Yesu yi alɔwiwletyɔn le Kana
2
1 Onyihinhɔn atɔngɔ gbe etɔn, ye wasi alɔwiwle nɔ le Kana, le Galile we kansin mɛ. Yesu onɔ bo le blɛ la. 2 Ye yɔ Yesu kpodo onukplanvi etɔnye can do va alɔwiwletyɔn la. 3 Xena vɛn va vɔ, Yesu onɔ lɔ ni-i tun mɔ: «Ye ɔn mɔ ɖo vɛn mɔ!» 4 Vɔ, Yesu bo ɖo e wu ni-i tun mɔ: «Naye, onu xena ko na wasi, myɔ hɛn na lɔ na-a mɔ! Ogan tɛye ɔn xo hɔnɖyo.» 5 Onɔ la bo lɔ na onuɖuɖumatɔ laye tun mɔ: «Onu ɖekpekpe xeni na dɔn mi, mi wasi-i.» 6 Dagba ɛdɛn xena ye sɔ ɛkpɛn do wasi, bo le blɛ la, Jwifuye bo nɔ dun ɛsin do ye mɛ a do sra ɛwu. Dagba ɖokpo na hɛn ɛsin lita kanweko mɔsinha. 7 Yesu lɔ na onuɖuɖumatɔ laye tun mɔ: «Mi dun ɛsin do dagba xeye mɛ, na ye a gɔ.» Ye bo dun do ye mɛ gbɔɔn ye bo gɔ fleflefle. 8 Yesu bo lɔ na ye tun mɔ: «Fifi, mi ba, a bo sɔ va yi na onuɖuɖumatɔye we oga la.» Ye bo ba sɔ va yi ni-i. 9 Xena oga la ɖɔ ɛsin xeni trɔ zun vɛn la kpɔn, e ɔn nyɔ ofi xena vɛn mɛ la sɔn, onuɖuɖumatɔ xeye ni dun ɛsin laye wɛ nyɔ-ɛ. Mi wɛ e yɔ nyɔnusu la, 10 bo lɔ ni-i tun mɔ: «Vɛn nywɛ la wɛ ɛmɛ zɛtɛye nɔ na ɛmɛye jɛ ŋukɔn, na ye nu gbɔɔn e bo kpe ye vɔ, o ba va na ye xeni ɔn nyɔhwyan la. Vɔ myɔ, o sɔ vɛn nywɛ la sɔ xla ɖo onyi, gbɔɔn va jɛ fifi!»11 Josi tantyantɔn xena Yesu wasi, dogbɔn ŋudandonu wiwasi mɛ, mɛ. E wasi-i le Kana le Galile we kansin mɛ. E ɖe hɔnhlɔn etɔn sɔ xlɛ, onukplanvi etɔnye bo kan do e ji. 12 E mɛ godo, Yesu kpodo onɔ, kpodo nɔvyɛ, kpodo onukplanvi etɔnye yi Kapɛnawumu, azan ovii ɖe jan bɛ ye nɔ blɛ la na.
Yesu nya onusatɔye le Mawu we oxwe la gbe
(Mat 21:12-17; Mak 11:15-17; Lwk 19:45-46)
13 Vivayi we oxwe Jwifuyetɔn la lo tɛkpɔ nɔ, Yesu bo yi Jeluzalɛmu. 14 Le Mawu we oxwe la gbe, e kpɔn, nyibusatɔye, lɛngbɔsatɔye, kpodo hɔnnɛsatɔye, ohocɛtɔye can bo le onyi xinxlɔn le tavo yetɔnye kɔn. 15 Mi wɛ e sɔ okan bo do wasi oxa, bo nya ye seŋu le oxwe la gbe kpodo nyibu yetɔnye kpodo lɛngbɔ yetɔnye, bo fli tavo ohocɛtɔyetɔnye, bo kankan oho yetɔnye. 16 E bo ɖe ogbe tɔ hɔnnɛsatɔ laye tun mɔ: «Mi bɛ onu mɛ ye seŋu tɛ le bwɛ! Mi ká mɔ sɔ didaye we oxwegbe do wasi ajɔxwe!» 17 Onukplanvi etɔnye bo flin tun ye bo wlan le Mawu we oxo la mɛ tun mɔ: «O Mawu! Owanyiyi ɖaxo xena ko ɖo na oxwe tɔwe nɔ tɔ ja lanmɛ na-aa.» 18 Mi wɛ Jwifuye kan-ɛ se tun mɔ: «Josi ŋukɔ ha lɛ o na ɖe xlɛ mí, na mí a do nyɔ-ɛ tun myɔ bo ɖo ɛcɛ bo na do wa onu ɖo mɔsinha?» 19 Mi wɛ Yesu lɔ na ye tun mɔ: «Mi gba Mawu we oxwe xe la, ko na sɔ onyihinhɔn atɔn ɖo ote, a bo mɔ trɔ gbá-ɛ.» 20 Mi wɛ Jwifu laye lɔ ni-i tun: «Oxwe kanɖe atun ŋukun ɖokpo wɛ ye sɔ, bo do gbá oxwe xe, vɔ myɔ, o bo va lɔ nɔ tun he bo na trɔ gbá-ɛ le onyihinhɔn atɔn gblamɛ?» 21 Vɔ, Mawu we oxwe xe we oxo na Yesu lo lɔ nɔ la, agbaza etɔn ŋutɔ wɛ. 22 Mi wɛ dɔn, xena Yesu va fɔn sɔn ɛmɛ kukuye mɛ, onukplanvi etɔnye va flin tun e bo o lɔ oxo mɛ la ɖo onyi saa. Ye bo kan do Winwlan kinkwɛn laye ji, bo mɔ kan do oxo xena Yesu o lɔ laye ji.
Yesu nyɔ onu xeni le oji mɛ na ɛmɛ zɛtɛye
23 Hwexenu na Yesu mɔ gbɛ le Jeluzalɛmu, le Vivayi we oxwe ɖuɖu la we ogan mɛ, ɛmɛ susu kan do e ji, ɖo, ye kpɔn josi xeye na e ɖe xlɛ dogbɔn ŋudandonu wiwasi mɛ ye. 24 Vɔ Yesu ɔn ɖe oji do ye wu, ɖo, e nyɔ ye ɛmɛ zɛtɛye nywɛɖe. 25 E ɔn hyan tun ye a va lɔ oxo ɖe ni-i sɔn ɛmɛ ɖe wu gbɔxwe can. Ɖo, emyɔ ŋutɔ o nyɔ onu xeni le oji mɛ na ɛgbɛtɔye.