Ye do gɛdɛ na Satana na oxwe akpo ɖokpo (1.000)
20
1 E mɛ godo, ko kpɔn Mawu we ɛwɛndotɔ ɖe e bo jɛ ote nɔ sɔn jiŋukunsin. Vivɛsise we ogun ɖaxo maɖodo la we cavi le alɔ mɛ ni-i, gɛdɛ ɖaxo ɖe bo le e si. 2 E wle dlagɔn la, odan xixo la, xeni nyi lɛgba Satana la, e bo do gɛdɛ ni-i na oxwe akpo ɖokpo (1.000). 3 E sɔ-ɛ sɔ flɛn do vivɛsise we ogun ɖaxo maɖodo la mɛ, bo tu-i kpodo cavi la bo do ogan e mɛ, e ko mɔ do blɛ otogunye ɖu nɔ o gbɔɔn do yi oxwe akpo ɖokpo (1.000) la we vivɔnu. E mɛ godo, ye na mɔ jo-e do na azan ovi-i ɖe.4 Ko kpɔn xɔluzinkpoye. Ɛmɛ xeye ni xlɔn onyi le e ji ye, ye na ye ɛcɛ na ye a do ɖɔ ɛhwɛ. Ko bo mɔ kpɔn ɛmɛ xeye na ye gbo ota na ye can we okla, do kunu xena ye ɖe na Yesu kpodo Mawu we oxo la wu. Mi wɛ, ko mɔ kpɔn ɛmɛ xeye ni ɔn sɛn kanlin la gbɔɔn do sɛn onutita etɔn la ye, ye ko yi josi la do ŋukɔnnu alo alɔ wu. Ye gbɔn va ɛgbɛ seŋu bo ɖu xɔlu kpodo Klisu la na oxwe akpo ɖokpo (1.000). 5 Mi wɛ nyi finfɔn sɔn oku tantyan la. Ɛmɛ kuku gbokpweye ɔn gbɔn va ɛgbɛ gbɔɔn do yi hwexenu na oxwe akpo ɖokpo (1.000) la vɔ. 6 Nyɔnanɔye kpodo ɛmɛ ɖe ɖo ovoye wɛ ye nyi ɛmɛ xeye ni ɖo mima le finfɔn sɔn oku tantyantɔn la mɛ ye! Oku owegɔ la ɔn ɖo ɛcɛ do ye ji, vɔ, ye na nyi Mawu kpo Klisu we ovɔsantɔye, ye bo na ɖu xɔlu kpo-e na oxwe akpo ɖokpo (1.000) la.
Ye ɖu le Satana ji
7 Na oxwe akpo ɖokpo (1.000) la va yi vɔ, ye na ɖe Satana la tɔn le ogankpa etɔn mɛ, 8 e na tɔn a do blɛ otogun xeye ni le wɛkɛzo ɛnɛ laye mɛ ɖu, ye wɛ nyi Gɔgu kpodo Magɔgua. E na kpli ye na ahwan wiwa. Ye su ɖi ɛxutakɔ ha. 9 Ye yi nyixɔ la ji seŋu bo xa ɛmɛ ɖe ɖo ovo ye we ahwankpa kpodo toxo xena Mawu yi owan na la. Vɔ, ozo ɖe flɛ sɔn jiŋukunsin bo fyɔ ye seŋu. 10 Ye sɔ lɛgba xeni blɛ ye ɖu nɔ la flɛn do ozokpo ɖaxo kpodo ohwemi mɛ, blɛ la wɛ kanlin la kpodo oxolɔɖonyitɔ ojokantɔ la le. Ye na do vivɛsise na ye oklo kpodo ozan gbɔɔn do yi mavɔmavɔ.
Kojoɖiɖo kpotwi la
11 Mi wɛ ko kpɔn xɔluzinkpwe ɖaxo owee ɖe kpodo ɛmɛ xeni xlɔn e ji la. Jiŋukunsin kpodo nyixɔ kpo si le ŋukɔn ni-i, ye ko mɔ kpɔn ye. 12 Ko mɔ kpɔn ɛmɛ kukuye, ɛmɛhyɔnye kpodo vikpɛviye, ye bo le ote le xɔluzinkpwe la we ŋukɔn. Wemaye le hunhun, wema bu bo mɔ le hunhun, mi wɛ nyi ɛgbɛ we wema la. Ye ɖo kojo na ɛmɛ kuku laye dogbɔn odan yetɔnye xena ye wasi mɛ, ɖi lena e le winwlan ɖo le wema laye mɛ ha. 13 Ɛxu ɖe ɛmɛ kuku xeye ni le e mɛ ye tɔn-ɛ, oku kpodo okutomɛ bo ɖe ɛmɛ kuku xeye ni le ye mɛ ye tɔn-ɛ, ye bo ɖo kojo na ɛmɛ kuku laye, dogbɔn ɛmɛ ɖokpo-ɖokpo we odan xena e wasi mɛ. 14 Ye sɔ oku kpodo okutomɛ sɔ flɛn do ozokpo la mɛ. Ozokpo la wɛ nyi oku owegɔ la. 15 Ye bo sɔ ɛmɛ ɖekpekpe xe we nyikɔ na ye ɔn kpɔn le winwlan le ɛgbɛ we wema la mɛ, sɔ flɛn do ozokpo la mɛ.