen kia sampay telu gebii, puˈ kalukalu mbuus su nga sakupen, engain nilan pegdaaway sug bangkayen, dayun teluˈen nilan tu melaun getaw, pitubuˈ daw puliˈ iin. Benaˈ su tampusan balusen kia, melaaten pa ditug bekna.”
65 Kaliˈ sembag si Pilato, “Naa, mesuˈat, alap amu nga megingat dun, angay niu dayun pepegenay kig lebeng kia, gikteb di megaga niu.”
66 Naa saˈ maˈnia, mipanaw ilan, pipagen nilan sibaˈ ki gembagel batu kia mitakep dig lebeng kia. Binaalan nilan gindanan sug bisuangan, adun mesuunan saˈ buus iginen nu getawig batu kia. Mukaˈ duun pa demai nga megingat binilin nilan dia.