Lɔga Kɛngɛa ꞉Bhaulosi Rɛ Bhɛa Bhilisi
24
1 Na hunaa tɛlda ungo haynaye,
gɔldanga bo doraa Tumu barara kèe Hananiya dhi ko zuga Ayhudhi nyagasa gen ko hira gaa lɔga kìchibɛa zugo kèe Tertelus.
Na ago Kesariyagiye bhɛa Bhilisi,
Gulsaa Yudha Bo,
na childɛ Bhaulos.
2 Na Bhaulos hunaa keleono na kunnoye,
nɔng Tertelus kɔbhɛsɛ Bhilis lɔga chilɛa ꞉zugu na sɛɛsɛ,
“Gulsaa bo lɔmi diram Bhilise,
ihineya bɔɔ allinɛnɛiy zuga gayo bere kabhakto shɛɛ kɛr ko mɛa toye.
Na chɔɔ lɔga bere dhandala bhɛa zugony bɔɔ bhɔdhu na tewa challi.
3 Na ngaya allinɛnɛiy shɛɛye,
hande kɛlɛoye kumulɔng tii tii agge kɔdhɔnginy hinisiya bo hɔla.
4 Na mɛa lɔ lɔkte chichi godhe kenno kòyoktoginydɔ.
Na ga chirbhisiey na chirariy shɛɛ hung.
Dirr ngakamarageenynyo,
kɔtɔllɔhaginydɔ.
5 “Agge bhɛa nayo Ayhudhi ngahirra a hudhagi.
Nɔng anna bɔɔ kɔnkɔna zuga gayo oree oree ba kumulɔng na kobhori ba.
Na chɔɔ sɛgɛn a gulsaa kimsiya zuga kɔbhbhɛa hira Nazeriti kullɛna.
6 Na chɔɔ bortɔ senno keme damite kullɛ doraa nayo barara Tumu.
Na kibhbho na kènno kàtiyo kera nayo.
7 Na saraniy ꞉gulsaa bholisi bo kèe Lasiya gidhingɔ na dhiganna.
8 Na ajjɛa zuga chilɛa Bhaulos lɔgɔ na kohoya bhɛa nunu.
Na mɛa ngalɔkta kichilɛo ngahirraye hunde a dhereye marak ꞉inynyo na taktɔ.”
9 Na yɔk zuga Ayhudhi shiktɛ kumulɔng na se,
“Ngalɔkta yokkonoye kumulɔng a dhere.”
10 Na nɔng Gulsaa Yudha Bo uma Bhaulos siyɔ na ko nɔng koyogo lɔgɔ.
Na Bhaulos yagɛsɛ na sɛɛsɛ,
“Inye ani hira bere kedhdhani lɔga ngazukta oynyaa mɛra.
Na mɛa ngaya koyokkogɛiny lɔga kɛɛnganɛy lɔga kàmagaganyiye,
hini hɔllany goore.
11 Yɔk unga bɔɔ kɔgɔyɛi Yerusalemɔ na keterrisanɛi Tumu ngonu mɛa te tɔmmɔn ko ramman.
Na ngalɔkta bhɛa anɛa dhere,
ga chɔɔ ghin bhokonnɔ hung na taktɔ.
12 Ngalɔkta yokkɛ ꞉yɔkkuye,
a butomo.
Bhee kɛkɛnyanɛnɛo ko gen doraa Tumu barara na kɔɔnkɔnɛ zugo doraa kàmadhɛa zugo lɔga Tumu ko ɔr toye na se kèe kobhorɛ baye,
yɔk ngani kartanyo.
13 Na mɛa bhɛa senno kidhiganday zuga orronɛa lɔgɔ kawarre na koyoktoy lɔga chillɛanyɛa,
ninggɛ.
14 Nɔng lɔkte yokkɛ ꞉yɔkku ku dhereye a ngalɔkta keterrisanɛ Tumu Komoruya bere kokonginyaa gayo kinginye na kɔɔbhɛ lɔga Ganggua Yesusa Nazeriti marrɛa ꞉yɔkku na sennɛa a kullɛye.
Na nɔng anye kɛyɛbhi kera Muse ko lɔga bere kɔdhɛsɛnɛa ꞉zuga yogɛsɛnɛa zugo lɔga yokkono ꞉Tumu dadab kumulɔng.
15 Na ngadamita yɛbhɛ ꞉yɔkku na senɛ zuga ridhing ningginɛna ko ga lɔmmɛa ridhing ale bansanɛ rɛsɛyɔ kariye,
ko anye kɛyɛbhiyɔ.
16 Na kali kali kɛmɛdhdhan goore na bhɛa zugony ko bhɛa Tumu lɔga gɛrsa ridhinguny hinisɔ ngakɔlɔmi na kàbhak ba shɛɛ.
17 “Na oynyaa bo mɛra bere kɔdhɔyɛi Yerusalem na kihɛi ba konnɔ hunaa tewa ushaye,
kɛchɛbɛu na kibhau ahaa keni kɛ̀ay zuga ganyu ku bhoyoga ko ga keni kùdulɛsɛ Tumu na kawagau Yerusalem.
18 Na yɔk ngazukta hunaa honynyo doraa Tumu bararaye,
artany ratagiye hunde kemesi kera Ayhudhi kònyonɛa ridhingge.
Na anye zugo ngani kɔ̀ɔnkɔno na chɔɔ gee kɛllo kari na kobhoreo ba ninggɛ.
19 Na yɔk zuga Ayhudhi honynyo Isiyagiye gen bere ɛlla ngonu.
Na ko yɔk hunde kɔlɔmɛsɛn lɔgɔye sɛɛ kabanda na koyokto ngaya ihɛ ꞉inynyoye.
20 Oo ngazukta nyaga ɛl ngayaye sɛɛ kudhugundoginy lɔkte bere marakkɛ ꞉zuga Ayhudhi kedhdhɛa lɔgɔ na kako kɛddɛiye.
21 Nɔng kesea bhee kìchillɛany anyeye,
kako a ngaya bɔɔ koyogɛsɛn zuga Ayhudhi kedhdhɛa lɔgɔ goore na kesenɛsɛn,
‘Bhee chillɛanyɛ ꞉zuguye a ngaya kɛyɛbhɛ lɔga ale bansanɛa ꞉zugu rɛsɛyɔye.’
Nɔng chɔɔ ahite kɛddɛi kona ninggɛ.”
22 Na Bhilis nɔng dha bere a hira gaa lɔga Ganggua Yesusi goore.
Na sɛɛsɛ zugo,
“Hunde ale gulsaa bholisuny bo kèe Lasiya kunde,
lɔga gu kegedhi ꞉anynyo.”
23 Na aynɛ gulsaa bholisi chinyo lɔgɔ na kɛbhbhɛk Bhaulos na sɛɛsɛ,
“Hunde zuga gɛnyɛ hony na se katagayate,
ngakanyɛ.
Na goore ngabhɛgi.”
24 Na bhorre Bhilis ko tɛriya nɛnɛ kènno Ngadirsila hoya na kishigi lɔga Bhaulosi.
Nɔng Ngadirsila dha a hoya zuga Ayhudhi.
Na yɔk ege hir kona na elɛɛsɛ Bhaulos.
Na yɔk koo kɔbhɛsɛ :Bhaulosi bhɛa kɛ̀yɛbhɛa Yesus Kirisos.
25 Na hunde ngani kɔbhɛsɛn bhɛa kònyonɛa ridhing na kanɛa hɔli bhɛa Tumu ko ga kɛbhɛgɛa rɛ shɛɛ ko kala ale atiɛiy ꞉Tumuye,
nɔng Bhilis tɛngɛru bho na sɛɛsɛ,
“Te usha!
Bana ogo!
Ale hunde kako keni kɔ̀bhagany ngalɔkta sɛgɛnde,
kegi hiri na elenydɔ.”
26 Nɔng dha bere eleono Bhaulos jaja na mɛzɛɛ ke ngaya hinɛ bhɛa senno kaynɛ ꞉Bhaulosi aha gena dariye.
27 Na Bhilis tɛu oynya ramman na bhɛa nɛnɛ sɛrɛu ꞉hirre kèe Bhorko Bhito.
Na Bhilis dhɔyu Bhaulos doraa chibinuny na zuga Ayhudhi hinisi kete hɔli.