23
1 Na Bhaulos gɔnyu gulsachinaa Ayhudhi kedhdhɛa lɔgɔ churr na sɛɛsɛ,
“Gochonginyaa ganyuye!
Anye ihineya bere kinginye ko mɛa toye bere katagachcha Tumu shɛɛ kɛr hinisa bo hɔla.”
2 Na nɔng gɔldanga bo doraa Tumu barara kènno Hananiya hunaa shikko ngangaye,
sɛɛsɛ zuga chillɛa bhɛa Bhaulosi jaa na kɔnyɔgɔ nɔng tugɔ na kidhiyɛyɔ.
3 Na nɔng Bhaulos sɛɛsɛ Hananiya,
“Ngahirra hɛtto ko dori jagara kìghirro shuldoyɔ shɛɛ na toye ihono duliye!
Inye seni ɛlɛhɛn lɔga ganyu na ken huna kera Muse.
Na ɛddɛi kera Muse na senɛsɛn zugo na karaktany anye kɛ ɔng?
Ko inye ale dhakkiny ꞉Tumu!”
4 Na yɔk zuga chillɛa bhɛa Bhaulosi jaa seyɛsɛ,
“Ngangaye,
dhɔmi gɔldanga bo doraa Tumu barara kɛ ɔng?”
5 Na nɔng sɛɛsɛ,
“Yee,
gochonginyaye!
Anye hunde a gɔldanga bo doraa Tumu bararaye,
kimagiyɔ.
Yɔk lɔga Tumu a ngagiya sennɛ,
‘Gulsaa zuga gunyu lɔga gɛrsa ngayogɛsɛniye chi.’”
6 Na nɔng gɔnyu gulsachinaa Ayhudhi kedhdhɛa lɔgɔ ɛlla ngonu na tagu hunde dha gena a zuga kimsiya Ayhudhi kènno Sodoka na gen agga kɔbhbhɛa damiya Bhɛrɛsiye.
Na yogo lɔgɔ goore na seu,
“Gochonginyaye!
Anye kani hira kɔbhbha damiya Bhɛrɛsi huna bere kokonginyaa ganyu kinginye.
Na mɛa bhee chillɛanyɛ ꞉zuguye a ngaya kibhɛ lɔga ale bansanɛa ꞉zugu rɛsɛyɔ hinisɔ na kɛyɛbhɛye.”
7 Na hunaa yokkono ngalɔktaye,
zuga kedhdhɛa lɔgɔ ɛkɛnyandɛ kɛngɔ,
na kendiyaa gaminya ramman.
Na ga kɔbhbhɛa damiya Bhɛrɛsi tɛldi bhiy na ga Sodoka tɛldi bhiy.
8 Yɔk zuga Sodoka bhɛa ale bansanɛa ꞉zugu rɛsɛyɔ ngayɛbhbhɛo.
Na sennɛ kulya kumulɔng ko zuga ekkono ꞉Tumu ninggɛ.
Na yɔk zuga kɔbhbhɛa damiya Bhɛrɛsi ngalɔkta kumulɔng hunde a dhereye yɛbhbhɛyɔ.
9 Na jalbhana goore.
Na zuga kɔbhbhɛa damiya Bhɛrɛsi madhdhɛa zugo kera Muse gen yɔk banda na tɔrɔ Bhaulos na ɛkɛnyandɛ na se,
“Bhee kujukkanɛ ngahirra ninggɛ.
Kako hunde lɔgɔ bere yogɛsɛn ꞉kuloy konnɔ oo ꞉hira ekkono ꞉Tumuye,
agge kimagtɔ.”
10 Na yɔk ɛkɛnyandɛ gɛrrɛng gɛrrɛng na gulsaa bholisuny bo tɛngɛru bhɛa senno Bhaulos ngakasartiyɛy ꞉zugu.
Na sɛɛsɛ bholi,
“Ago ɛya Bhaulos ngonu ɛkɛnyanɛnɛ ꞉zuguye,
na mayiyto gidhingɔ na yaga bholisɔ.”
11 Na nɔng Bhaulos saniu ungo dhɔnɛ na naa senno keteyɛ ramman barɔ chilɛsɛ ꞉Komoruyɔ Tumu jaa na iriyu na sɛɛsɛ,
“Te dhandali!
Damiya bare yogɛsɛni zuga ɛlla Yerusalemɔ lɔga ganyu bere orroni kawarre,
ale ngani yogɛsɛn zuga ɛlla Romegiye nganga sɛgɛn.”
Lɔga Kènno Kɔ̀gɔndɛ Bhaulos
12 Na hunaa bho arsaye yɔk zuga Ayhudhi gena muktɛ na daga go na bhiigi lɔgɔ na se,
“Ko bhee kɔgɔdhdhɛ Bhaulos,
amissɛ ngakammo.
Ma ngakamatto.”
13 Na zukte dha bere dokkɛ go na bhiikkɛ ngalɔktaye,
a zukte ku 40 ko bhɛlɛga gena.
14 Na yɔk ago bhɛa gɔldangɛa bibiyo doraa Tumu barara ko zuga Ayhudhi nyagasa kedhdhɛa lɔgɔ na seyɛsɛ,
“Agge wa kibhiikto lɔgɔ na ko bhee kɔgɔdhdhɛo Bhaulos amissɛ ngakammo.
15 Na mɛa igge shiktɛ ko gulsachina Ayhudhi kedhdhɛa lɔgɔ na tɛhɛyɛ ko zuga marakko lɔga Bhaulosi shɛɛ.
Na ghindo bhɛa gulsaa bholisuny bo na kayaga bhɛa kègedhdhɛa lɔgɔ.
Agge wa kɛtɛldo kɔk na hunde chɔɔ ngaya ngani kadakkoye kɔ̀gɔndoyɔ.”
16 Na nɔng ngosoniya Bhaulosi shigu ngalɔkta dogɛ ꞉zugu goye na ogo bholisɔ na yogɛsɛ Bhaulos.
17 Na Bhaulos eliu gulsaa bholisi chinyo kona na sɛɛsɛ,
“Dhigan ngaerita bhɛa gulsaa nu bo.
Lɔ lɔkte se koyogɛsɛ nɔng.”
18 Na nɔng dhiganu eri bhɛa gulsaa bo na sɛɛsɛ,
“Anye wa eleonyɔ ꞉hira kìchibbo kèe Bhaulos na tɔllɔhaganyɔ na kìdhiganaginy ngaerita.
Se lɔ lɔkte se koyogoginydɔ.”
19 Na gulsaa bo ibhu eri siyɔ na dhiganu dheyyɔ bhiy na ghinu na sɛɛsɛ,
“Wa seni yogogony lɔk giyong?”
20 Na eri sɛɛsɛ,
“Zuga Ayhudhi gen wa dakta go na bhiikta lɔgɔ na kɛtɛhɛyɛ ko zuga marakkɛa lɔga Bhaulosi.
Na rogonɔ kighindeny inye na dhiganɛsɛ Bhaulos bhɛa kedhdhɛa lɔgɔ.
21 Yɔk zukte ku 40 ko bhɛlɛga gena wa dakta go na bhiikta lɔgɔ na seya,
‘Ko bhee kɔgɔdhdhɛ Bhaulos,
amissɛ ngakammo na ma ngakamatto.’
Na se kabakki ganggu hunde Bhaulos kunde.
Na mɛa reinyɛ inye na igomɛsɛ lɔkte ghinnenyɛye.
Na inye ngaigomɛsɛni.”
22 Na gulsaa bholisi bo sɛɛsɛ eri,
“Na ngalɔkta yokkogonyde ngayogɛsɛ hir kona ni wo!”
Na ittonu.
Lɔga Kùlugunyɛa Bhaulos Na Kɛ̀hɛɛa Kesariyagiye
23 Na koo eliu gulsachina gɛnyɛ gee ku ramman na sɛɛsɛ,
“Ibhta bholise ku 200 ko ga woyɛa harteyiye gee ku 70 ko ga bɛrrany gee ku 200 na jhaynɔ satinya sizziyɔ kago Kesariyagiye.
24 Na oytɛsɛ Bhaulos harteyiya woyɛa kɔk na kɔtɔyɛyɔ,
na kidhigana shɛɛ chɔɔ bhɛa Gulsaa Yudha Bo kènno Bhilis.”
25 Na koo tɔgɔdha dadabte se,
26 “Ngadadabta kɔgɔdhdhan ꞉anynyo,
Kilawdi Lasiya.
“Na kɔgɔdhdhaginy inye Gulsaa Yudha Bo Lɔmi Diram,
Bhilis.
“Na mɛa kissainydɔ,
ani challi?
27 “Nɔng ngahirra ajjo ngani kɔgɔdhɔ ꞉zuga Ayhudhi kɛr.
Na anye katagga hunde a hira Romeye na kayto ko bholisa ganyu kari na kibaysiwa.
28 Na bɔɔ kidhigani chɔɔ bhɛa kedhdhɛa ꞉gulsachina Ayhudhi lɔgɔ na kàtagɛ lɔkte kìchilɛye.
29 Na katagga hunde dha chilɛ ke ngaya ɛkɛnyanɛnɛ lɔga kera nɛye.
Na chɔɔ lɔkte dhandali kèe kɔgɔndɛ oo kɛchɛbtɛ ninggɛ.
30 Na wa kishikka hunde dhaa se dogɛ ꞉zugu go na kindite.
Na aynde kittonnogung igge ke tiriye.
Na lɔkte kichilɛ nɔngge wa koyogɛsɛu zuga chilɛa na koo kago bhɛa nu na ɛlɛhɛnɛ ꞉iggeu.”
31 Na yɔk bholi ibhta Bhaulos damiyaa kajjɛa lɔgɔ na barɔ dhigana surr ɔra kènno Antibanti.
32 Na bhorre bholi gen waga ɔrɔ na Bhaulos dhigana ꞉bholisa woyɛa harteyiye sɔng.
33 Na yɔk hunaa hɛyɛa na dokkɛa Kesariyaye,
ayɛ Gulsaa Yudha Bo dadab na Bhaulos dhɔyɛ doraa nɛnɛ.
34 Na nɔng hunaa toyiwa dadab na tewa ushaye,
ghinu Bhaulos na sɛɛsɛ,
“Ani hira bhagi ba inong?”
Na tagu hunde a hira bhakka Kilkiyaye.
35 Na sɛɛsɛ,
“Ale koo lɔga gunyu kishigi hunde zuga chillɛinyɛa honyde.”
Na sɛɛsɛ bholi,
“Aytɛ na bhɛgɛ doraa bere kɔdhdha :Herediosi.”