Okpɛn atungɔ la
9
1 Ɛwɛndotɔ atungɔ la kun ahwankpɛn. Ko kpɔn sunhwevi ɖe xeni flɛ sɔn jiŋukunsin, bo jɛ nyixɔ ji. Ye bo sɔ vivɛsise we ogun ɖaxo maɖodo la we cavi bo sɔ ni-i. 2 Sunhwevi la bo hun ogun mɛ la, azɔ ɖe bo tɔn le e mɛ nɔ ɖi ozokpo ɖaxo ɖe we azɔ ha. Azɔ xeni tɔn la, bo na na ohwe kpodo ɛgbɛ la mɛ wii. 3 Bɔsukleye bo tɔn le azɔ la mɛ, bo gbakpe gbɔn nyixɔ la ji. Ye bo na ye ɛcɛ ɖi kekleye tɔn ha. 4 Ye bo do osɛn na ye tun ye boo ká wa onu nyanyla do ogbe ti, alo ama ti o, otin ti, vɔ ye boo wa onu vivɛ do ɛgbɛtɔ xeye na Mawu we josido la ɔn le ŋukɔnnu na ye, ɖoɖyo. 5 Ye ɔn ɖe omɔ na ye tun ye boo hu ɛmɛ mɛ laye, vɔ, ye na ye ogbe tun ye boo do aya na ye na osunzan atun: vivɛsise xena ye nɔ do na ɛmɛ, le ɖi vivɛsise xena ye nɔ se hwexenu na kekle mɛ ɛmɛ ha. 6 Le azan mɛ laye ji, ɛgbɛtɔye na kan oku bo na kan dokpo. Ye na jlo na ku, vɔ oku bo na si le ye kɔn. 7 Bɔsukle laye le ɖi osɔ xena ye bla akpa na, na ahwan yiyi ha. Onu ɖe bo le ota na ye ɖi xɔlugba xena ye sɔ sika do wasi ha. Ŋumɛ yetɔnye bo ɖi ɛgbɛtɔ we ŋumɛ ha. 8 Ye bo ɖo oɖa ɖi nyɔnusiye we oɖa ha, aɖu yetɔnye bo ɖi kinni-kinni jaŋuta we aɖu ha. 9 Hunkɛnnu yetɔnye le ɖi onu xena ye do oganwu na ha. Axwe yetɔnye we zigidi lo ɖi nɔ ɖi ahwanhun xeye na osɔ susu lo dɔn yi ahwan nɔ ha. 10 Fɔgan yetɔn bo ɖi kekle we fɔgan ha, bo trɔn xwinni-xwinni. Fɔgan yetɔn laye mɛ wɛ hɔnhlɔn yetɔn le, ye bo na do do aya na ɛgbɛtɔye na osunzan atun. 11 Xɔlu ɖokpo bo le ye nu. Mi la wɛ nyi ɛwɛndotɔ xeni le vivɛsise we ogun ɖaxo maɖodo la nu. Ye nɔ yɔ-ɛ le Hebligbe mɛ tun «Abadɔna», le Glɛkigbe mɛ ye nɔ yɔ-ɛ tun «Apolinyɔb.» 12 Ofunkpikpe tantyantɔn la va yi; kpɔn, ofunkpikpe owe buye mɔ gbɔn nɔ.13 Ɛwɛndotɔ ɛdɛngɔ la kun ahwankpɛn. Mi wɛ ko se ogbe ɖe ɖi sɔn sika we ovɔsinsan we agba we azo ɛnɛ laye mɛ. Ovɔsinsan we agba mɛ la bo le ŋukɔn na Mawu, sika bɛ ye do wasi-i. 14 Ogbe la bo lɔ na ɛwɛndotɔ ɛdɛngɔ xeni hɛn ahwankpɛn la tun mɔ: «Tun okan na ɛwɛndotɔ ɛnɛ xeye ni le bibla le otɔsisa ɖaxo xeni nyi Eflati la ji.» 15 E tun okan na ɛwɛndotɔ ɛnɛ laye xeye na ye o jla ɖo, ɖo onyi na oganxixo xe la, azan xe la, osunzan xe la, oxwe xe la, na ye a do hu ɛgbɛtɔye we maɖo atɔn. 16 Ye bo lɔ sɔja osɔjinɔtɔ yetɔnye we xixlɛmɛ na-a: ye nyi zanhwanhyɔn sandi owe (200.000.000). 17 Lena ko kpɔn osɔye kpodo osɔkuntɔye ɖo le ɖiɖexlɛ tɛye la mɛ xɛn: Ye do oganwuye, ɖeye le ovɛɛ ɖi ozo ha, ɖeye bo nyi ɛkpɛn ɛfɛsin xena ye yɔ tun Safii ha ɖeye bo nyi goklozintumɛ ɖi hwemi ha. Osɔ laye we ota bo le ɖi kinni-kinni jaŋuta we ota ha. Ozo, azɔ kpodo hwemi bo tɔn le onu mɛ na ye nɔ. 18 Ofunkpikpe atɔn xeye ni nyi ozo, azɔ, kpodo hwemi xeni tɔn sɔn onu mɛ na osɔ laye nɔ, hu ɛgbɛtɔye we maɖo atɔn. 19 Ɖo osɔ laye we hɔnhlɔn, onu mɛ kpodo fɔgan mɛ wɛ e le na ye. Fɔgan yetɔn bo ɖi odan ha, bo ɖo ota, mi la wɛ ye nɔ zan a do do vivɛsise na ɛgbɛtɔye. 20 Ɛgbɛtɔ gbokpweye xeye na ofunkpikpe mɛ laye ɔn hu ye, ye ɔn lɛkɔ le ɛtɛ na onu xeye na ye sɔ alɔ yetɔn ŋutɔye do wasi, bo lo sɛn nɔ ye. Ye ɔn jo lɛgba sinsɛn do, ye ko jo onu kpikpa xeye na ye sɔ sika do wasi, alo oganwe, oganvɛ, ɛkpɛn, alo otin do wasi ye do. Onu mɛ laye ɔn kpewu nɔ kpɔn onu, ye ko se onu nɔ gbɔɔn do zɔn zɔnlin nɔ can. 21 Ye ɔn lɛkɔ le ɛmɛ huhu yetɔnye tɛ, gbɔɔn do trɔ okɔ le aze yetɔnye, agalilɛ yetɔnye, kpo ɛfin finfin yetɔnye tɛ can.