Lɔga Kìttonɛa Barnabas Ko Saol
13
1 Dha bere bhɛa zuga yɛbhbhɛa Yesus ɛlla Ansokiyagiye lɔ zukte yogɛsɛnɛ zugo lɔga yokkono ꞉Tumu ko ga madhinɛna.
Na yɔk a Barnabas ko Simona kèe Kɔrrɔ ko Lukiyosa bere bhakka Kerena ko Saol ko lukuriya komoru Herediosi kèe Minan.
2 Na kali kona yɔk hunaa ngani eterrisannɛa Komoru na chibbɛa rɛhi hozzoye,
yogɛsɛ ꞉Kuloya Tumu lɔgɔ na sɛɛsɛ,
“Ibhtaganyu Barnabas ko Saol na kemesigi zinggoa bɔɔ kelisɛni na kaynɛ.”
3 Na hunaa chɛbta rɛhi hozzo na alliyɛa ko Tumu na tewa ushaye,
tattɛ yɔk sɛnɔ na tuhu na ittonoyɛ.
Lɔga Ɛlɛa ꞉Barnabasi Ko Saoli Kobhorosɔ
4 Na Barnabas ko Saol yɔk egu ꞉Kuloya Tumu na ago chɔɔ Selekiya.
Na Selekiyagiye ngonu banda na ago gonggulɔ chɔɔ Kobhoros.
5 Na hunaa dokkɛa ɔra kèe Salamiseye,
ago doriyoa kàmadhɛa zugo lɔga Tumu na madhtɛsɛ zugo lɔga Tumu.
Nɔng Yohanisa kèe Markos dha bere ɛl ko yɔk kari na ɛanayɔ.
6 Na hunaa dhoyɛa Kobhoros ori toye na dokkɛa ɔra iho dheyyɔ kèe Babuye,
koo itinynyandɛ ko hirre Ayhudhi ku deni kèe Baryesus.
Nɔng mɛzi butomo na se,
“Kani hira koyogɛsɛni zugo lɔga yokkono ꞉Tumu.”
Na nɔng dha yogɛsɛn ga gɛnyɛ ku butomo hung.
7 Ko nɔng dha bere a hira kachcha gulsaa ngabaonu gaa bho goore kènno Sɛrigos Bhaulos.
Na nɔng ngagulsaonu tɛhɛnu bhɛa senno kishigɛ lɔga Tumu na eliu Barnabas ko Saol.
8 Nɔng dha bere deniya kènno Baryesus tuga Giriki sara gɛnyɛ keli Elmas.
Na Elmas a bhɛa kènɛa “Deni.”
Na nɔng taganyɛ Barnabas ko Saol lɔgɔ na gulsa lɔga Tumu ngayɛbhi.
9 Na ko nɔng Saol sara gɛnyɛ gena keli Bhaulos.
Na nɔng Bhaulos aynɛ ꞉Kuloya Tumu gidhing na gɔnyu deni tull
10 na sɛɛsɛ,
“Inye ani eriya Moldoyny na ani mirogiya lɔga ku dhere kumulɔng.
Na lɔmi kuhuyamo na tabi zugo goore.
Na ngalɔkta liyɛ ganggua Komoruny iho dibte ngadhɔyiyo kɛ ɔng?
11 Na mɛa atieny ꞉Komoruyɔ.
Na kawarɛ aniny chagi na bho ngaoriyo ko bhee ale sennanɛ ꞉nɛa.”
Na kawarɛ dhittɛ ke tiri na ba ngani ngaorro.
Na lamiu hirre dhigan siyɔ.
12 Na nɔng gulsa hunaa orro ngalɔktaye,
yɛbhu ke ngaya iwachiɛ madhaa Komorunyde.
Lɔga Ɛlɛa ꞉Barnabasi Ko Saoli Bisidhagiye
13 Na Bhaulos ko bɛkanyaa gɛnyɛ banda Babugiye gonggulɔ na ago chɔɔ ɔra iho Bhimbiliyagiye kèe Bhɛrga.
Na nɔng Yohanisa kèe Markos kendɛ ko yɔk na wagu Yerusalemɔ.
14 Na yɔk banda Bhɛrgagiye na ago chɔɔ ɔra kèe Ansokiyaa iho Bisidhagiye.
Na koo Kala Ayawsuny ago doraa kàmadhɛa zugo lɔga Tumu na tɛlda bay.
15 Na hunaa zugo toyiya kera bere kɔdhdhana ꞉Muse ko lɔga zuga bere yogɛsɛnɛa zugo lɔga yokkono ꞉Tumu bere kɔdhɛsɛnɛa dadabinya na tewa ushaye,
gulsachina ngadoronu madhinɛnɛye ghini Bhaulos ko Barnabas na seyɛsɛ,
“Gochonginyaye,
hunde kesea lɔmmo lɔkte senno madhtɛsɛ zugo na iriytɛye,
hoya na madhtɛsɛ.”
16 Na nɔng Bhaulos bana na lamu zugo siyɔ na sɛɛsɛ,
“Ngazukta Isirayeli ko ngazukta bhorre ana ɛngɛrso Tumuye,
ga chirartanyuyɔ!
17 Komoruya zuga Isirayeli Tumu bere bɛrrana kokonginyaa ga.
Na bɛrgua bere ɛlɛa Gibsigiye bhɛldɛ na te zuga bo mɛra.
Na koo obhoniseo ngabaonu ɔnneya nɛnɛ bo.
18 Na chɔɔ huna messɛa gɛrrɛng korugiye annaa nyimmo lɔga gɛ oynya zugo ramman.
19 Na koo dhiyu bhorinyaa Kanani gee ku issabbay na ba aynɛ zuga gɛnyɛ na sɛrɛ ꞉yɔkku.
20 Na oynyaa bhugnyɛsɛnɛa ngalɔkta a oynya 450.
“Na koo Tumu bɛra zuga ku gulsachina allinɛnɛa zuga Isirayeli na aynɛ na kalliyɛy ba.
Na ngalɔkta ago na daga bɛrgua allinɛnɛa ꞉hira yogɛsɛna zugo lɔga yokkono ꞉Tumu kènno Samuel ba.
21 Na kali kona zuga Isirayeli koo ogolo Tumu na kaynɛ komoru.
Na Tumu ibha liya Kisi ku gettoa Biniyami kèleo Saol na aynɛ zugo.
Na nɔng alliyɛy ba oynya zugo ramman.
22 Na hunaa Tumu ujugaa Saol komorumo na tewa ushaye,
bɛra Dawiy na aynɛ komorumo na kete komoruya nɛ.
Nɔng Tumu huna bere yokkono lɔga Dawiy,
annaa senno,
‘Wa kɔjɔyau eriya Isey kèleo Dawiy kibhinɛno hinisi na messo lɔga kihini ꞉anynyo kumulɔng.’
23 “Na Tumu ibha Yesus bhɛa ashaa Dawiy na kete hira ibayseo zugo na aynɛ zuga Isirayeli damiya bere bhiigɛsɛna lɔgɔ sabbɔ.
24 Na Yesus huna ngani kugoayo,
nɔng Yohanis annaa madhɛsɛna zuga Isirayeli kumulɔng bhɛa ujugɛa lɔga gɛ gɛrsa na churnɛnɛa.
25 Na kolea bere dheshshanɛa lɔga gɛnyɛ annaa senɛsɛna zugo,
‘Ngangaye,
igge senno kani nɛng?
Anye hira ibayseo zugo ngakaniyo.
Na nɔng hirre chɔɔ anye chahaa gɛnyɛ ngakughunushannoye,
ale kɔbhbhananydɔ.’
26 “Igge ashaa Awurahami ko ngabhorra ana ɛngɛrso Tumuye,
ngakamannaya basseynyde anna bere kàjjiy agge na kàbayɛyɔ.
27 Na zuga bhakkɛa Yerusalem ko gulsachina gɛ timaga Yesus hunde a hira ibayseiyye.
Na ujukta na atiyo.
Na huna ujukkanɛa,
bhugnyɛsɛ lɔga taa kòtoyeo Kala Ayawsuny bere yokkonɛa ꞉zuga yogɛsɛnɛa zugo lɔga yokkono ꞉Tumu.
28 Na yɔk ogolo Bhilatos na kɔgɔdhɔ Yesus hunde chɔɔ lɔga ɛddɛana kènno kɔ̀gɔndɛ nɔng ninggɛye.
29 Na lɔga gɛnyɛ bere kɔ̀gɔdhɛsɛna dadabinya kumulɔng hunaa bhugnyɛsɛaye,
ɔkta kɛya kìlagɛa na ojjigiyɛ.
30 Na koo nɔng ibaniseo ꞉Tumu rɛsɛyɔ.
31 Na ungge mɛri argi ꞉zuga bere dhɛanɛa ko nɔng Gelilagiye na hɛa chɔɔ Yerusalem kari.
Na mɛa yɔk bhɛa zuga Isirayeli a zuga bere orrɛa nɔng kawarre.
32-33 “Na yɔk lɔga bere bhiigɛsɛna ꞉Tumu kokonginyaa ga mɛa bhunyogiy agge ashaa gɛ,
ke ngaya dhɔngnganɛ Yesus rɛsɛyɔye.
Na kamannaye chal kamadhdhagung ꞉aggeuye a nganda.
Yɔk ngalɔkta agga bere kɔ̀gɔdhɛsɛna Dadaba Yelloa Dawiy bhɛa kòtoyeonɛa rammanɔ na sennɛa,
“ ‘Inye ani eriya nanu.
Ngakalda wa ketewa chogonu.’
34 “Na ngaya dhɔngnganɛ ꞉Tumu rɛsɛyɔ ke ngakumujuyɛ dhulde a lɔga bere kɔ̀gɔdhɛsɛna dadab na sennɛa,
“ ‘Ale kajjung lɔga kɛnginyana barara na tuhinɛna bere kibhiigɛsɛni Dawiy.’
35 “Na ngalɔkta bhɛa dadaba Yellony bhokonnɔ sennɛ,
“ ‘Hira Nunu Kullɛna Ridhing Ningginɛna mujusey ngaoddɛsɛnno.’
36 “Nɔng ngalɔkta rɛa Dawiy ngaɛlɛhɛnɛo.
Nɔng bɛrgua bere nɛnɛ kayɛa Tumu hunaa tewa ushaye,
anna rɛsa na kòjjo ko kokonginyaa gɛnyɛ na mujusoyɔ.
37 Na nɔng nganda dhɔngngana ꞉Tumu rɛsɛyɔye,
ngani kumujuyo.
38 “Gochonginyaye,
bhɛa kùjugɛa lɔga gɛrsa hunde kɔjɔana gɔra Yesusiye,
ngadamita wa kamadhagɛungge tagatɔ.
39 Yɔk zukte yɛbhbhɛ nɔngge kumulɔng bhonsɛsɛnɛ bhɛa hɔla.
Nɔng kera bere madhɛungu ꞉Muse bhɛa ujugɛa lɔga gu gɛrsa na garsɛa dhul ninggɛ.
Yɔk ngalɔkta Yesusiye ga Muse jorronɛyɔ.
40 Na igge tɛldi kɔk.
Ngadakta lɔga bere yokkonɛa ꞉zuga yogɛsɛnɛa zugo lɔga yokkono ꞉Tumu na sennɛa,
41 “ ‘Ngazukta bhasso lɔgɔye,
ga shigitɔ na iwachi na garayɛ!
Anye ale ngabɛrguya nuye kemesi lɔga bu dhandala
hunde chɔɔ koyogogung ꞉hir konnɔ,
ngayɛbhbhoo.’”
42 Na hunaa Bhaulos ko Barnabas bhonsanɛa doraa kàmadhɛa zugo lɔga Tumuye,
tɔllɔsɛsɛ ꞉zugu na seyɛsɛ,
“Ngalɔkta ale Kala Ayawsuny tɔrtɛiy sɛgɛn.”
43 Na zugo hunaa bhassaninyana doraa kàmadhɛa zugo lɔga Tumuye,
zuga Ayhudhi ga mɛra ko bhorinya gen ga yɛbhbhɛa kera Muse goore kɔbhɔ Bhaulos ko Barnabas.
Na yɔk madha na kiriytɛ na kabhaga chaldina Tumu tii.
44 Na hunaa tewa Kala Ayawsuny sɛgɛnde,
zuga bo mɛra muktiyaa ɔr toye na kishigi lɔga Tumu.
45 Na hunaa zuga Ayhudhi orrɛa zugo mɛrtinde,
hinisi ngɔ na tamara lɔga yokkono ꞉Bhaulosi na dhɔmɔyɛ.
46 Na Barnabas ko Bhaulos bho ngani ngaɛngɛrsɛo na seyɛsɛ,
“Lɔga Tumu sabbɔ maya koyokkogung igge zuga Ayhudhi.
Na hunde wa tamarto ꞉eygo bhɛa jɔanɛo basseya iho dhulde,
agge kɔbhɔdhinɛno na koyogɛsɛno bhorinya gen.
47 Nɔng bhee koyokkogɛung ngalɔktaye anna bere Komoru ajjiy lɔgɔ na sennagiy,
“ ‘Kekkoginy bhorinyaa anaa na te hɔldina terinyi bhɛa kɔrra.
Na dagɛ surr ba uturey
na yogɛsɛ zugo lɔga ganyu kumulɔng na kabayɛyɔ.’”
48 Na zuga bhora anaa hunaa shikkɛa ngalɔktaye,
hinisi te hɔli na ayɛ Komoru diram ke ngaya lɔga gɛnyɛ anɛ ga bo challaye.
Na zuga bere bɛrrana ꞉Tumu na ojjo kɔk na senno kɔjɔya basseya ku dhul,
yɔk yɛbhɛ kumulɔng.
49 Na ngabaonu kamannaa Komoruny tɛhɛtɛy ko ba kumulɔng.
50 Na yɔk gulsachina Ayhudhi kɔnkɔnɔ tɛrroa ngaɔrronu lɔmmɛa aha yɛbhbhɛa damiya Ayhudhi ko gulsachina ngaɔrronu na katamara Bhaulos ko Barnabas,
na kɔlda.
51 Na yɔk hunaa kɔ̀gɔldaaye,
tibarta teriya ngaɔrronu jagarrea na ago Ikoniyomɔ.
52 Na yɔk zuga Ansokiya yɛbhbhanɛa kamannaa challa ɔgɛsɛ ꞉Kuloya Tumu na aynɛ gidhing na hinisi te hɔli.