3
1 Ga gɔnyigi ngaya ibhbhagɛiy :Babaa Na hini na yellɛiy goore na ojjiy na kèliyey erroa Tumuye!
Nɔng ngadamita bere ojjɛiy :nɛaye,
agge kan erroa gɛnyɛ dhere!
Na nɔng bhee imaggɛiyɛ :zuga marrɛa Tumuye,
a ngaya imagɛ Baba Na Tumuye.
2 Ngazukta gany kibhbhagung hiniye,
agge mɛa kan erroa Tumu.
Na nɔng ale kingi hunde kan zukte ku ɛnɛngge,
mɛa ngani kìmaktɔ,
ke ngaya Tumu ngani kudhugunogɛiytoye.
Na nɔng hunde ale Kirisos wokkono baye,
ngakoleonu ale kòr na kàggayɔ hunde nɔng a hirre ku ɛnɛng na ko agge kɛ̀hɛt ko nɔngge.
3 Na gee ibhɛsɛnɛ ngalɔkta hinisiye kumulɔng onynyonɛ ridhingɛa gɛ na a zuga hɔla ridhing ningginɛna ngadamita Kirisosiye.
4 Nɔng hirre me lɔga gɛrsaye,
ɛddɛ Damiya Tumu.
Yɔk lɔga gɛrsa agga imaginɛna ko Damiya Tumu.
5 Nɔng Kirisos huna bere kunno ba ngaya,
hunde bere kun na kiggarisi lɔga ga gɛrsaye,
igge gaoyɔ.
Nɔng bhɛa nɛnɛ chɔɔ lɔkte gɛrsi ku ridhing ninggɛ dhul.
6 Na hirre ɛl ko Kirisos kari ke dhɔnɛye,
lɔga gɛrsa dirr ngamesso.
Na nɔng inde ngani me lɔga gɛrsa dirrte,
ngangaye dha bere Kirisos ngani karro oo dha ngani imagtɔ.
7 Erroa ganyuye,
ngakitabhtung :genne go!
Nɔng hirre me lɔga ridhing ngaannaoye,
a hira hɔla ridhing ningginɛna ngadamita Kirisosiye.
8 Na nɔng inde me lɔga gɛrsaye a eriya Moldoyny ke ngaya Moldoy bere messonɛ lɔga gɛrsa kingi bɛrgua bere ngani kèghendonɛa baye.
Na bhee bere kunɛ Eriya Tumu ba ngayaye,
a ngaya se kusurranɛ lɔga messo :Moldoyɔye.
9 Nɔng hira yɛbhbha Tumu na tewa eriya nɛnɛ,
lɔga gɛrsa dirr ngamesso ke ngaya lɔmɛ hinisa Tumuye.
a Na bhee mesɛ lɔga gɛrsa dirr ninggɛ,
ke ngaya anɛ eriya Tumuye.
10 Yɔk zukte lɔga challa ngamessɛo na zuga yɛbhbhɛa kammannaa Yesusi kari hinisi ngaibhɛsɛnɛoye kumulɔng,
erroa Tumu ngayo.
Nganda a bhee kàggaɛ erroa Tumu ko ga Moldoyny bhɛa ɛlɛa bhiy bhiyye.
Lɔga Maya Kìbhinɛnɛa Hinisi Kɛngɔ
11 Yɔk lɔga bere shikkano :iggeu bɛrgua bere yɛbhbhanɛo Yesus sabbɔ,
sennɛ ɛnɛnggeo,
“Agge maya kìbhinɛ hinisi kɛngɔ.”
12 Nɔng Kayel bere anna eriya Moldoyny na koo nisso gɔynɛ.
Na igge maya damiya bere nɛnɛ ngamessoo.
Na ngangaye gɔynɛ bere nisɛ lɔk giyong?
Bere nisso ke ngaya nɔng anɛ hira messo kuhuyamo na gɔynɛ Abel anɛ hira messo lɔga challa ridhing ningginɛnaye.
13 Ngazukta kɛ̀yɛbh Yesuse,
hunde tamartung :zuga marrɛa Tumuye,
igge ngadɛɛsso.
14 Nɔng agge kan zuga kìbhɛsɛna zuga kɛ̀yɛbhbha Yesus kari hinisi.
Na ngaya kèmesɛ ngangaye,
dhugunnogiy bhɛa kèteyɛa zuga bere kàjarta rɛsɛ na kàyta gɔra basseya iho dhul.
Na nɔng inde hira yɛbhbha Yesus hini ngaibhɛsɛnnoye,
ngani a hira ɛlla ko rɛsɛ kari ke dhɔnɛ.
15 Nɔng hirre mar hira yɛbhbha Yesus konaye,
a hira kɔdhdha hiri.
Na chɔɔ igge gaoyɔ hunde hira kɔdhdha hiri anna basseya iho dhul ngani kɔtɔlɔmaoye.b
16 Nɔng Yesus Kirisos annaa bere ibhaa rɛa nɛnɛ na errɛiyɔ agge.
Na ngaya mesɛ :nɛa ngangaye,
dhugunnogiy bhɛa kìbhɛsɛna zugo hinisi.
Na ko agge maya kɛ̀rɛsɛ zuga kɛ̀yɛbhbha Yesus kari.
17 Mɛa hir kona hunde kɔtɔlɔ ahaa kachchana bay ngaya na kar hira yɛbhbhɛa Yesus kari kona hunde chɔllanɛye na ngawonyɛsɛni na ɛana,
anda bhee senɛ,
“Anye kani hira kibhɛsɛni Tumu hini” ihe?
Ninggɛ.
18 Na mɛa ngaerroya ganyde,
hunde kìbhinɛ hinisiye,
ga kìbhtɛ dhere na lɔkte kèmese kùrruktɛsɛyɔ.
Na tugichinne sɔng,
ga ngakàllii.
19 Hunde kème ngangaye,
kàggayɔ hunde kàn zuga kèmesso lɔga ku dhere na kɛ̀lla ko Tumu na hinisiya ga ɛllanɛa bayte.
20 Na chɔɔ ko hunde hinisiya ga kɛsɛdhɛ lɔgɔ na kùjjukta rɛhi,
agge kàggayɔ hunde bhɛa hinisiya ga bu :Tumuye.
Na chɔɔ nɔng anna gaa lɔgɔ kumulɔng.
21 Na mɛa ngazukta gany kibhbhagung hiniye,
hunde hinisiya ga lɔgɔ ngani ngaɛsɛdhdhɛo na rɛhi ngani ngakùjjukkanaoye,
agge kàllinɛ ko Tumu liya ninggɛn hung.
22 Na chɔɔ lɔkte kìghin nɔngge kumulɔng ajjiy ke ngaya kɛ̀bhɛgɛ lɔga bere ajjiy :nɛa na kèmesɛ lɔga hinnono :nɛa na hinisa nɛnɛ anɛ hɔliye.
23 Na agge maya kɛ̀yɛbh Eriya Tumu Yesus Kirisosc na kìbhinɛ hinisi kɛngɔ damiya bere madhdhagɛiy :nɛa.
Ngagiya a lɔkte bere ajjiy :Tumuye.
24 Yɔk zukte bhɛkkɛ lɔga ajjiy :nɛaye,
ɛl ko nɔng kari ke dhɔnɛ.
Na inde dhugunnogiy agge bhɛa kɛ̀lɛa ko nɔng kari ke dhɔnɛye,
a Kuloya Nɛnɛ bere ajjiy.