Yesu gɔ adɔn na sɔjaga ɖe we odansɔvi
7
1 Xena Yesu lɔ oxo mɛ laye na ɛmɛ xeye ni ɖo oto-e nɔ ye vɔ, e sɔn yi Kapɛnawumu we toxo mɛ. 2 Le toxo la mɛ, sɔjaga hlɔmatɔn a ɖe le, e bo ɖo odansɔvi ɖe xeni vɛ ni-i taŋu. Odansɔvi mɛ la bo jɛ adɔn gbɔɔn bo ka ku nɔ. 3 Xena sɔjaga la se oxo do Yesu wu, e dɔn Jwifuye we otomɛhyɔnye ɖodan e kɔn, ye ba do ɖe kuku na Yesu tun ni boo va gɔ adɔn na odansɔvi la. 4 Otomɛhyɔn laye bo va Yesu kɔn, ye bo ɖe kuku ni-i ŋuklɛn-ŋuklɛn bo lɔ tun mɔ: «E jɛ tun o na gɔ alɔ na dahwe mɛ la. 5 Ɖo, e yi owan na otogun míatɔn, emyɔ wɛ gbá okplityɔn míatɔn.» 6 Yesu bo kplɔ otomɛhyɔn laye do. Xena e tɛkpɔ oxwe la gbe, sɔjaga la bo dɔn hadwe etɔnye ɖodan, na ye a do lɔ ni-i tun mɔ: «Xwetɔ, ká mɔ do hannu na ɖiwe, ko ɔn jɛ na o na do ɖyɛ oxwe tɛye gbe. 7 E mɛ la wɛ dɔn na mɔ ŋutɔ ɔn jɛ na do va kɔn we. Vɔ, lɔ oxo ɖokpo kpoŋu, odansɔvi tɛye bo na kpɔn adɔngigɔ. 8 Mɔ, ko le agɔ na ɛmɛ, sɔjaye can bo le agɔ na-a. Na ko lɔ na ɛmɛ ɖe tun ni boo yi blɛ, e nɔ yi-i. Na ko mɔ lɔ na ɛmɛ ɖe tun ni boo va, e nɔ va. Na ko lɔ na odansɔvi tɛye ɖe tun ni boo wasi onu ɖe, e nɔ wasi-i.» 9 Xena Yesu se oxo mɛ laye vɔ, sɔjaga la we onu jɛŋu ni-i. E bo trɔ kpan ŋukɔn ɛmɛ susu xeye ni kplɔ-ɛ do laye, bo lɔ na ye tun mɔ: «Ko lo lɔ na mi nɔ tun mɔ, ko ɔn kpɔn xɔse ɖaxo mɛ ha le Izrayɛli we oto mɛ can.» 10 Hadwe xeye na sɔjaga la dɔn ɖodan ye, bo trɔ va sɔn yi oxwe la gbe, ye bo kpɔn tun odansɔvi la bo o xaya.Yesu fɔn okposi ɖe we ovi sɔn oku
11 E mɛ godo, Yesu lo yi toxo xena ye nɔ yɔ tun Nayinu mɛ nɔ, onukplanvi etɔnye kpodo ɛmɛ susu gbagbagba ɖeye bo kplɔ-ɛ do. 12 Hwexenu na e tɛkpɔ toxo la we agbo mɔnu, e kpe ɛmɛye, ye bo yi ocɔ ɖi gbe nɔ. Ɛmɛ xeni ku la bo nyi ovi ɖokpo gee na okposi ɖe. Otovi susu bo le ɛtɛ na nahwe la. 13 Xena Xwetɔ Yesu kpɔn-ɛ, e ɖu adɔnu ni-i, e bo lɔ ni-i tun mɔ: «Ká mɔ fan avin.» 14 Yesu bo zɔn yi ŋukɔn, bo ɖo alɔ ɖaka la wu, ɛmɛ xeye ni hɛn ɖaka la, bo tre. Yesu bo lɔ tun mɔ: «Hwanjavi, ko ɖe ogbe na we nɔ, site!» 15 Mi wɛ ɛmɛ kuku la site bo jɛ oxo lilɔ ji. Yesu bo sɔ-ɛ sɔ na onɔ. 16 Vivɔ bo ɖo ɛmɛ zɛtɛye, ye bo kanfu Mawu nɔ bo lɔ nɔ tun mɔ: «Oxolɔɖonyitɔ ɖaxo ɖokpo tɔn le mía do mɛ, Mawu bo va gɔ alɔ na otogun etɔn.» 17 Onu xena Yesu wasi mɛ la bo gbakpe gbɔn Yude we oto mɛ seŋu kpodo oto xeye ni lɛdo Yude we oto la.
Jan xeni nɔ lɛ Mawu we ɛsin na ɛmɛ, dɔn onukplanvi etɔnye ɖodan Yesu kɔn
18 Jan we onukplanviye bo va lɔ oxo mɛ la zɛtɛye ni-i. E bo yɔ ɛmɛ owe le ye mɛ, 19 bo dɔn ye ɖodan Xwetɔ Yesu kɔn, a do va yi kan-ɛ se tun mɔ: «Myɔ wɛ nyi Klisu xeni ɖo na va la? Alo mí ɖo na mɔ nɔ ote kpɔn ɛmɛ bu wɛɛ?» 20 Onukplanvi laye bo va Yesu kɔn bo lɔ ni-i tun mɔ: «Jan xeni nɔ lɛ Mawu we ɛsin na ɛmɛ, dɔn mí ɖodan a do va kan we se tun mɔ: “Myɔ wɛ nyi Klisu xeni ɖo na va la? Alo mí ɖo na mɔ nɔ ote kpɔn ɛmɛ bu wɛɛ jaa?”» 21 Le hwemɛ la nu, Yesu bo gɔ adɔn na ɛmɛ susu xeye na lanmɛ gble ye kpodo adɔnnɔye. E bo nya gbigbɔ nylakanye le ɛmɛye mɛ, bo hun ŋukunsin na ŋuvanɔ susu. 22 E mɛ godo, e bo ɖo e wu na Jan we onukplanvi laye tun mɔ: «Mi va yi lɔ onu xena mi kpɔn ye kpodo onu xena mi se ye, na Jan. Ŋuvanɔye lo kpɔn onu nɔ, tɛkunɔye bo zɔn zɔnlin nɔ nywɛɖe, okpodɔnnɔye bo kpɔn adɔngigɔ, otokunɔye bo se onu nɔ, ɛmɛ kukuye bo fɔn sɔn oku nɔ, ayanɔye bo se Ɛwɛn Nywɛ la we oxo nɔ. 23 Nyɔnanɔ, wɛ na nyi ɛmɛ xeni ɔn bu xɔse etɔn nɔ do mɔ wu ye!»
Yesu lɔ oxo do Jan wu
24 Xena Jan we onukplanvi laye trɔ sɔn vɔ, Yesu jɛ oxo lilɔ ji na otogun la do Jan wu. E bo lɔ na ye tun mɔ: «Ɛlɛ mi jlo na va yi kpɔn le zogbeji? Okɔn xena jɛhɔn nɔ do owe na nɔ wɛɛ? 25 Fifi ɖe, ɛlɛ mi jlo na va yi kpɔn doo? Dahwe ɖe, e bo wa ɖaŋu jla ɖo wɛɛ? Ɛmɛ xeye ni nɔ do cigan we awuye a bo ɖu ɛgbɛ nɔ ye, xɔluye we oxwegbe wɛ ye nɔ nɔ. 26 Vɔ ɖe, ɛlɛ mi jlo na va yi kpɔn? Oxolɔɖonyitɔ ɖe wɛɛ? Ɛɛn, ko lo lɔ na mi nɔ tun mɔ, e hugan oxolɔɖonyitɔ. 27 Ɖo, emyɔ la wu wɛ ye wlan do tun mɔ:
“Kpɔn, ko na sɔ ɛwɛndotɔ tɛye sɔ ɖodan,
E ba do va yi jla omɔ tɔwe ji ɖo onyi na we.”»
28 Yesu bo mɔ lɔ tun mɔ: «Ko lo lɔ na mi nɔ, le ɛmɛ xeye na nyɔnusi gbɛ ji ye mɛ, ɛmɛ ti ɔn le bo hugan Jan. Vɔ ɛmɛ xeni nyi vikpɛvi sesese le Xɔluɖuɖu Mawutɔn mɛ, e hugan Jan. 29 Otogun la zɛtɛye kpodo takwɛjɔtɔye can, xena ye ɖo oto Jan, ye nyɔ-ɛ tun Mawu bo nyi ɛmɛ jijwɛ. E bo lɛ Mawu we ɛsin na ye. 30 Vɔ, Falizitɔye kpodo osɛnkplan-ɛmɛtɔye, ye gbɛ onu xena Mawu jlo na ye, mi wɛ ye do gbɛ tun Jan bo ɔn lɛ Mawu we ɛsin na heye nɔ.
31 Onu wu lɛ ko na sɔ egbe we ɛmɛye sɔ jlɛ do? Onu lɛ ye ɖi? 32 Ye le ɖi vikpɛvi xeye ni xlɔn onyi le dogbaji, ɖeye bo lo do axwa ɖodan ye hatɔye nɔ tun mɔ: “Mí kun okpɛn bo do ji jijwɛ we ohan na mi, mi ko ɖu owe, mí bo mɔ ji ocɔ we ohanye na mi, mi ko mɔ fan avin!” 33 Ɖo, Jan xeni nɔ lɛ Mawu we ɛsin na ɛmɛ, e va, e ko ɖu kpɔnnɔ nɔ, e ko nu vɛn nɔ, mi bo lɔ tun gbigbɔ nylakan bɛ bo le e mɛ! 34 Ɛgbɛtɔ we Ovi la bo va, bo ɖu nɔ, bo nu nɔ, mi bo lɔ tun mɔ: “Mi kpɔn dahwe mɛ, onu xena e na ɖu kpodo vɛn xena e na nu wu jan wɛ e nɔ bu susu do. Emyɔ kpodo takwɛjɔtɔye, kpodo onu nyanylawatɔye wɛ nyi hadwe!” 35 Vɔ, ɛmɛ xeye ni yi Mawu we onunyinywɛ, ye nyɔ-ɛ tun onu jijwɛ bɛ e bo nyi.»
Nahwe onu nyanylawasitɔ ɖe, kɔn celu do afɔye ji na Yesu
36 Falizitɔ ɖe yɔ Yesu do oxwe etɔn gbe, e ba do va yi ɖu onu kpo-e. Yesu bo ɖyɛ Falizitɔ la we oxwegbe, bo yi tɛnxob a do ɖu onu. 37 Vɔ, le toxo la mɛ, nahwe ɖe le bo nɔ zan ɛgbɛ nyanyla. Xena e se tun Yesu bo ɖu onu nɔ le Falizitɔ la we oxwegbe, e va blɛ la bo hɛn ogo ɖe xena ye sɔ ɛkpɛn owee do wasi. Ogo la bo gɔ kpo celu kpo. 38 Nahwe la bo va nɔ godo na Yesu le afɔnu etɔn, bo fan avin nɔ. Ɖasin etɔnye bo kɔn do afɔye ji na Yesu nɔ, e bo nɔ sɔ oɖa etɔnye do tutu ɖasin laye tɛ, a bo kisic na afɔ laye. E mɛ godo, e ba kɔn celu la do afɔ laye ji. 39 Xena Falizitɔ xeni yɔ Yesu la kpɔn onu mɛ la, e lɔ le eɖe mɛ tun mɔ: «Na dahwe xe la do nyi oxolɔɖonyitɔ wɛ, e na nyɔ ɛmɛ xe ha ŋumyɔ ni nyi nahwe xeni lo ɖo alɔ e wu nɔ, ɛgbɛ ɖuɖyu zantɔ wɛ nahwe la nyi.» 40 Mi wɛ Yesu lɔ na Falizitɔ la tun mɔ: «Simɔ, ko ɖo oxo ɖe na lɔ na we.» Simɔ bo lɔ ni-i tun mɔ: «Onukplan-ɛmɛtɔ, lɔ oxo.» 41 Yesu bo lɔ tun mɔ: «Ɛmɛ owe ɖeye wɛ va yi wyan oho le dahwe ɖe si. Ɛmɛ ɖokpo ɖu ohogand sandi atun (500) do-e, ɛmɛ owegɔ la bo ɖu ohogan kanɖe owo do-e. 42 Xena ye ɔn kpewu na tu axɔ xena ye ɖu laye, dahwe la sɔ axɔ yetɔn laye sɔ kɛ ye. Le ɛmɛ owe laye mɛ, onu lɛ na yi owan na dahwe la sɔ hugan ɛmɛ ɖe?» 43 Simɔ bo ɖo e wu ni-i tun mɔ: «Le onukpinkpɔn tɛye mɛ, ɛmɛ xena e sɔ axɔ susu sɔ kɛ la wɛ.» Yesu bo lɔ ni-i tun mɔ: «Ɛhwɛ tɔwe jɔ.» 44 E mɛ godo, Yesu bo trɔ kpan ŋukɔn nahwe la, bo lɔ na Simɔ tun mɔ: «O kpɔn nahwe xe nɔ? Ko va oxwe tɔwe gbe, o ko na-a ɛsin na ma do klɔ afɔ tɛyee, vɔ emyɔ, e kɔn ɖasin do afɔ tɛyee ji, e bo sɔ oɖa etɔnye bo do tutu ye. 45 O ɔn kisi na-a, vɔ sɔn hwexenu na e do va, jan wɛ e do kisi na afɔ tɛyee nɔ. 46 O ɔn kɔn ami do ota na-a, vɔ, emyɔ bo kɔn celu do afɔ tɛyee ji. 47 Mi wɛ dɔn ko lo lɔ na we nɔ tun Mawu sɔ onu nyanyla susu etɔnye sɔ kɛ-ɛ, mi la wɛ dɔn e do ɖe owan yiyi ɖaxo mɛ la sɔ xlɛ. Vɔ, ɛmɛ xena ye sɔ onu ovi sɔ kɛ, owan yiyi ovi wɛ e nɔ ɖe xlɛ.» 48 Yesu bo lɔ na nahwe la tun mɔ: «O kpɔn sisɔkɛ na onu nyanyla tɔweye.» 49 Ɛmɛ xeye ni lo ɖu onu kpo-e nɔ ye, bo lɔ le yeɖe mɛ nɔ tun mɔ: «Onu lɛ nyi xe, e bo nɔ sɔ onu nyanylaye can sɔ kɛ ɛmɛye?» 50 Vɔ, Yesu bo lɔ na nyɔnu la tun mɔ: «Do xɔse xena o ɖo wu, o kpɔn hwlɛngan. Va sɔn le fifa mɛ.»