Lɔga Ale Kòbolkiyɛa :Doraa Tumu Barara Ko Ga Bɛrgunyaa Ale Uturronɛa Ba
13
1 Na Yesus hunaa ngani bhonsana doraa Tumu bararaye, zuga kɔbhbhɛa nɔng kona sɛɛsɛ, “Hira madhdhiy, ga gɔny ngabɛnda bu bibi dha bere kɔdhdhɛ :zugu doriyoye ko ngadoriyoa bu chalde.”2 Na sɛɛsɛ :Yesusi, “Ngadoriyoa bu bibi chalde oriyɔ? Yɔk ngabɛnda gɛ bere kɔ̀gɔdhdhɛye ale nganga dhul ngaɛllo. Ale kòbolki rang na ngadamita ngaibhinɛo.”
3 Na Yesus hunaa koo iho bay bhichang Kutula Girarruny gɔra ranɛna ko doraa Tumu bararaye, nɔng Betiros ko Yaykob ko Yohanis ko Indiriyas assa nɔng na ghini na seyɛsɛ, 4 “Ga yogogiytɔ! Ngangaye kolee ale bhugnyɛsɛnɛ ngalɔkta wa yokkonde ale a minang? Na ngalɔkta kumulɔng hunde kolea nɛ senno kubhugnyɛsɛ dhaa te jaaye, kàgga ɛnɛng?”
5 Na nɔng Yesus sɛɛsɛ, “Tɛldi kɔk! Ngakitabhtung :genne. 6 Yɔk zuga bo mɛra ale hony na aminɛnɛ sara ganyu na sennɛ, ‘Kani nɔng,’ na tabhbhɛ zugo ga mɛra. 7 Na hunde shikto lɔga kɔdhdhany ko kamannaa bansanɛa bɛrrɔye, ngadɛɛsso. Yɔk ngalɔkta bɛrrunyde maya bhugnyɛsɛnɛyɔ. Na nɔng kolea ale bhugnyɛsɛnɛa lɔga bany kumulɔng ngani i rɛna. 8 Yɔk bhorinya ko bhorinya ale kɔnnɛ kɛngɔ, na komortɛn ko komortɛn kɔnnɛ kɛngɔ. Na han genne ba ale chukinɛ na hozzo a bu. Yɔk ngalɔkta kumulɔng agga shigininyanɛa chɔllaa ale dokkonɛa :zugu kumulɔng hɛtta ko ilagaya ngani ilagassanɛa tɛriya senno kuhudhugɛ.
9 “Na mɛa tɛldi kɔk! Yɔk zugo ale ibhbhongɛ na hɛyɛungɛ bhɛa zuga kedhdhɛa lɔgɔ, na dhakkungɛ doriyoa madhinɛnɛa zuga Ayhudhi lɔga Tumu. Na ale hɛyɛungɛ bhɛa zuga allinɛnɛa zugo ko bhɛa komortɛnuny ke ngaya yɛbhbhɛanyu anyeye na kɔbhɛsɛno lɔga ganyu bere orrono kawarre. 10 Na yɔk ngalɔkta hunde sabbɔ ngani kohoyaoye, maya kamannaa Tumu challa kàmadhɛsɛn bhorinya kumulɔng. 11 Na hunde ibhtong :zugu na aytɛung bhɛa senno kegendɛ lɔgɔye, igge ngakoleonu ngashurtɛ sabbɔ na se, ‘Na dha kalda kòyokkono giyong?’ Yokto gee yokkonoye hung ke ngaya lɔkte yokkonoye, ga sabbiya gu ngaannɛo na anɛ ga yokkogungu :Kuloya Tumuye.
12 Nɔng ngakoleonu gɔynggɛ ale ɛkkɛnyannɛ kɛngɔ na gena kɔdhdhɛsɛnɛ gochonginyaa gɛ mirɔga na nissɛyɔ. Na choginggɛ ale bansɛsɛnɛ erroa gɛ na kɔdhdhɛsɛnɛ mirɔga na nissɛyɔ. Na ko yɔk erro ale bansɛsɛnɛ jugɛ ko choginggɛ na kɔdhdhɛsɛnɛ zugo na nissɛyɔ. 13 Na zugo kumulɔng ale marrungɛ ke ngaya yɛbhbhɛanyu anyeye. Na nɔng inde ujjɛsɛn hini bɛ na yɛbhbhany anye ko bhee jagarɛ rɛsɛye, ale bassɔ.
14 “Na hunde arto ‘galiya lɔmma ridhing hunde chilu bhɛa kullɛna na digu ngonuye,’a zuga ɛlla baa Yudha any kajara kutulo. Na hirre toyi ngalɔktaye sɛɛ kutungɛsɛyɔ. 15 Na inde i doraa nɛnɛ kuragiyeye ba ngabonsana na dori toye tunnugi na ahi kona dhummana. 16 Na inde i guyɔye ngakawak wurtɔ na kudhuma rum. 17 Nɔng mɛa anye koyokkogunggɔ. Ale ngakoleonu tɛrroa rɛhi gɛrsa ko ga ku oshogi, bhɛa nɛ lɔgɔ dhandal goore dhogoy. 18 Na igge alliyɛ ko Tumu na ngalɔkta kolea asandayny ngaɛrrinya, 19 ke ngaya ngakoleonu ale anɛ na chɔllanɛna :zugu gooreye. Nɔng ngachɔllaonu ale kunde anna bere sabbɔ chɔɔ bɛrgua bere ghendonɛa :Tumu aha kumulɔng ko mɛa toye, ngani kàrtao dhul. Na chɔɔ bɛrgunyaye ale ngani andanɛye, chɔllaye ku nganga sɛgɛn ale ngakunno dhul. 20 Na Komoru hunde bere ngaungga chɔllainyde ke muchugi ngaojji, anda hirre dhɔnɛ churinya ninggɛ dhul. Na nɔng koo ojju ngaunggonu ke muchugi ke ngaya se kɛay zuga gɛnyɛ bere bɛrranaye. 21 Na ale ngakaldonu hunde hir kona sennagung, ‘Ga gɔnyigiyɛ, Kirisos aynda i gɔrraye,’ oo , ‘a ngandonu i ngonuye,’ igge ngayɛbhbho, 22 ke ngaya zuga ku butoga bhɔdhdhɛa rɛhi ke Kirisos ko butoga yogɛsɛnɛa zugo lɔga magganɛa huna naa yogɛsɛna :Tumu ale bansanɛ na messɛ lɔga bo barara ko ga bo kìwacheoye. Na hunde ɔanɛye ale bhɔdhdhɛ chɔɔ zuga bere bɛrrana :Tumu hinisi na tabhbhɛyɔ. 23 Na mɛa tɛldi kɔk! Yɔk ngalɔkta kumulɔng a ngagiya wa kudhugunogunggɔ sabbɔ hunde kolea ɛrrinyanɛa ngani kugooye.
24 “Nɔng ngakoleonu hunde chɔlla ko na te ushaye,
‘ale su dhittinya ke kɔrrɔ,
na tagi ba ngaterinyo.
25 Na munyunya ngɔanɛ tumɔ
na ngaahaya bu barar ɛl tumɔye chukinɛyɔ.’
26 Na ngakoleonu nɔng Hiri Hoynɛ ale orrɛ :zugu hunde bu kun idhogiye na bo lɔmmana diram ko barartinde. 27 Na ale itton zuga ekko :nɛa na mukkanɛ zuga bere bɛrrana ɛlla ba kumulɔng ko ga ɛlla surr hana uturronɛa ba.
28 “Na mɛa igge ga arta madha bhɛa ngakɛta ku chamochi keni kɛ̀lɛhɛnagungge. Nɔng chamochi hunde nyabha chɔ na labhayɛye, gaoyɔ hunde dhak bɛrgu na ba se kete asandayte. 29 Na ko igge hunde arto ngalɔkta wa kudhugunogungge hunde urruknyɛsɛye, tagatɔ hunde kolea kunɛa :Hiriyɔ Hoynɛ ngangaye dhaa te ja na te girɔng ko tugɔye. 30 Ga shigitɔ! Yɔk ngalɔkta kumulɔng ko bhee urruknyɛsɛnɛ, ngatenyda mɛa toyneye ngagarsɛo. 31 Yɔk ba ko tumu ale garsɛyɔ. Na yɔk lɔga ganyu ngagarsɛo dhul ko kingi.
Lɔga Kìmagɛa Kolea Ale Wokkonɛa :Yesusi
32 “Nɔng kala ale kunɛa :Hiriyɔ Hoynɛ, inde gaye a :Babaa na Tumu sɔng. Kona ninggɛ dhul. Chɔɔ zuga ekko ꞉Tumu tumɔ ko Eriya Nɛnɛ, ngakoleonu imaggɛyɔ. 33 Na mɛa tɛldi tunɔ na mɛdhta na alliyɛ ko Tumu ke ngaya imagɛo ngakoleonu hunde ale a minangge. 34 Nɔng ngakoleonu hɛt ko hira kɔa rɛna, na ibhbhana zuga kachchɛa nɔng na dhɔyɛsɛna dori na ajjɛa zinggo bhiy bhiy na madhɛsɛna hira bhɛginɛna waranɔ lɔgɔ na kɛtɛ tunɔ na kɛbhɛkkɛ shɛɛ. 35 Na mɛa ko igge mɛdhta na tɛldi tunɔ ke ngaya imagɛo kolea ale wokkonɛa :ɛnaa doriye. Nɔng hunde kesea ale wokkono jhaynɔ oo bar kɛngɔ oo kolea rɔgɛa :kobiya ku sabba oo gidhanggayɔye, igge imaggoyɔ. 36 Na hunde ale dhullana dari na kunde, ngakassaung unge. 37 Yɔk ngalɔkta koyokkogung iggeye, koyogɛsɛn chɔɔ zugo kumulɔng. Na a ɛnɛnggeo, ‘Mɛdhta kali kali na tɛldi tunɔ!’”