22
1 Mawu we ɛwɛndotɔ la sɔ otɔsisa xe we ɛsin ni nɔ na ɛgbɛ ɛmɛ la sɔ xlɛ-ɔ, e bo zin ceɖeceɖe ɖi klisitalikpɛn ha, otɔ la bo tɔn sɔn Mawu kpodo Lɛngbɔvi la we xɔluzinkpwe mɛ nɔ. 2 Otin xena sinsyɛn etɔn nɔ na ɛgbɛ ɛmɛ, le dodomɛ na toxo la we omɔ ɖaxo la, bo le otɔsisa la we akpa owe laye ji. Otin la nɔ syɛn okun zɔn weve le oxwe ɖokpo mɛ, e nɔ syɛn okun osun mɛ osun mɛ. Ye nɔ zan ama etɔnye a do gɔ adɔn na otogunye. 3 Nudo ɔn mɔ le nɔ. Mawu kpodo Lɛngbɔvi la we xɔluzinkpwe na le toxo la mɛ. Mawu we odansɔviye bo na sɛn-ɛ nɔ. 4 Ye na kpɔn ŋumɛ etɔn, nyikɔ etɔn bo na le ŋukɔnnu na ye. 5 Ozan ɔn mɔ do nɔ, ye ɔn va hyan zogyan ɖe we kinklɛn nɔ gbɔɔn do hyan ohwe we kinklɛn nɔ can, ɖo Xwetɔ Mawu la ŋutɔ na klɛn na ye. Ye bo na ɖu xɔlu gbɔɔn do yi mavɔmavɔ.Yesu lɔ viva etɔn we oxo
6 Mi wɛ Mawu we ɛwɛndotɔ la lɔ na-a tun mɔ: «Oxo mɛ ye nyi oxojɔxo, ye bo na kan do ye ji, Xwetɔ la, Mawu xeni na na Gbigbɔ etɔn lɔ oxo na oxolɔɖonyitɔye, wɛ dɔn ɛwɛndotɔ etɔn ɖodan ni a do va ɖe onu xeni na va jɔ zaanɖe ye, sɔ xlɛ odansɔvi etɔnye.»
7 «Ko gbɔn nɔ zaanɖe. Nyɔnanɔ wɛ nyi ɛmɛ xeni zɔn do oxolɔɖonyi we wema xe la we oxoye ji.»
8 Mɔ Jan, wɛ se bo kpɔn onu mɛ ye. Xena ko kpɔn bo se, ko jɛ klita le ŋukɔn na Mawu we ɛwɛndotɔ xeni sɔ ye sɔ xlɛ-ɔ nɔ la, a do sɛn-ɛ. 9 Vɔ, e bo lɔ na-a tun mɔ: «Ká wasi mɔsinha! Odansɔvi wɛ ko nyi ɖi myɔ kpodo nɔvwe oxolɔɖonyitɔye kpodo ɛmɛ xeye ni zɔn do wema xe la we oxo ji nɔ ye, ha. Sɛn Mawu!»
10 E mɛ godo, e lɔ na-a tun mɔ: «Ká hwla oxolɔɖonyi xeni le wema xe la mɛ, ɖo, oganxixo xena Mawu ɖo na onu mɛ laye na do jɔ, o tɛkpɔ. 11 Ɛmɛ nyanyla ni ɖo ŋukɔn yiyi le nyanyla wiwa etɔn mɛ, ɛmɛ ɖuɖyu ni ɖo ŋukɔn yiyi le oɖyu etɔn mɛ, ɛmɛ jijwɛ ni ɖo ŋukɔn yiyi le onu jijwɛ wiwa etɔn mɛ, ɛmɛ xena ye ɖe ɖo ovo, ba ɖo ŋukɔn yiyi a do nyi ɛmɛ ɖe ɖo ovo.»
12 «Ko gbɔn nɔ zaanɖe, ko na hɛn axɔtu tɛye do va, a bo tu axɔ na ɛmɛ ɖokpo-ɖokpo ɖi lena e wa odan ɖo ha. 13 Mɔ wɛ nyi Alufa kpodo Omɛga, tantyan kpodo kpotwi, titɔ e ji kpodo vivɔnu.»
14 Nyɔnanɔye wɛ nyi ɛmɛ xeye ni nɔ nya awu gaga yetɔnye, ye na ɖo ɛcɛ a do ɖu otin xeni nɔ na ɛgbɛ ɛmɛ la we sinsyɛn, a bo gbɔn toxo la we agbomɔnuye a do ɖyɛ e mɛ. 15 Vɔ, ovunye, azetɔye, agalɛtɔye, ɛmɛhutɔye, yɔhwesɛntɔye, kpodo ɛmɛ ɖekpekpe xeni yi owan na ojo, bo nɔ kan ojo, toxo la godo wɛ ye na nɔ!
16 «Mɔ Yesu, ko dɔn ɛwɛndotɔ tɛye ɖodan ni a do ɖo ɛkpɛn onu mɛ laye ji le agunye mɛ. Mɔ wɛ nyi xɔlu Davidi we okyɔn kpodo jijimɛvi etɔn, bo nyi sunhwevi xeni nɔ klɛn le kɛklɛ.»
17 Gbigbɔ la kpo nyɔnu la lɔ nɔ tun mɔ: «Va!»
Ɛmɛ xeni se, ni lɔ tun mɔ: «Va!»
Ɛmɛ xena kɔmyɔ lo ci nɔ ni va; na e jlo ɛmɛ ɖe, ni yi ɛsin xeni nɔ na ɛgbɛ ɛmɛ la, vɔvɔ!
Oxotaɖiɖo
18 Mɔ ko lo ɖo ɛkpɛn e ji na ɛmɛ ɖekpekpe xeni se wema xe la we oxolɔɖonyiye nɔ tun mɔ: na ɛmɛ ɖe sɔ onu ɖe sɔ kpe-e, Mawu na sɔ ofunkpikpe xeye we oxo na ye lɔ le wema xe la mɛ sɔ kpe vivɛsise etɔn. 19 E nyi tun ɛmɛ ɖe, ɖe onu ɖe drɔn le wema xe la we oxolɔɖonyiye wu, Mawu na ɖe akpa xeni nyi etɔn tɛ le ɛgbɛtin la wu, a bo mɔ ɖe akpa xeni nyi etɔn tɛ le toxo kinkwɛn la mɛ, toxo mɛ la we oxo wɛ ye lɔ le ɛgbɛ wema xe la mɛ.
20 Ɛmɛ xeni lo ɖo ɛkpɛn onu mɛ laye ji nɔ lɔ tun mɔ: «Ɛɛn, ko gbɔn nɔ zaanɖe!»
Ami! Va, Xwetɔ Yesu!
21 Xwetɔ Yesu ni nyɔ dɔmɛ do mi ɛmɛ zɛtɛye seŋu.