Lɔga Ganggoa Kàggayɛa Gulsachina Bibiyo Allinɛnɛa Zuga Yɛbhbhɛa Yesus Ko Ga Kaynɛna
3
1 Yɔk ngalɔkta sennɛ, “Hirre hin bhɛa senno keteɛ gulsaa bo allinɛnɛa zuga yɛbhbhɛa Yesuse, a hirre chirkan zinggoa challa dhogoyte,” a dhere. 2 Nɔng gulsaa bo allinɛnɛa zuga yɛbhbhɛa Yesus, maya anna messo lɔga ku dhere gayɛa :zugu kumulɔng, na lɔmma tɛri dhɔnɛ sɔng,a na ojjɛsɛna rɛ hirimo, na bhɛkka rɛa nɛnɛ shɛɛ, na lɔmma diram bhɛa zugony, na lammana kɔmɔn, na gaa bhɛa madhɛa zugo lɔgɔ, 3 na ngadhuteoyo na ba gɛrrɛng gɛrrɛng ngamessoo na anna hira hini lalna, na ɛkkɛnyanyogi ngaannao, na birinya hini ngaibhɛsɛnao. 4 Na nɔng maya a hira lɔmma zuga gɛnyɛ shɛɛ, na madhdha erroa gɛnyɛ na igomɛsɛnɛa nɔng na ɛngɛrsɛa goore. 5 Mɛa hiri hunde kitimak bhɛa lɔmɛa zuga gɛnyɛ, anda ale zuga yɛbhbhɛa Yesus shɛɛ lɔ ɛnɛng? 6 Na hira ngani yɛbhbhana Tumu ngaajjɛo kɔtɔlɔ zuga yɛbhbhɛa Yesus. Hunde tɔlɔmu zugoye, kesea ale dhunggur na kùjjukkana damiya bere Moldoyny. 7 Na sɛgɛn hira lɔmma zuga yɛbhbhɛa Yesus, nɔng maya anna gayɛa chɔɔ :zuga Yesus ngayɛbhbhɛayo hunde a hira messo lɔga challaye. Na aynde ale lɔga gɛnyɛ zugo ke gɛrsi ngayogɛo, na chɔɔ lɔga kɔngɛa :Moldoyɔ ngadokkonooye.8 Na ko yɔk zuga kachchɛa zuga yɛbhbhɛa Yesus maya a zuga ɛngɛrsɛa :zugu, na mɛzziyɛa lɔga ku dib, na chuttaya woynuny goore ngamattɛayo. Na lɔga tabhɛa zugo na jɔanɛa birinya hɔlɔng ngamessɛayo. 9 Na yɔk hunde ngani bhɛkkɛ kamannaa bere dhugunnogiy :Tumu ku dhereye, maya bhɛkkɛ ke ga bo hinisi ɛlla hurr huna zuga ahiya dununy ngani kussayo. 10 Na yɔk hunde ngani kɛ̀bɛrtao na zuga kachchɛa zuga yɛbhbhɛa Yesus keteyoye, ga sabbɔ lɔga gɛ ayɛ kamaraga :zugu shɛɛ. Na hunde lɔkte gɛrsi lɔmɛsɛnɛ :zugu ngani ngakɔ̀jɔsɛnnoye, any kete zuga kachchɛa zuga yɛbhbhɛa Yesus.
11 Na ko yɔk tɛrro,b maya agga ɛngɛrsɛa :zugu na zugo ngakedhdhɛayo na ojjɛsɛnɛa rɛhi hirimo, na lɔga messɛa :yɔkku kumulɔng yɛbhbhɛa :zugu.
12 Na zuga kachchɛa zuga yɛbhbhɛa Yesus, yɔk maya lɔmmɛ tɛrro dhɔnɛ dhɔnɛ. Na maya a zuga lɔmmɛa erroa gɛ ko zuga gɛ shɛɛ. 13 Na gee kachchɛ zuga yɛbhbhɛa Yesus shɛɛye, yɔk ale ajjɛ :zugu diram na liya ngaammɛo dhul na dhugunɛsɛnɛ zugo lɔga gɛ yɛbhɛa Kirisos Yesus na anɛa dhandali.
14 Nɔng anye keni kòk ngonu nunde ke tiri na kɔ̀gɔnyinydɔ. Na chɔɔ ko hunde kete nganga, anye kɔɔbhbhaginy ngalɔkta dadabɔ shɛɛ, 15 na hunde kesea ngani kihon gɔrra bhe chinyiye, tag lɔga maya messɛa :zuga yɛbhbhɛa Yesus hunde ɛl ko lalugɛye. Yɔk zuga yɛbhbhɛa Yesus, agga Tumu Komoruya iho basseyɔ. Na yɔk ibhbhɛ lɔga kàmadhinɛnɛa ku dhere shɛɛ, huna kɛna immɛa dori na dori chillo na iho gig. 16 Yɔk lɔga bere dhugunnogiy :Tumu ajjiyɛa bhɛa kɔ̀ɔbhɛa lɔga gɛnyɛ dhere, agga kìwacheo goore dhogoy na chɔɔ ko hinisi ngakàraginɛnɛayo. Na ngalɔktonu a ɛnɛnggeo,
Nɔng bere dhɔlagiyɔ rɛ ke hiri,c
na dhugunoa :Kuloya Tumu, bhɛa anɛa Eriya Tumu dhere,
na arta :zuga ekko :Tumu,
na lɔga gɛnyɛ kàmadhtɛsɛa bhorinya kumulɔng,
na zuga bhakkɛa ba yɛbhta nɔng,
na kàytɛa tumɔ na bo lɔmma diram.