Lɔga Kɛ̀yɛbhɛa Eriya Tumu
5
1 Zukte yɛbhbhɛ Yesus bhɛa anɛa Kirisose kumulɔng a erroa Tumu.
Nɔng inde ibhɛsɛn hira lɔmma eri hiniye,
ngangaye dhaa ibhɛsɛn chɔɔ eriya ngahirronu hini sɛgɛn.
2 Na ko agge hunde kìbhɛsɛn Tumu hinisi na kème lɔga bere ajjiy :nɛaye,
ngangaye kàggayɔ hunde dhaa kan zuga kìbhɛsɛna erroa gɛnyɛ hinisiye.
3 Na hunde kɛ̀bhɛk lɔga ajjiy :Tumuye,
ngangaye dhaa kan zuga kìbhɛsɛna nɔng hinisi dhere.
Yɔk chɔɔ ngalɔkta gɛny bere ajjiyte bhɛa kènno kɛ̀bhɛktɛ dhandali ngayo,
4 ke ngaya erroa gɛnyɛ kumulɔng anɛ ɔnnɛ na marɛ lɔga ku kuhu messɛa :zugu bay ngaya na dhɔyɛye.
Nɔng agge bhee kàmarɛ ngalɔkta ku kuhu na kɔ̀dhɔyɛye a ngaya kɛ̀yɛbhɛ Yesuse.
5 Na hirre mar ngalɔkta ku kuhu na dhɔtte a nɛng?
Ngayo hirre yɛbh bhɛa Yesus anɛa Eriya Tumuye sɔng!
6 Nɔng Yesus Kirisos a hira bere kunno ba na kùchurro ma na koo hunaa kìlakkaye kalgallayɔ.
a Na huna bere kunno ba,
bhee bere kunɛ na kùchurɛ ma sɔng ngayo.
Bere kunno na kùchurro ma na koo iho na kìlakka na kalgallayɔ.
Na lɔga gɛnyɛ zugo kɔbhɛsɛn :Kuloya Tumu ke ngaya Kuloya Tumu anɛ na ku dhereye.
7 Nɔng bhɛa kàggayɛa lɔga Yesusi bhɛa anɛa dhere,
a gaminya sizzi,
8 kona a Kuloya Tumu,
gena a maa bere kùchurɛa nɔng ko nyabhaa bere kalgalɛa kala kìlagɛa.
Yɔk ngagaminyaya ku sizziye kari dhugunnonɛ lɔga hologun dhɔnɛna.
9 Nɔng agge kan ngagiya kìshik lɔga kɔbhbhagiyɛa :zuguye.
Na yɔk lɔga kɔbhbhagiy :Tumu agga jorronɛa ga zugony ke ngaya anɛ ga yokkono :nɛa na dhugunnonɛa lɔga Eriya Nɛnɛye.
10 Nɔng inde yɛbh bhɛa Yesus anɛa Eriya Tumuye,
ngalɔkta bere dhugunɛsɛn :Tumuye gayɔ hunde a dhereye,
na lɔ hinisɔ.
Na nɔng inde Tumu ngayɛbhbhoye,
a hira ojjo Tumu ke butogi ke ngaya lɔga Yesusi dhugunnono :Tumu ngayɛbhɛoye.
11 Yɔk ngalɔkta a ɛnɛnggeo,
Tumu bere ayiyɔ basseya iho dhul ko kingi.
Na ngabasseyta lɔ :Eriya Nɛnɛ.
12 Na inde ɛl ko Eriya Nɛnɛ ke dhɔnɛye,
lɔ basseya iho dhul.
Na nɔng inde ko Eriya Nɛnɛ ke dhɔnɛ ngaɛlloye,
basseya iho dhul ngalɔmmo.
Lɔga Kennɛnɛa Ba
13 Ngazukta yɛbhbho sara Eriya Tumuye,
anye bhee kɔgɔdhdhagɛung ngalɔktaye a ngaya kèni taktɛ bhɛa lɔmɛo basseya iho dhulde.
14 Nɔng agge hunde kàllinɛ ko Tumuye,
bhee bho ngakɛ̀ngɛrsɛoye,
a ngaya hunde kògol lɔga hinnogiy :nɛaye,
shikkɛiyte.
15 Na hunde agge kan ngagiya kàgga bhɛa shikkɛiyiye,
ko yɔk lɔga kògollo bhɛa nɛnɛ hunde dha bɔɔ urruknyɛsɛ na ayiyɔye,
kàggayɔ.
16 Na igge hunde arto hira yɛbhbho kammannaa Yesusi kari hunde me lɔga gɛrsa,
anda nɔng dhul ngaujjukkɛayo na rɛssaoye,
ogoldɛsɛ Tumu na aynde ale ajjɛ :Tumu basseyte.
Yɔk ngalɔkta koyogiye agga hira messo lɔga gɛrsa na nɔng dhul ngaujjukkɛayo na rɛssao.
Na yɔk lɔga gɛrsa ujjukkɛa zugo dhul na rɛsɛa ɛllɛ.
Na hunde tɔlɔ inde me lɔkte ku ngangaye,
nɔng Tumu ngaogolɛsɛno.b
17 Yɔk lɔga ku kuhu kumulɔng a ridhing.
Na nɔng ridhinga zugo dhul ngaujjukkoo na rɛssɛayo ihe.
18 Yɔk zuga teya erroa Tumu kumulɔng hunde lɔga gɛrsa dirr ngani ngamessɛoye,
agge kàggayɔ ke ngaya Eriya Tumu bhɛgɛ yɔk shɛɛ na Moldoy ngatiranyɛoye.
19 Na chɔɔ hunde kan erroa Tumu na yɔk zuga marrɛa Tumu kumulɔng agga allinɛnɛa :Moldoyɔye,
kàggayɔ.
20 Na Eriya Tumu hunde dha bere ko ba na aiy bho gaanaa kàggayɛa bhɛa Tumu anɛa Komoruya ku dhereye,
kàggayɔ.
Na mɛa kɛ̀l ko ngakomoruyta ku dhereye ke ngaya kɛ̀lɛ ko Eriya Nɛnɛ Yesus Kirisos kari ke dhɔnɛye.
Nɔng Yesus a Tumu Komoruya ku dhere ko basseya iho dhul.
21 Na mɛa ngaerroya ganyde,
bhɛa ngaahaya ibhbhɛ :zugu ke barariye,
rɛhiya gu bhɛgɛtɔ!