Kunuɖetɔ owe laye
11
1 E mɛ godo ye sɔ okɔn ɖe na-a, e bo ɖi onujlɛtin ha, ye bo lɔ na-a tun mɔ: «Site a bo jlɛ Mawu we oxwe la, ovɔsinsan we agba la, a bo xlɛ ɛmɛ xeye ni lo sɛn Mawu le e mɛ nɔ ye kpɔn. 2 Vɔ, oxwe la we gaji, jo-e do, ká jlɛ-ɛ. Ɖo blɛ la wɛ ye jo do na ɛmɛ xeye ni ɔn nɔ sɛn Mawu ye. Yee na va gbidi toxo kinkwɛn la le afɔnu na osunzan kanɖe ŋukun owe. 3 Ko na ɖe omɔ na kunuɖetɔ tɛye owe laye, ye na sɔ atiyea sɔ do, a bo do ɛwɛn xena ye yi le Mawu kɔn la na onyihinhɔn akpo ɖokpo sandi owe ota ɛdɛn (1.260). 4 Kunuɖetɔ owe mɛ laye wɛ nyi Olivutin owe laye kpodo zogyan owe laye xeye ni le ŋukɔn na Xwetɔ la xeni kpa ɛcɛ do nyixɔ la ji. 5 Na ɛmɛ ɖe jlo na wa onu nyanyla do ye, ozo nɔ tɔn le onu mɛ na ye, a bo fyɔ kɛntɔ yetɔnye. Ɛɛn, na ɛmɛ ɖe jlo na wasi onu nyanyla kpo ye, lena e ɖo na ku ɖo mɛ. 6 Ye ɖo hɔnhlɔn bo na do tu jiŋukunsin oju ti ko do ja nɔ, le azan xeye gblamɛ na ye na lo jla ɛwɛn xena ye yi le Mawu de la nɔ. Ye bo ɖo hɔnhlɔn a do sɔ ɛsin do trɔ zun ɛhun, a bo mɔ hɛn ofunkpikpe hamɛ-hamɛ ye do va nyixɔ la ji le hwe ɖekpekpe nu na ye jlo. 7 Na ye ɖe kunu yetɔn vɔ, kanlin xeni tɔn sɔn vivɛsise we ogun ɖaxo maɖodo la mɛ, na wa ahwan kpo ye, a bo ɖu ye ji, a bo hu ye. 8 Ocɔ yetɔnye na le toxo ɖaxo la we omɔ to, ofi xena ye kan Xwetɔ yetɔn do otinsoga ji le. Blɛ la wɛ ye sɔ nyikɔ na tun Sodomu kpodo Ejiputi. 9 Ɛgbɛtɔ xeye ni sɔn oto ɖekpekpe mɛ, akɔta ɖekpekpe mɛ, ogbe ɖekpekpe mɛ, kpodo otogun ɖekpekpe mɛ, na kpɔn ocɔ yetɔn na onyihinhɔn atɔn adaɖe, ye ko lɔn na ye a ɖi ye nɔ. 10 Ɛmɛ xeye ni le nyixɔ ji ye, na kpɔn jijwɛ tun ye bo ku, a bo ɖu oxwe, a bo ɖo onu ɖodan yenɔniɔye nɔ, ɖo oxolɔɖonyitɔ owe mɛ laye dɔn vivɛsise va ɛgbɛtɔye ji taŋu. 11 Onyihinhɔn atɔn adaɖe laye godo, Mawu fun gbigbɔ xeni nɔ na ɛgbɛ ɛmɛ do ye mɛ, ye bo site do afɔ yetɔnye ji, vivɔ ɖaxo ɖe bo jɛ ɛmɛ xeye ni lo kpɔn ye nɔ laye ji. 12 Mi wɛ kunuɖetɔ owe laye se ogbe sinsyɛnxu ɖe ɖi sɔn jiŋukunsin, bo lɔ na ye tun mɔ: “Mi xɛ bwɛ!” Mi wɛ kɛntɔ yetɔnye lo kpɔn ye nɔ, ye bo lo sɔn yi jiŋukunsin nɔ le sunwɔ mɛ.» 13 Le hwe mɛ la nu, nyixɔ hunhun ɖaxo ɖe jɔ, toxo la we maɖowo bo gudu seŋu. Ɛgbɛtɔ akpo acowe (7.000) bo ku le nyixɔ hunhun mɛ la mɛ, ɛmɛ gbokpweye bo vɔ taŋu, bo kanfu Mawu xeni le jiŋukunsin. 14 Ofunkpikpe owegɔ la va yi; Mi kpɔn atɔngɔ la na jɔ zaanɖe fi!Okpɛn acowegɔ la
15 Mi wɛ ɛwɛndotɔ Mawutɔn acowegɔ la kun okpɛn. Ogbe sinsyɛnxu ɖeye ɖi le jigbe, bo lɔ nɔ tun mɔ: «Fifi xɔluɖuɖu do ɛgbɛ la ji, trɔ zun Xwetɔ Mawu míatɔn kpodo Klisu etɔn tɔn. Xɔluɖuɖu la na nɔ onyi gbɔɔn do yi mavɔmavɔ!» 16 Ɛmɛhyɔn oko ŋukun ɛnɛ xeye ni le xɔluzinkpwe yetɔnye ji ye, le Mawu we ŋukɔn laye, bo cɔn ŋumɛ onyi, bo sɛn Mawu nɔ. 17 Ye bo lɔ nɔ tun mɔ:
Mí lo do ɛkpɛ na we nɔ Xwetɔ Mawu
Hɔnhlɔn zɛtɛyetɔ, myɔ xeni le egbe, myɔ xeni le saa,
Ɖo, o zan hɔnhlɔn ɖaxo tɔwe, bo do na na xɔluɖuɖu tɔwe nɔ onyi.
18 Otogun xeye ni ɔn nɔ sɛn Mawu ye bo le adan ji taŋu,
Vɔ ogan la xo, na o na do ɖe aɖidido tɔwe xlɛ ye,
A bo ɖo kojo na ɛmɛ xeni ku ye,
A bo tu axɔ na odansɔvi tɔwe oxolɔɖonyitɔye;
Kpodo ɛmɛ ɖe ɖo ovo tɔwe xeye ni nɔ ɖo sisi na nyikɔ tɔwe ye, vikpɛvi o, ɛmɛhyɔn o.
Ogan la mɔ xo, na o na do vɔ okun na ɛmɛ xeye ni hɛn nyixɔ la ji gú nɔ ye.
19 Mi wɛ, ye hun Mawu we oxwe xeni le jiŋukunsin, okancica we ɖaka la bo ze le e mɛ. Oju bo ɖe abi, ogbeye bo ɖi, oju bo do ogbe, nyixɔ bo hunhun, ɛkpɛnju ɖaxo ɖe bo ja.