Lɛngbɔvi la fo josido ɛdɛn le acowe laye mɛ
6
1 E mɛ godo ko kpɔn Lɛngbɔvi la, e bo fo josido tantyatɔn la. Le onu le ɛgbɛ ɛnɛ laye mɛ, ko se ɖokpo do axwa ɖi oju wɛ do ogbe ha, bo lɔ tun mɔ: «Va!» 2 Mi wɛ ko kpɔn osɔ owee ɖe. Ɛmɛ xeni le osɔ la ji, bo hɛn oda, ye bo ni-i xɔlugba ɖe. E bo jɛ omɔ ɖi ɛmɛ xeni o ɖu oji ha, e bo na ɖu oji.3 Xena e fo josido owegɔ la, ko se onu le ɛgbɛ owegɔ la lɔ tun mɔ: «Va!» 4 Mi wɛ osɔ bu, ovɛ cɛcɛcɛ ɖe tɔn, ɛmɛ xeni xɛ e ji la, ye ni-i ɛcɛ nia do ɖe fifa tɛ le nyixɔ la ji, e mɛ ɛgbɛtɔye ba do gbo ohlo na yenɔniɔye. Ye bo sɔ dɛnkpwe ɖaxo ɖe sɔ ni-i.
5 Xena e fo josido atɔngɔ la, ko se onu le ɛgbɛ atɔngɔ la lɔ tun mɔ: «Va!» Mi wɛ ko kpɔn osɔ owii ɖe. Ɛmɛ xeni xɛ e ji la bo hɛn onudagan ɖe do alɔ mɛ. 6 Ko bo se onu ɖe, ɖi ogbe ɖe ha, xeni ɖi sɔn onu le ɛgbɛ ɛnɛ laye dodomɛ, bo lɔ nɔ tun mɔ: «Ye na sɔ onyihinhɔn blebu ɖokpo we odanho a do xɔ mɔlu onudagan ɖokpo gee, a bo sɔ onyihinhɔn blebu ɖokpo we odanho, a do xɔ yovo agban atɔn gee. Vɔ, ká ɖo alɔ ami kpodo vɛn wu.»
7 Xena e fo josido ɛnɛgɔ la, ko se onu le ɛgbɛ ɛnɛgɔ la we ogbe, e bo lɔ tun: «Va!» 8 Mi wɛ ko kpɔn osɔ amamu ɖokpo. Ɛmɛ xeni xɛ e ji la we nyikɔ nɔ nyi Oku, okutomɛ bo xo do-e. Ye bo na ye ɛcɛ do nyixɔ la we maɖo-ɛnɛ ji, na ye a sɔ dɛnkpwe, xovɛ, adɔnkwinye, kpodo kanlin wa adanye a do hu ɛmɛye le nyixɔ la ji.
9 Xena e fo josido atungɔ la, ɛmɛ xeye na ye hu do Mawu we oxo la, kpodo kunu xena ye ɖe na oxo la wu ye we okla. Okla laye bo le ovɔsinsan we agba la gɔ. 10 Ye bo do axwa lelele nɔ, tun mɔ: «Xwetɔ kinkwɛn, Oxojɔxototɔ! Gbɔɔn do jɛ hwe ŋukɔ nu lɛ o na nɔ ote na, gbɔxwe a do ɖɔ ɛhwɛ na nyixɔ ji tɔye na mí, a bo ɖe ohlɔn do mía nu do ɛhun míatɔn xena ye kɔn ɖo onyi wu?» 11 Ye bo na awu gaga owee ɖe ɖokpo-ɖokpo yetɔnye seŋu, ye bo lɔ na ye tun ye boo mɔ kuhun na azan ovii ɖe gbɔɔn do jɛ hwexenu na ye hatɔ odansɔviye kpodo ye nɔvyɛye, xeye na ye ɖo na va hu ɖi ye ha ye, we xixlɛmɛ a sɔgbe.
12 Xena e fo josido ɛdɛngɔ la, onu xena ko kpɔn xɛn: Nyixɔ hunhun taŋu, ohwe bo trɔ zun owii ɖi lutuvɔ ha, osun la blebu bo trɔ zun ovɛ ɖi ɛhun la. 13 Sunhweviye bo flɛ jɛ nyixɔ ji nɔ sɔn jiŋukunsin, ɖi lena otinkun afyanye nɔ flɛ nɔ ɖo ha le otin xena jɛhɔn ɖaxo do owe na nɔ ji. 14 Jiŋukunsin bo xa eɖe tɛ ɖi lena ye nɔ xa ojan ɖo ha, ye bo ɖe okpó zɛtɛye kpodo oto xeni le otɔdodomɛ zɛtɛye tɛ, le tɛnxo yetɔn. 15 Xɔlu nyixɔ ji tɔnye, ogaye, sɔjagaye, dɔkunnɔye, hɔnhlɔnnɔye, gbɔɔn do jɛ ɛmɛ gbokpweye seŋu ji, ɛmɛxixɔye o, ɛmɛ le yeɖe si ye o, ye si seŋu, bo va yi bɛ do ogun xeye ni le ɛkpɛn ɖaxo-ɖaxoye mɛ, kpo ɛkpɛn ɖaxo-ɖaxoye ji le okpóye mɛ. 16 Ye bo lɔ na okpó laye, kpodo ɛkpɛn laye nɔ tun mɔ: «Mi hɔ jɛ mía ji, mi sɔ mi hlwa do ɛmɛ xeni xlɔn onyi le xɔluzinkpwe la ji, na mía do si na Lɛngbɔvi la we aɖidido. 17 Ɖo aɖidido yetɔn we azan ɖaxo la va; onu lɛ na kpewu nɔ ote le e nu?»