Lɔga Kòbhonisionɛa Betiros Doraa Chibinuny
12
1 Na ngabɛrguonu a bɛrgua bere komoruya kèe Heredios tiranyɛa zuga yɛbhbhɛa Yesus gena na kɔrranɛa.
2 Na koo tɔgɔdhu gochonga Yohanisi kènno Yaykob mashagiye.
3 Na yɔk zuga Ayhudhi dɛlɛyɛ.
Na hunaa Heredios orro ngalɔkta dɛlɛ ꞉zuguye,
unga Gibiriya Ammɛa ꞉Zugu Lotay ibhu Betiros sɛgɛn.
4 Na ɔgɛ doraa chibinuny na aynɛ bholi lɔgɔ na kɛbhɛgɛ shɛɛ.
Na bholise bhɛginɛye kegendiyaa gaminya wush.
Na zuga bhɛginɛna gambe dhɔnɛ kete wush.
Na hunde Gibiriya Ammɛa Lotay te ushaye,
se kegen lɔga Betirosi bhɛa zugony na kɔgɔndɔ.
5 Na Betiros kɛ̀bhɛgɛ doraa chibinuny ngonu.
Na yɔk zuga yɛbhbhɛa Yesus dha bere ogolɛsɛnɛ Tumu goore.
6 Na hunaa Heredios ɛsɛdhdha lɔga senno bhorroyɔ kidhiganayɛy Betiros na kegedhɛ lɔga gɛnyɛye,
dha bere barɔ Betiros kìchib gɔrgɔriyaye ku ramman na ojjɛsɛnɛ bholise ku ramman kɛrghɛn na ungusɔ.
Na zuga bhɛginɛna gena bhɛkkɛ tutuga doraa chibinuny.
7 Na hira ekkono ꞉Komoruyɔ Tumu dhula dari.
Na abakkanu doraa chibinuny toye na te hɔli.
Na kuru Betiros na ibanisiu na sɛɛsɛ,
“Ga bana ke tiri!”
Na hunaa bansanaye,
gɔrgɔriya kìchibɛa sɛnɔ ngɔya.
8 Na sɛɛsɛ ꞉hiraa kèkkono,
“Bana chɛbbɛ!
Na bhuruyɛsɛ jagarɛ chaha!”
Na nɔng chɛbbɛ.
Na sɛɛsɛ ꞉hiraa kèkkono sɛgɛn,
“Maluk ruma nunu na kɔbhaanydɔ.”
9 Na Betiros bhona na kɔbhu.
Na yɔk ngalɔkta wa or ꞉nɛa me :hiraa kèkkonoye,
dha bere nɔng se dhere ngayo.
Nɔng se kako a lɔga orro kunaɔ.
10 Na yɔk ago na dha zuga bhɛkkɛa doraa chibinuny toye ko ga bhɛkkɛa tutuga bhone bhɔ.
Na hunaa dokkɛa warana gheru ku tomogi kɛ̀hɛɛa ɔr toyeye,
waran oyɛ bhichang.
Na bhono na hɔytɛsɛ ganggu na ago.
Na hunaa ngani hɛaye,
hira kèkkono dhulu dari.
11 Na Betiros tagu lɔgɔ na tungɛsɛ hinisɔ na seu,
“Komoru hunde dhaa ego hiri tumɔ na ibayseony bhɛa Herediosi ko bhɛa zuga Ayhudhi ɛsɛdhdhɛanyɛa anye lɔga gɛrsa kumulɔngge,
wa katagga dhere.”
12 Na hunaa tagga ngalɔkta shɛɛye,
bana na ogu doraa Mariyami.
Nɔng Mariyam a mamaa Yohanisa kèe Markos.
Na zuga bo mɛra dha bere allinɛ ko Tumu ngonu.
13 Na nɔng ko na chilu waranɔ bhɔ na elɛɛ.
Na sedhdheyte mesinɛ dorigiye ngonu kèe Ngarodaye ogu na kichirar hirre elinɛye.
14 Na hunaa tagga Betiros tugɔye,
dɛlu goore.
Na waran ngani ngaowonoo na wagu dorigiye ke tiri.
Na yogɛsɛ zugo na sɛɛsɛ,
“Betiros aynda chil waranɔye!”
15 Na yɔk ngani ngayɛbhbhɛo na se,
“Wa useny ꞉lolu?”
Na nɔng adhɛsɛ dirr na sɛɛsɛ,
“A nɔng dhere chi so!”
Na yɔk yaktɛsɛ na seyɛsɛ,
“A hira ekkono ꞉Tumu bhɛkka nɔng ka so.”
16 Na nɔng elɛɛ dirr.
Na hunaa zugo owonɛa waran na gunynyɛaye,
iwachiyɛ.
17 Na nɔng lamu zugo siyɔ na kidhitɛ rib.
Na kɔbhɛsɛ lɔgaa ɔkkanɛa ꞉Komoruyɔ doraa chibinuny.
Na sɛɛsɛ,
“Ngalɔkta kɔbhtɛsɛ Yaykob ko gochonginya gena.”
Na koo kendɛ na nɔng ogu ba konnɔ.
18 Na hunaa bho arsaye,
bholi dɛɛbɛ na rɛgɛ ꞉lɔkku na ghindɛ kɛngɔ na se,
“Betiros dhaa ogu ori?”
Na tɛngɛrɛ bho goore.
19 Na nɔng Heredios lamiu Betiros dirr na ngani ngajɔanao.
Na maragu lɔga zuga bhɛginɛna haalɛ na wurtɔ aynɛ zuga atiɛa zugo lɔgɔ na kinditɔ.
Lɔga Rɛsɛa ꞉Herediosi
Na nɔng Heredios bana Yudhagiye na ogu chɔɔ Kesariya na tɛu ngonu.
20 Nɔng dha bere wologinɛ ko zuga Tirosi ko ga Sidona.
Na yɔk muktiyaa ke dhɔnɛ na ghini hira kachcha nɔng kèe Bhilastos na kighinɛsɛ bhɛa kedhdhɛa ko komoru lɔgɔ.
Nɔng Bhilastos a hira yɛbhbha ꞉Herediosi goore.
Na igomɛsɛ na dhi kari chɔɔ bhɛa ihɛa ꞉komoruyɔ na kegedhigi lɔgɔ ke ngaya amissɛa oriya ngazukta kòhonyɛ baa Herediosiye.
21 Na unga senno kitinynyandɛy,
Heredios malugu ruminyaa gɛnyɛ dɛldɛla komorumo.
Na tɛu alleya nɛnɛ komoruny na yogɛsɛ zugo lɔgɔ.
22 Na zugo ara wuy na se,
“Ngalɔkta a lɔga yokkono ꞉tumu konnɔ!
a Ga yokkono ꞉hiriyɔ ngayo!”
23 Na nɔng Heredios Tumu ngani ngadhɔngngo.
Na hira ekkono ꞉Komoruyɔ Tumu dhula dari na aynɛ ilagay.
Na bhayaga ꞉kurutu na ere.
24 Na yɔk lɔga Tumu tɛhɛtɛy ko ba.
25 Na Barnabas ko Saol hunaa ayɛa zugo ahaa ginani na tewa ushaye,
banda Yerusalemɔ na dhiya ko Yohanisa kènno Markos kari na waga Ansokiyagiye.