Babilɔnu toxo ɖaxo la crɔn
18
1 E mɛ godo ko kpɔn Mawu we ɛwɛndotɔ bu, e bo jɛ ote sɔn jiŋukunsin. E ɖo ɛcɛ ɖaxo ɖe, gigo etɔn bo klɛn do nyixɔ la ji seŋu. 2 E do axwa lelele bo lɔ tun mɔ: «E gba, e gba, Babilɔnu ɖaxo la! E trɔ zun gbigbɔ nylakanye we nɔtyɔn, bɛtyɔn gbigbɔ baɖa-baɖa ɖekpekpe tɔn, blɛ la wɛ oxɛ nyanyla ɖekpekpe kpodo [kanlin nyanyla ɖekpekpe xeni xyɔ ɛwu]a nɔ nɔ. 3 Ɖo, otogun zɛtɛye nu aɖidido taŋu we vɛn xena agalilɛ etɔn dɔn do va, xɔlu xeye ni le nyixɔ la ji ye lɛ aga kpo-e, nyixɔ la ji we ajɔdotɔye bo jɛ dɔkun dogbɔn dɔkunnu susu xena e ɖo mɛ.»4 Ko mɔ se ogbe bu ɖi sɔn jiŋukunsin bo lɔ nɔ tun mɔ: «Otogun tɛye, mi tɔn le toxo mɛ mɛ, mi ko mɔ do ɖo alɔ le onu nyanyla etɔnye mɛ nɔ, e mɛ ofunkpikpe xeye ni na jɔ do e ji ye, ɖe ko mɔ va nyi miatɔn nɔ. 5 Ɖo, onu nyanyla etɔnye su gbɔɔn bo yi jiŋukunsin, Mawu bo ɖoŋudo onu baɖa-baɖa xeye na e dote ye wu. 6 Mi wasi kpo-e ɖi lena e wasi kpo ɛmɛye ɖo ha, mi ɖe onu xena e dote we atɔ ni-i zɔn owe! Kɔkpo xe mɛ na e caka vɛn do, mi kɔn vɛn cica mɔsinhatɔn donu owe do e mɛ ni-i. 7 Ɖi lena e kɔ eɖe sɔ su, bo ɖo acɔ ɖo ha, mɔsinha ke wɛ mi na do vivɛsise ni-i ɖo, e ba do le lutu mɛ! Ɖo, e nɔ lɔ le eɖe mɛ nɔ tun mɔ: “Xɔlu nyɔnusi wɛ ko nyi le bwɛ, ko ko nyi okposi, ko ɔn nɔ lutu mɛ nɔ kpɔn gbeɖe, 8 do e mɛ la wu, ofunkpikpe xeye ni nyi etɔnye na jɔ do e ji le onyihinhɔn ɖokpo gee gbe. Ye wɛ nyi, oku, lutu, xovɛ, ozo bo na fyɔ-ɛ. Ɖo, Xwetɔ Mawu xeni ɖɔ ɛhwɛ ni-i ɖo hɔnhlɔn.»
9 Hwexenu na nyixɔ ji we xɔlu zɛtɛye xeni lɛ aga kpo-e ye bo ɖu ɛgbɛ kpo-e ye, na kpɔn ozo xeni lo fyɔ-ɛ nɔ la we azɔ na tun nɔ, ye na fan avin a bo na ale do ota ni-i. 10 Ye na vɔ na vivɛsise etɔn la nɔ, a bo va yi ci dindyɔnnu, a bo lɔ nɔ tun mɔ: «Awo! Awo! Awo Babilɔnu, toxo ɖaxo xeni ɖo hɔnhlɔn! Oganxixo ɖokpo gee jan wɛ ye sɔ ɖo ote bo ɖɔ ɛhwɛ na we!»
11 Nyixɔ la ji we ajɔdotɔye can lo fan avin nɔ, bo le lutu mɛ do e wu, ɖo, ɛmɛ ti ɔn mɔ xɔ ajɔgban yetɔnye nɔ, 12 sika, oganwe, ɛkpɛn ohovivɛtɔnye, oɣlɔye, avɔ nywɛ fɛɖɛfɛɖɛ, avɔ ovɛ cɛcɛcɛ, avɔ owee pepepe, avɔ ovɛ bu ye can, otin adodwe hamɛ-hamɛ ɖekpekpe, onu ɖekpekpe xena ye sɔ onyi ajinaku we aɖu do wasi, otin ohovivɛtɔnye, oganvɛ, ogan, ɛkpɛn ohovivɛtɔn bu, 13 ama hwɛn nywɛ xena ye nɔ yɔ tun Kanɛli, onu hwɛn nywɛ bu ye, celuye, milu, zruya, vɛn, ami, owɔ, ɛjinukun xena ye nɔ yɔ tun ble, onyiye kpodo lɛngbɔye, osɔye kpodo ahwanhunye, ɛmɛxixɔye kpodo ɛgbɛtɔ bu ye. 14 «Onu xeye na o nɔ jlo na ɖo laye, sɔn do we, dɔkun tɔwe mɛ zɛtɛye kpodo acɔnu tɔweye bu do we, ɛmɛ ɖe ɔn mɔ kpɔn ye nɔ kpɔn gbeɖe!» 15 Toxo la we vivɛsise na do vivɔ na ajɔdotɔ xeye ni jɛ dɔkun dogbɔn ajɔ xena ye do le e mɛ ye mɛ, ye bo na ci dindyɔnnu, a bo fan avin, a bo le lutu mɛ, 16 a bo lɔ nɔ tun mɔ: «Awo! Awo! Toxo ɖaxo la! Avɔ nywɛ fɛɖɛfɛɖɛ wɛ e do saa ma, bo do avɔ ovɛ cɛcɛcɛ kpodo avɔ ovɛ buye, bo sɔ sika, ɛkpɛn ohovivɛtɔn buye kpodo oɣlɔye sɔ kpla! 17 Dɔkunnu mɛ la zɛtɛye do crɔn le oganxixo ɖokpo gee mɛ!»
Otɔjihun ɖaxo kuntɔ zɛtɛye kpodo ɛmɛ zɛtɛye xeni do otɔjihun laye, ɛmɛ xeye ni nɔ wa odan le otɔjihun la mɛ zɛtɛye, kpodo ɛmɛ zɛtɛye xeni nɔ wa odan le ɛxu ji ye, le dindyɔnnu, 18 xena ye kpɔn ozo xeni lo fyɔ-ɛ nɔ la we azɔ, ye do axwa nɔ tun mɔ: «Toxo ti ɔn nɔ onyi ɖi toxo ɖaxo xe ha kpɔn!» 19 Ye bɛ ofinzɔ kɔn do ota nɔ, bo le axwa nu do bo fan avin nɔ, bo na ale nɔ tun mɔ: «Awo! Awo! Toxo ɖaxo la! Dɔkun etɔn wɛ na na ɛmɛ zɛtɛye xeni ɖo otɔjihunye le ɛxu ji ye do jɛ dɔkun. Oganxixo ɖokpo gee mɛ jan bɛ ye crɔn-ɛ le.»
20 Jiŋukunsin, kpɔn jijwɛ do cincrɔn etɔn wu! Mi ɛmɛ ɖe ɖo ovoye, ɛmɛ dindɔnye kpodo oxolɔɖonyitɔye, miye can, mi kpɔn jijwɛ! Ɖo, Mawu ɖɔ onu nyanyla xena e wa kpo mi, we ɛhwɛ ni-i.
21 Mi wɛ, Mawu we ɛwɛndotɔ hɔnhlɔntɔ ɖe, ɖiɖa ɛkpɛn ɖe xeni le ɖi ote ɖaxo ha, bo sɔ-ɛ flɛn do ɛxu mɛ bo lɔ tun mɔ: «Adan mɔsinhatɔn ke wɛ ye na do flɛn Babilɔnu, toxo ɖaxo la, ɛmɛ ɖe ko mɔ kpɔn-ɛ nɔ kpɔn gbeɖe. 22 Le toxo tɔwe la mɛ, ɛmɛ ti ɔn mɔ se onuxonu okannɔye nɔ, ohanjitɔye, kpetekuntɔye kpodo okpɛnkuntɔye we onuxixo nɔ. Ɛmɛ ɖe ɔn mɔ kpɔn alɔnudanwatɔ ti le kɔn we nɔ, ɛmɛ ɖe ko mɔ se ote we ogbe le kɔn we nɔ. 23 Zogyan can ko mɔ klɛn le kɔn we nɔ kpɔn, ɛmɛ ɖe ɔn mɔ se osu kpo osi xeye ni ɖe yeɖe trololo we ogbe le kɔn we nɔ kpɔn gbeɖe. Ɖo ajɔdotɔ tɔweye wɛ nyi ɛmɛ ŋukunsin le e ji ye le nyixɔ la ji saa, o bo sɔ azenuwiwa tɔwe do blɛ otogun zɛtɛye ɖu.»
24 Kɔn we bɛ ye kpɔn oxolɔɖonyitɔye, Mawu we ɛmɛ ɖe ɖo ovoye, kpodo ɛmɛ xeye na ye hu le nyixɔ la ji ye, we ɛhun le.