Nikodɛmu va Yesu kɔn
3
1 Dahwe ɖe le Falizitɔye mɛ, ye bo nɔ yɔ-ɛ tun Nikodɛmu. Ɛmɛ ŋukunsin le e ji ɖe wɛ e nyi le Jwifuye mɛ. 2 E va Yesu kɔn le ozan mɛ, bo lɔ ni-i tun mɔ: «Hlabi, mí nyɔ-ɛ tun Mawu wɛ sɔ we ɖodan, o ba do va kplan onu mí. Ɖo ɛmɛ ti ɔn kpewu na ɖe josi mɛ ye sɔ xlɛ dogbɔn ŋudandonu xena o wasi nɔ ye mɛ na Mawu ɔn le kpo-e.» 3 Yesu bo lɔ ni-i tun mɔ: «Oxojɔxo kpatakli xɛn ko lo lɔ na we nɔ, na ye ɔn trɔ ji ɛmɛ ɖe, e ɔn kpewu ká kpɔn Mawu we Xɔluɖuɖu la nɔ.» 4 Nikodɛmu bo kan-ɛ se tun mɔ: «Naɖe ye na wa, a mɔ do trɔ ji ɛmɛ xeni o hwɛn? E na mɔ kpewu ɖyɛ onɔ we adɔ mɛ zɔn owegɔ, ye ba mɔ trɔ ji wɛɛ?» 5 Yesu bo ɖo e wu ni-i tun mɔ: «Oxojɔxo kpatakli xɛn ko lo lɔ na we nɔ: na ye ɔn trɔ ji ɛmɛ ɖe, dogbɔn ɛsin kpodo Gbigbɔ mɛ, e ɔn kpewu na ɖyɛ Mawu we Xɔluɖuɖu la mɛ. 6 Ɛmɛ xena ye ji dogbɔn ɛgbɛtɔ ji, ɛgbɛtɔ wɛ e nɔ nyi, ɛmɛ xena ye ji dogbɔn Mawu we Gbigbɔ mɛ, Gbigbɔ la tɔn wɛ e nyi. 7 Ká ni kpaca we tun ko lɔ na we tun ye bo ɖo na trɔ ji ɛmɛ zɛtɛye. 8 Jɛhɔn nɔ xo gbɔn ofi xeni jlo-e, o bo nɔ se zigidi etɔn, vɔ, o ɔn nɔ nyɔ ofi xena e sɔn, gbɔɔn do nyɔ ofi xena e yi nɔ. Mɔsinha ke wɛ e le na ɛmɛ ɖekpekpe xena ye ji dogbɔn Gbigbɔ mɛ.» 9 Nikodɛmu bo kan-ɛ se tun mɔ: «Naɖe lɛ onu mɛ la na jɔ ɖo?» 10 Yesu bo ɖo e wu ni-i tun mɔ: «Myɔ o nyi onukplan-ɛmɛtɔ ɖaxo le Izrayɛli we otogun mɛ, o ko nyɔ onu mɛ ye? 11 Oxojɔxo kpatakli xɛn ko lo lɔ na we nɔ: onu xena mí nyɔ, we oxo wɛ mí lo lɔ nɔ. Onu xena mí kpɔn, we kunu wɛ mí lo ɖe nɔ. Ganke, mi ko kan do kunuɖiɖe míatɔn ji. 12 Na mi ɔn kan do ji ye le hwexenu na ko lɔ oxo na mi nɔ do nyixɔ ji we onuye wu, naɖe lɛ mi na hɛn ɖo a do va kan do ji ye, le hwexenu na ko na va lɔ oxo na mi nɔ do jiŋukunsin we onuye wu? 13 Ɖo, ɛmɛ ti ɔn yi jiŋukunsin kpɔn zɛgbɔn ɛmɛ xeni jɛ ote sɔn jiŋukunsin la wu, mi wɛ nyi Ɛgbɛtɔ we Ovi laa. 14 Ɖi, lena Mɔyizi kɔ odanb xena ye sɔ oganmu do wasi do yi jigbe le zogbeji ha, mɔsinha ke wɛ ye na kɔ Ɛgbɛtɔ we Ovi la can do yi oji ɖo. 15 E mɛ, ɛmɛ ɖekpekpe xeni na kan do e ji, ko mɔ crɔn nɔ, vɔ e na kpɔn Ɛgbɛ Mavɔmavɔ. 16 Ɖo, Mawu yi owan na ɛgbɛtɔ taŋu, bo sɔ Ovyɛ ɖokpo akogo la sɔ na, na ɛmɛ ɖekpekpe xeni na kan do e ji, ko mɔ do crɔn nɔ, vɔ, e ba kpɔn Ɛgbɛ Mavɔmavɔ. 17 Ɖo, Mawu ɔn sɔ ovyɛ ɖodan ɛgbɛ la mɛ, ni a do va do ɛhwɛ na ɛgbɛtɔye, vɔ e sɔ-ɛ ɖodan, na ɛgbɛtɔye a do kpɔn hwlɛngan dogbɔn Ovi la ji. 18 Ɛmɛ xeni kan do Ovi la ji, Mawu ɔn do ɛhwɛ ni-i nɔ, vɔ, ɛmɛ xeni ɔn kan do e ji, Mawu o do ɛhwɛ ni-i xoxoxo, ɖo, e ɔn kan do Mawu we Ovi ɖokpo gee la ji. 19 Lena ɛhwɛ dido la nyi ɖo xɛn: kinklɛn la va ɛgbɛ la mɛ, ɛgbɛtɔye bo yi owan na vuvlu hugan kinklɛn la, ɖo, onu wiwa yetɔnye nyla. 20 Ɛmɛ ɖekpekpe xeni wa onu nyanyla nɔ, e gbɛ owan na kinklɛn, e ko nɔ jlo na tɛkpɔ kinklɛn la. Ɖo, onu nyanyla wiwa etɔnye na gba va jɛ agbaŋugba. 21 Vɔ, ɛmɛ xeni nɔ zɔn gbɔn oxojɔxo we omɔ ji, e nɔ tɛkpɔ kinklɛn. E mɛ, ye ba do kpɔn tun onuwiwa etɔnye bo sɔgbe kpodo ojlo Mawutɔn.»Jan mɔ ɖe kunu na Yesu ke
22 E mɛ godo, Yesu kpodo onukplanvi etɔnye yi Yude we oto mɛ. Yesu bo nɔ blɛ kpo ye na azan viɖe, bo lɛ Mawu we ɛsin na ɛmɛye nɔ. 23 Jan can bo lɛ Mawu we ɛsin na ɛmɛye nɔ le Ayinɔnu, le Salimu we otota we aha, ɖo, ɛsin su le dodomɛ blɛ la. Ɛmɛye bo nɔ va, ye ba do lɛ Mawu we ɛsin na ye. 24 Ɖo, ye ɔn wle Jan do ogankpamɛ hɔnɖyo. 25 Mi wɛ Jan we onukplanvi ɖeye kpodo Jwifu ɖe, va do aɖikan nɔ do ɛwu sisra wu. 26 Ye va yi kpɔn Jan bo lɔ ni-i tun mɔ: «Hlabi, ɛmɛ ɖe va kɔn we le Judɛn we otɔ la godo le blɛ daan, o bo ɖe kunu do e wu. Ɛmɛ mɛ la can jɛ Mawu we ɛsin lilɛ ji na ɛmɛye, ɛgbɛtɔ zɛtɛye bo yi e kɔn nɔ.» 27 Jan bo lɔ tun mɔ: «Ɛmɛ ti ɔn kpewu na ɖo onu ɖe, na e ɔn nyi tun Mawu wɛ ni-i. 28 Miye ŋutɔye can, mi na ɖe kunu na-a tun ko bo o lɔ saa tun mɔ: “Mɔ hɛn nyi Klisu la, vɔ, Mawu sɔ-ɔ ɖodan, ko bo va jɛ ŋukɔn ni-i.” 29 Nyɔnusu la tɔn wɛ nyi nyɔnu la, vɔ nyɔnusu la we hadwe xeni le aha bo se oxo lilɔ etɔn nɔ, oji nɔ jɔ-ɛ ɖo e se nyɔnusu la we ogbe nɔ. Jijwɛ mɛ la wɛ nyi tɛye fifi, mi wɛ dɔn na oji do jɔ-ɔ nɔ taŋu. 30 E jɛ tun emyɔ we nyikɔ a yi oji nɔ, tɛye ba lo bu nɔ.
31 Ɛmɛ xeni sɔn jiŋukunsin le ota na onu zɛtɛye, ɛmɛ xeni sɔn nyixɔ ji, nyixɔ ji tɔn wɛ e nyi, bo nɔ lɔ nyixɔ ji we oxoye. Ɛmɛ xeni sɔn jiŋukunsin [le ota na onu zɛtɛye oxojɔxo], 32 e nɔ ɖe kunu do onu xena e kpɔn bo se wu, vɔ ɛmɛ ti ko kan do kunuɖiɖe etɔn la ji nɔ. 33 Ɛmɛ xeni kan do kunuɖiɖe etɔn ji, ɖo ɛkpɛn e ji nɔ tun Mawu bo nɔ lɔ oxojɔxo. 34 Ɛmɛ xena Mawu sɔ ɖodan, nɔ lɔ Mawu we oxo, ɖo, Mawu we Gbigbɔ xena e nɔ sɔ do e mɛ, ɔn nɔ ɖo odo. 35 Otɔ la yi owan na Ovi la, bo ni-i ɛcɛ do onu zɛtɛye ji. 36 Ɛmɛ xeni kan do Ovi la ji, na kpɔn Ɛgbɛ Mavɔmavɔ. Ɛmɛ xeni ɔn kan do e ji, ɔn kpɔn ɛgbɛ nɔ, vɔ, Mawu we aɖidido na le e ji.»