Pɔlu lɔ na Timɔte tun ni boo jla Mawu we oxo la
4
1 Ko lo byɔ we nɔ vivɛɖe le Mawu we ŋukɔn, kpodo Klisu Yesu xeni na va ɖɔ ɛhwɛ na ɛmɛ le ɛgbɛye kpodo ɛmɛ kukuye we ŋukɔn, ko bo lo byɔ we nɔ do Yesu we viva kpodo Xɔluɖuɖu etɔn wu tun mɔ, 2 jla Mawu we oxo la, tɛ ɛɖɛ do e ji le ogan ɖekpekpe mɛ, ogan la mɛ nyɔhwyan o, e ɔn nyɔhwyan o, ɖe xlɛ ɛmɛye tun onu nyanyla bɛ ye bo wasi, gbɛ onu na ɛmɛye taŋu, do akpakpa lanmɛ na ɛmɛye, o ba nɔ wasi onu mɛ laye tɛgbɛ kpodo agbɔxo dido kpodo onukplan-ɛmɛ we ayixa kpo. 3 Ɖo, ganmɛ gbɔn nɔ na ɛmɛye ɔn mɔ jlo na ɖo oto onukpinkplan adodwe la nɔ, vɔ, dogbɔn ye ŋutɔye we ojloye mɛ, ye na na na onukplan-ɛmɛtɔ susuye na lɛdo ye, a bo nɔ do lɔ onu xeye na ye nɔ kan na se ye, na ye. 4 Ye na nɔ tu oto yetɔnye ye ko mɔ do se oxojɔxo la nɔ, a bo va yi do ota hwenuxo ma nyɔ ota na ye mɛ. 5 Vɔ, myɔ, nɔ ɖu ɖiwe ji le onu zɛtɛye mɛ, do oji le aya ɖuɖu la mɛ, wasi ɛwɛnnywɛjlatɔ we odan la, wa odan xena Mawu sɔ do asi na we la seŋu.6 Mɔ, ye o sɔ ɛgbɛ tɛye do san ovɔ, hwexenu na ko na lɛ le ɛgbɛ la mɛ nɔ can, bo o va. 7 Ko fun ahwan nywɛ la, ko vɔ odun dido tɛye, ko hɛn xɔse la wu. 8 Fifi, xɔlugba xena ye nɔ na ɛmɛ xeni zan ɛgbɛ jijwɛ, wɛ ye o jlaɖo ɖo onyi na-a, mi wɛ Xwetɔ la xeni nyi ɛhwɛɖɔtɔ jijwɛ na sɔ na-a, le azan mɛ gbe, e ko nyi mɔ ɖokpo hɛn, vɔ, e na na ɛmɛ zɛtɛye xeni na yi owan na titrɔ va etɔn.
Pɔlu lɔ na Timɔte tun ni boo va he kɔn ye
9 Jɛ gbagba na va kɔn ye le madɛn-madɛn mɛ. 10 Ɖo, Demasi gbɛ-ɔ do owan xena e yi na ɛgbɛ mɛ we onuye wu, e bo sɔn yi Tɛsalonika. Klɛsan yi Galasi, Titu bo yi Dalumasi. 11 Lwiki ɖokpo gee wɛ le kɔn ye. Kplɔ Maki, myɔ kpo mi kpo ba zɔn do va, ɖo, e nɔ kpedo wu ye taŋu le Mawu we odan la mɛ. 12 Ko sɔ Ticiki ɖodan Efɛzu. 13 Na o gbɔn nɔ, sɔ awu ɖaxo xena ko jo do Trowasi le Kaposu kɔn do va, o ba sɔ wema laye can, le ota ji olangbaza xeye ji na ye wlan onu do ɖi wema ha ye.
14 Alɛsandru xeni nyi gbɛdɛ la, wa onu nyanyla susu kpo-o. Xwetɔ la na tu onu xeni wa ye we axɔ ni-i. 15 Myɔ can, cɔ ɖiwe do e wu, ɖo, e site taŋu do oxo xena mí lɔ ye wu.
16 Tantyantɔn na ko do yi ɛhwɛ ŋukɔn, bo do lɔ oxo a do ɖe xlɛ tun ɛhwɛ tɛye bo jɔ, ɛmɛ ti ɔn nɔ godo na-a, ɛmɛ zɛtɛye seŋu wɛ jo-o do, Mawu ni ká do ɛhwɛ etɔn na ye o. 17 Xwetɔ la wɛ kpedo wu ye, bo do hɔnhlɔn lanmɛ na-a, e mɛ, dogbɔn ji ye, Ɛwɛn Nywɛ la bo nyi jijla taŋu, ɛmɛ xeni ɔn nyi Jwifuye zɛtɛye bo se-e. E bo hwlɛn-ɔ gan le kinnikinni jaŋuta we onu mɛ. 18 Xwetɔ la na mɔ ɖe-o tɔn le tito nyanyla ɖekpekpe mɛ, a bo hwlɛn-ɔ gan na ma do ɖyɛ jiŋukunsin we Xɔluɖuɖu etɔn mɛ. Gigo nyi etɔn gbɔɔn do yi mavɔmavɔ mɛ! Ami.
Pɔlu do ogbe na ɛmɛye
19 Do ogbe na Plisika kpodo Akilasi kpo, a bo mɔ do ogbe na Onɛzifɔ we xwedo can. 20 Elasi ci Kɔlɛnti. Ko bo jo Trofimu do Milɛ, ɖo e ɔn le ozan. 21 Jɛ gbagba, a bo va gbɔxwe vivɔ we ganmɛ a va.
Ebulusi, Pudɛnsi, Linusi, Klodya kpodo nɔvi xɔsetɔ zɛtɛye do ogbe ɖodan we.
22 Xwetɔ la ni le kpo we.
Mawu ni wasi dɔmɛnywɛ na mi.