Yesu we jiji
2
1 Le hwemɛnu, xɔlu ɖaxo Hlɔmatɔn xena ye nɔ yɔ tun Ogwisi, ɖe ogbeta ɖokpo tɔn tun otovi zɛtɛye bo na do nyikɔ wema mɛ gbɔn Hlɔma we oto ɖaxo mɛ. 2 Nyikɔ dido wema mɛ tantyantɔn mɛ la, ye wasi-i le hwexenu na xɔlu ɖaxo Hlɔmatɔn sɔ Kilinuwisi sɔ ɖo oga le Sili we oto mɛ. 3 Otovi ɖekpekpe ɖo na trɔ va toxo xe mɛ na e jɔ sɔn, blɛ wɛ e na do nyikɔ wema mɛ le. 4 Jozɛfu can lɛ le otota Nazalɛtitɔn xeni le Galile we kansinmɛ mɛ, bo na do va yi Bɛtɛlɛxɛmu we otota xeni le Yude we oto mɛ. Ɖo, Bɛtɛlɛxɛmu we otota mɛ wɛ ye ji Davidi le. Davidi la we okunkan mɛ bɛ Jozɛfu tɔn sɔn. 5 E na va yi do nyikɔ wema mɛ, emyɔ kpodo Malya xena e sɔ agɔ la. Le hwemɛnu gomi bo o le Malya si. 6 Vɔ, hwexenu na ye le Bɛtɛlɛxɛmu, Malya we ovijiji we ganmɛ va su. 7 Malya bo ji ŋusunglovi ɖokpo, xeni nyi ovi tantyan etɔn. Xena ye ɔn kpewu kpɔn tɛnxo le jonɔyityɔn, e butu avɔ do ovi la, bo sɔ-ɛ sɔ hlɔn onyi do onu xe mɛ na ye nɔ na onuɖuɖu kanlinye do.Mawu we ɛwɛndotɔ ɖe, va do Yesu we jiji we ɛwɛn na ogbɔkplɔtɔye
8 Le kansin mɛ la mɛ, ogbɔkplɔtɔ ɖeye nɔ cɔ ozan le hɔntun a do kpe ŋukunsin do ogbɔ yetɔnye wu. 9 Ɛwɛndotɔ Mawutɔn ɖe bo ze do ŋumɛ na ogbɔkplɔtɔ laye. Gigo Mawutɔn bo trɔ do ye kpo kinklɛn kpo, vivɔ ɖaxo ɖe bo jɛ ye ji. 10 Ɛwɛndotɔ Mawutɔn la bo lɔ na ye tun mɔ: «Mi ká mɔ vɔ, ɖo ko hɛn Ɛwɛn Nywɛ ɖe va na mi. Ɛwɛn xeni na hɛn jijwɛ ɖaxo va na Mawu we otogun la. 11 Le ozan xe mɛ, ye ji hwlɛngantɔ na mi le Davidi we toxo mɛ. Ovi la wɛ nyi Xwetɔ Klisu. 12 Lena mi na do josi-i ɖo xɛn: mi na kpɔn ovifɛ ɖe, ye bo butu avɔ do-e, bo sɔ-ɛ sɔ hlɔn onyi do onu xe mɛ na ye nɔ na onuɖuɖu kanlinye do.»
13 Zɔnɖokpo kpoŋu, Mawu we ɛwɛndotɔ ahwankpɔ bo va bɔ do ɛwɛndotɔ tantyantɔn la wu. Ye bo ji kanfu we ohanye na Mawu, bo tun mɔ:
14 «Gigo na Mawu le jiŋukunsin
Fifa na ɛmɛ xeye na e yi owan na le nyixɔ ji.»
Ogbɔkplɔtɔye yi Bɛtɛlɛxɛmu bo do va yi kpɔn ovi xena ye ji la
15 Xena Mawu we ɛwɛndotɔ laye trɔ sɔn yi jiŋukunsin vɔ, ogbɔkplɔtɔ laye lɔ na yenɔniɔye tun mɔ: «Mí a yi Bɛtɛlɛxɛmu we otota mɛ na mí a va yi kpɔn onu xeni jɔ, onu xena Xwetɔ la ɖe xlɛ mí.» 16 Ye hlwɛndo bo do yi otota la mɛ, bo va yi kpɔn Malya kpo Jozɛfu, kpodo ovifɛ la le onyihinhlɔn le onu xe mɛ na ye nɔ na onuɖuɖu kanlinye do. 17 Xena ye kpɔn ɖo mɔsinha vɔ, ye jla onu xeye na ye se do ovi la wu ye. 18 Oxo la kpaca do ɛmɛ ɖekpekpe xeni gbɛ se oxo xena ogbɔkplɔtɔ laye lɔ. 19 Vɔ Malya bo nɔ ɖoŋudo onu mɛ la zɛtɛye wu nɔ. E bo nɔ bu ota mɛ do ye wu nɔ. 20 E mɛ godo, ogbɔkplɔtɔ laye trɔ kɔ. Ye do gigo na Mawu, bo kanfu Mawu na onu xena ye se bo kpɔn. Ɖo, onu laye jɔ pɛpɛpɛ ɖi lena Mawu we ɛwɛndotɔ la lɔ na ye ɖo ha.
Ye na nyikɔ Yesu
21 Xena ye ji Yesu we onyihinhɔn atrotɔn gɔ gbe, ganmɛ va su na ye na do gbo ada ni-i. Ye bo ɖo nyikɔ ni-i tun Yesu ɖi lena ɛwɛndotɔ Mawutɔn lɔ na Malya ɖo saa ha, gbɔxwe e do va yi gomi ovi la tɔn.
Ye hɛn Yesu va Mawu we oxwegbe
22 E mɛ godo, ganmɛ va su na Malya kpo Jozɛfu kpo na do va yi sra ɛwu ɖi lena Osɛn xena Mawu na Mɔyizi lɔ ɖo ha. Mi wɛ dɔn, Jozɛfu kpo Malya kpo hɛn ovi la do yi Mawu we oxwegbe le Jeluzalɛmu a do sɔ-ɛ sɔ xlɛ Xwetɔ la. 23 Ye wasi mɔsinha ɖo Xwetɔ la we Osɛn lɔ tun mɔ: «Ye na ɖe ŋusunglo tantyan zɛtɛye ɖo ovo na Mawu.» 24 Ye ɖo na va yi san ovɔ kpodo kpanxwele owe alo hɔnnɛvi owe ɖi lena Osɛn mɛ la ke byɔ ɖo ha. 25 Vɔ le hwemɛ la nu, dahwe ɖe le Jeluzalɛmu, ye bo nɔ yɔ-ɛ tun Simɛnyɔ. Dahwe mɛ la bo nyi ɛmɛ jijwɛ, bo nɔ ɖo sisi na Mawu. E le ote kpɔn ɛmɛ xeni na va hwlɛn Izrayɛli gan. Gbigbɔ Kinkwɛn bo le e ji, 26 bo ɖe xlɛ-ɛ tun e bo ɔn ku nɔ gbɔɔn do va jɛ hwexenu na e bo na kpɔn hwlɛngantɔ Klisu xena Xwetɔ la bo na ɖo ɖodan. 27 Gbigbɔ Kinkwɛn kplɔ-ɛ yi Mawu we oxwegbe, ogan mɛ la mɛ Jozɛfu kpodo Malya kpo kplɔ Yesu va Mawu we oxwe la gbe bo na do wasi onu xena Osɛn la byɔ tun ye bo na wasi ni-i. 28 Simɛnyɔ yi Yesu do alɔ etɔn mɛ, bo do ɛkpɛ na Mawu, bo tun mɔ:
29 «Xwetɔ, fifi, ogbe xena o xo na-a la, e cɛ,
O hɛn, o na yi odansɔvi tɔwe la we gbigbɔ le fifa mɛ.
30 Ɖo, ko kpɔn hwlɛngan xena o na mí kpo ŋukunsin kpo,
31 Hwlɛngan xena o jlaɖo le ɛgbɛtɔ zɛtɛye we ŋumɛ.
32 Mi wɛ nyi kinklɛn xeni na ɖe nyikɔ tɔwe sɔ xlɛ ɛmɛ zɛtɛye le ɛgbɛ la mɛ
Bo na nyi gigo na Izrayɛli xeni nyi otogun tɔwe.»
Simɛnyɔ lɔ oxo ɖo onyi
33 Oxo xena Simɛnyɔ lo lɔ nɔ do ovi la wu, e kpaca do Jozɛfu kpodo Malya. 34 Simɛnyɔ xo fifa we ɛɖɛ na ye, bo lɔ na Malya tun mɔ: «Do ovi mɛ la wu, ɛmɛ susu na jɛ onyi le Izrayɛli we oto mɛ. Mɔsinha ke, Izrayɛli vikpɛ susu buye, bo na fɔn site. E na nyi josi Mawutɔn, ɛmɛye bo na site do e wu. 35 Vɔ, e na ɖe susu hwihwla xeye ni le ayixa mɛ na ɛgbɛtɔye do agbaŋugba. Myɔ Malya, o na nyɔ-ɛ tun ɖi lena dɛnkpwe nɔ gbo ɛmɛ ɖo ha, mɔsinha ke wɛ vivɛsise na gbo ojikan na we ɖo.»
Ana xeni nyi oxolɔɖonyitɔ do ɛkpɛ na Mawu do Yesu wu
36 Nyɔnu ɖokpo xeni nyi oxolɔɖonyitɔ, can bo le ofi la. Ye nɔ yɔ-ɛ tun Ana xeni nyi Fanuwɛli we ovi bo tɔn sɔn Acɛ we akɔta mɛ. Nyɔnu la o nyi ɛmɛhyɔn taŋu. E ɖe osu le nyɔnuvi mɛ etɔn, emyɔ kpodo oswa la kpo bo nɔ okpɔ na oxwe acowe. 37 E mɛ godo, oswa ku, e bo trɔ zun okposi, e ko mɔ ɖe osu ti. Nyɔnu mɛ la, e ɖo oxwe kanwe ŋukun ɛnɛ. E ɔn nɔ lɛ le Mawu we oxwegbe gbeɖe. E bo nɔ sɛn Mawu nɔ ozan kpo oklo kpo dogbɔn onu bibla kpodo ɛɖɛxixo mɛ. 38 Emyɔ can va le ogan mɛ la mɛ pɛpɛpɛ, bo jɛ ɛkpɛ dido na Mawu ji do ovi la wu. E bo jɛ ovi la we oxo lilɔ ji na ɛmɛ ɖekpekpe xeni tre kpɔn Mawu nɔ tun e bo na va hwlɛn Jeluzalɛmu we toxo gan.
Malya kpo Jozɛfu kpo trɔ gbɔn va Galile
39 Xena Jozɛfu kpo Malya kpo wasi onu xeye na Mawu we Osɛn la byɔ zɛtɛye vɔ, ye trɔ sɔn yi Galile le otota yetɔn xeni nyi Nazalɛti mɛ. 40 Ovi la bo lo hwɛn nɔ, bo ɖo hɔnhlɔn nɔ. E ɖo onunyinywɛ ganji, Mawu we dɔmɛnywɛ bo le kpo-e.
Yesu le Otɔ we oxwegbe
41 Jozɛfu kpo Malya kpo nɔ yi Jeluzalɛmu we toxo mɛ oxwesɔ-oxwesɔ na Vivayi we oxwe ɖuɖu. 42 Xena Yesu ɖo oxwe weve, ye kplɔ-ɛ yi Jeluzalɛmu ɖi lena ye o nɔ wasi ɖo saa ha, a do va yi ɖu Vivayi we oxwe. 43 Xena ye ɖu oxwe la vɔ, Jozɛfu kpo Malya kpo bo lo trɔ sɔn nɔ, ye ko nyɔ-ɛ tun Yesu ci Jeluzalɛmu. 44 Ye bo bu-i nɔ tun Yesu bo le ɛmɛ xeye kpo ye kpo ni zɔn kpɔkpɔ le omɔ ji nɔ ye kɔn wɛ ha. Xena ye zɔn zɔnlin na onyihinhɔn ɖokpo vɔ, ye va jɛ Yesu kinkan ji le ɛmɛ yetɔnye kpo hadwe yetɔnye kɔn. 45 Xena ye ɔn kpɔn-ɛ, ye trɔ kɔ yi Jeluzalɛmu, ye bo kpɔtɔ lo kan-ɛ nɔ. 46 Onyihinhɔn atɔngɔ gbe etɔn, ye va yi kpɔn-ɛ le Mawu we oxwegbe, e bo xlɔn onyi le osɛnkplan-ɛmɛtɔye mɛ, bo lo ɖo oto ye nɔ, bo lo kan oxo se nɔ. 47 Zinzin etɔn kpo oxo xena e ɖo oxo wu nɔ ye, kpaca do ɛmɛ ɖekpekpe xeni se oxo xena e lɔ nɔ ye. 48 Xena Malya kpo Jozɛfu kpo va yi kpɔn-ɛ, avo xo ye, onɔ bo lɔ ni-i tun mɔ: «Ovi tɛye, ɛlɛ jɔ o do wasi mɔsinha kpo mí? Awo! Ojikan ka gbo na mɔ kpo didawe kpo nɔ, mí bo kan we nɔ.» 49 Yesu bo lɔ na ye tun mɔ: «Ɛlɛ dɔn na mi do kan-a nɔ? Alo mi ɔn nyɔ-ɛ tun ko ɖo odan bo na wa le Didaye we oxwegbe wɛɛ?» 50 Vɔ, ye ɔn se oxo xena Yesu lo lɔ na ye nɔ la gɔnmɛ. 51 Yesu bo kplɔ ye do, bo trɔ sɔn yi Nazalɛti, bo se otonu na ye. Malya bo nɔ ɖoŋudo onu mɛ la zɛtɛye wu nɔ. 52 Yesu bo lo hwɛn nɔ, onunyinywɛ etɔn bo jɛ e ji nɔ, onu etɔn bo jɛŋu na Mawu kpo ɛgbɛtɔye kpo nɔ.