Wema xena Jan wlan ɖodan agun xeni le Sadi
3
1 «Wlan wema ɖodan ɛwɛndotɔ Sadi we agun tɔn, tun mɔ: Oxo xena ɛmɛ xeni ɖo Mawu we gbigbɔ acowe laye, kpodo sunhwevi acowe laye lɔ xɛn: ko nyɔ odan tɔweye, ko bo nyɔ-ɛ tun ye nɔ sɔ we do kpɔn ɛmɛ le ɛgbɛ, vɔ o ku. 2 Fɔn, a bo do hɔnhlɔn onu xeye ni drɔn na we bo ka mɔ ku nɔ ye, ɖo ko kpɔn tun odan tɔwe laye ɔn sɔgbe le Mawu tɛye we ŋumɛ. 3 Ɖoŋudo okplan xena o se bo yi wu. Zɔn gbɔn e ji, a bo ɖɔli jijɔ. Na o ɔn nɔ ŋuzɔn, ko na va va le ajiji mɛ, ɖi fyanfinnɔ ha, o ko na nyɔ ogan xe mɛ na ko na va va. 4 Ganke, o ɖo ɛmɛ ɖeye le Sadi la, ye ko do oɖyu awu yetɔnye. Ɛmɛ mɛ laye wɛ nyi ɛmɛ xeye ni jɛ na do kplɔ-ɔ do ye, kpodo awu owee le okɔ. 5 E mɛ, ɛmɛ xeni na ɖu oji, awu owee wɛ e na do. Ko ɔn tutu nyikɔ etɔn tɛ nɔ kpɔn gbeɖe le ɛgbɛ we wema la mɛ. Ko na nyɔ-ɛ tun ɛmɛ tɛye bɛ e bo nyi le Didaye, kpodo ɛwɛndotɔ etɔnye we ŋukɔn. 6 Ɛmɛ xeni ɖo oto, ni se onu xena Gbigbɔ la lɔ na agunye nɔ.»Wema xena Jan wlan ɖodan agun xeni le Filadɛlifi
7 «Wlan wema ɖodan ɛwɛndotɔ Filadɛlifi we agun tɔn, tun mɔ: ɛmɛ Kinkwɛn, oxojɔxototɔ, ɛmɛ xe si na Davidi we cavi la le, na e hun ohɔn, ɛmɛ ti ɔn kpewu nɔ tu-i, na e tu ohɔn, ɛmɛ ti ɔn kpewu nɔ hun-i, e lo lɔ nɔ tun mɔ: 8 ko nyɔ odan tɔweye. Kpɔn, ko hun ohɔn ɖe do ŋukɔn na we, ɛmɛ ti ko kpewu na tu-i; ɖo o ɔn ɖo hɔnhlɔn susu ɖe, ganke o bo zɔn gbɔn oxo tɛye ji, o ko gbɛ-ɔ. 9 Ye ɛmɛ ojokantɔye, xeye ni le Satana we ogbɛta la mɛ ye, bo nɔ yɔ yeɖe nɔ tun Jwifuye, ganke ye ko nɔ wa onu ɖi Jwifuye ha; ko na sɔ ye do asi na we. Ko na na na ye na va jɛ klita le akɔnmɛ na we, ye ba do nyɔ-ɛ tun mɔ, mɔ ko bo yi owan na we. 10 Ɖo, oxo xena ko lɔ na we tun myɔ boo do vivɛnu, o hɛn e wu. Mɔ ŋutɔ can, ko na hɛn we ɖo ote le didokpɔn we ogan xeni gbɔn nɔ ɛgbɛ la zɛtɛye ji nɔ mɛ, e bo na nyi didokpɔn na ɛmɛ xeni le nyixɔ ji ye. 11 Ko gbɔn nɔ zaanɖe. Hɛn onu xeni le asi na we wu nywɛɖe, na ɛmɛ ɖe ni ká yi xɔlugba tɔwe. 12 Ɛmɛ xeni na ɖu oji la, ko na sɔ-ɛ do wasi gundo le Mawu tɛye we oxwegbe, e ko mɔ tɔn le e mɛ nɔ kpɔn gbeɖe. Ko na wlan Mawu tɛye we nyikɔ do e wu, a bo wlan Mawu tɛye we toxo we nyikɔ can do e wu, toxo xeni nyi Jeluzalɛmu yɔyɔ la, xeni jɛ ote nɔ sɔn jiŋukunsin, sɔn Mawu tɛye de, ko bo na mɔ wlan nyikɔ yɔyɔ tɛye can do e wu. 13 Ɛmɛ xeni ɖo oto, ni se onu xena Gbigbɔ la lɔ na agunye nɔ.»
Wema xena Jan wlan ɖodan agun xeni le Lawodise
14 «Wlan wema ɖodan ɛwɛndotɔ Lawodise we agun tɔn, tun mɔ: oxo xena ɛmɛ xeni nyi Ami, bo nyi kunuɖetɔ ogbejinɔtɔ, oxojɔxototɔ, bo mɔ nyi onu ɖekpekpe xena Mawu wasi we jɔtɔ, lɔ xɛn: 15 ko nyɔ odan tɔweye: o ɔn fa, o ko mɔ xɔ ozo. Na o do fa alo o do xɔ ozo wɛ, e na nyɔ! 16 Vɔ xena e nyi tun gblɔ wɛ o gblɔ, o ko xɔ ozo, o ko mɔ fa, ko na tun we, le onu tɛye mɛ. 17 Ɖo, o lɔ nɔ tun mɔ: ko jɛ dɔkun, dɔkunnu le siye, onu ti ɔn dɛn-ɔ. Vɔ o ko nyɔ-ɛ tun, ɛmɛ xena onu ɖe ɔn nyɔ na, dɔŋuɖununɔ, ayanɔ, ŋuvanɔ kpodo ɛmɛ xeni le ɛmɛmɛ wɛ o nyi. 18 Mi wɛ dɔn, susu xena ko ɖe na we nɔ xɛn: va xɔ sika xena ye do ozo mɛ, oɖyu ti ko mɔ le e mɛ, le kɔn ye, naa do nyi dɔkunnɔ oxojɔxotɔn. Va xɔ awu owee naa do, na ŋunya ko mɔ do wa we nɔ do ɛmɛmɛ xena o le wu, a bo xɔ ŋukunsintinkɛn a do ŋukunsin tɔweye ji, naa do kpɔn onu. 19 Ɛmɛ xena ko yi owan na zɛtɛye, mɔ, ko nɔ gbɛ onu na ye, a bo dɔn oto na ye. Mi wɛ dɔn, bizo, a bo ɖɔli jijɔ! 20 Ɖo oto, ko le ohɔn ji bo lo xuxu-i nɔ, na ɛmɛ ɖe se ogbe tɛye, bo hun ohɔn la, ko na ɖyɛ e mɛ le e kɔn. Ko na ɖu onu kpo-e, emyɔ can ba ɖu onu kpo-o. 21 Ɛmɛ xeni na ɖu oji la, ko na ɖe omɔ ni-i, e ba do xlɔn onyi kpo-o le xɔluzinkpwe tɛye ji; ɖi lena mɔ can ko ɖu oji, bo xlɔn onyi kpodo Didaye le xɔluzinkpwe etɔn ji ɖo ha. 22 Ɛmɛ xeni ɖo oto ni se onu xena Gbigbɔ la lɔ na agunye nɔ!»